កីឡា

Nick Taylor ថា ការប្រកួតពានអន្តរជាតិជាឱកាសបង្កើនសមត្ថភាពក្រុម

បានផុស

៧ ខែ មុន

នៅ

ថ្ងៃសុក្រ ១០ ឧសភា ២០២៤

ដោយ

ក្រុមបាល់ទាត់ព្រះខ័នរាជស្វាយរៀងនៅរដូវកាលក្រោយនឹងត្រូវធ្វើការប្រកួតប្រជែងក្នុងពានរង្វាន់អន្តរជាតិ២បន្ថែមលើពានរង្វាន់ក្នុងស្រុកធំ២ បន្ទាប់ពីពួកគេបានឈ្នះជើងឯក២ក្នុង១រដូវកាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករខ្មែរ-អាមេរិក Nick Taylor យល់ឃើញថា នៅរដូវកាលក្រោយជាពេលវេលាដ៏ល្អ សម្រាប់ក្រុមព្រះខ័នរាជស្វាយរៀង។ ពួកគេនឹងប្រកួតប្រជែងក្នុងពានរង្វាន់ ASEAN Club Championship និង AFC Challenge League ដែលនឹងក្លាយជាឱកាសសម្រាប់ក្រុមទាំងមូលស្វែងយល់ពីប្រព័ន្ធលេងសម្រាប់ការប្រកូតកម្រិតអាស៊ាន និងអាស៊ី។ វាជាការប្រកួតប្រជែងកាន់តែខ្លាំង ក្រុមកាន់់តែបង្កើនសមត្ថភាព។

កីឡាករ Nick Taylor បានប្រាប់«កម្ពុជាថ្មី»ថា ៖«ខ្ញុំគិតថាវាគួឲ្យរំភើបសម្រាប់កីឡាករ បុគ្គលិក និងអ្នកគាំទ្រទាំងអស់ក្នុងការសាកល្បងសមត្ថភាពជាមួយក្រុមដែលមានគុណភាពខ្ពស់ក្នុងតំបន់។ ក្លិបនឹងផ្តល់អ្វីៗគ្រប់យ៉ាងដើម្បីតំណាងឲ្យអ្នកខេត្តស្វាយរៀង និងអ្នកគាំទ្របាល់ទាត់កម្ពុជាពេញចិត្ត»។

កីឡាករបន្តថា ៖«អត្ថប្រយោជន៍ចម្បងដែលខ្ញុំគិតគឺគ្រាន់តែមានការប្រកួតប្រជែងថ្មីនៅចំពោះមុខអ្នកគាំទ្រ។ ប្រាកដណាស់ ក្លិបយើងត្រូវប៉ះមានទម្រង់លេងខុសពីយើង ហើយក៏ខុសពីក្រុមផ្សេងៗនៅលីគកំពូលកម្ពុជាដែរ។ ឱកាសនេះផ្តល់ឱ្យកីឡាករ និងក្លិបទាំងមូលរីកចម្រើនជាលំដាប់»។

ជាការពិតណាស់ អ្នកគាំទ្របាល់ទាត់នៅកម្ពុជា និងកីឡាករព្រះខ័នរាជស្វាយរៀងពិតជាទទួលបានអារម្មណ៍ពិសេសប្លែកមួយកម្រិតទៀត ក្នុងបរិមាណនៃការប្រកួតប្រជែងខ្ពស់ក្នុងពានរង្វាន់អន្តរជាតិទាំងពីរនៅរដូវកាលក្រោយ។

បុរសសង្ហា Nick Taylor បានបន្ថែមថា ៖«លើសពីនេះ វាជាឱកាសសម្រាប់ពួកយើងលេងដើម្បីតំណាងឲ្យប្រទេសកម្ពុជា។ បាល់ទាត់នៅកម្ពុជាមិនទាន់ទទួលការឲ្យតម្លៃខ្លាំងនៅឡើយទេ។ ប្រសិនបើយើងអាចធ្វើបានល្អ ជាពិសេសឈ្នះពាន វាអាចជួយផ្លាស់ប្តូរផ្នត់គំនិតមួយនេះបាន»។

លទ្ធផលចាប់ឆ្នោតពានរង្វាន់ ASEAN Club Championship សម្រាប់វគ្គជម្រុះ គឺក្រុមព្រះខ័នរាជស្វាយរៀងប៉ះក្រុមឡាវ Young Elephants។ ការប្រកួតជើងទី១ នៅថ្ងៃទី១៧ ខែកក្ដដា នៅទឹកដីប្រទេសឡាវ និងជើងទី២ នៅថ្ងៃទី២៤ ខែកក្ដដា នៅទឹកដីកម្ពុជា៕

អត្ថបទ៖ ផា រតនា