រថយន្ដកាមរីបាឡែនបោះពួយឡើងសួនច្បារ ផ្លូវសហព័ន្ធរុស្ស៊ី

បុរសម្នាក់ស្រវឹងធ្លាក់ភ្លែកបានបើករថយន្តបោះពួយទៅបុកថ្មខឿនសួនច្បារខូចខាតអស់ជាច្រើនដុំ បង្កការភ្ញាក់ផ្អើលកាលវេលាម៉ោង ២និង២០នាទីយប់រំលងអធ្រាត្រឈានចូលថ្ងៃសុក្រ ទី២២ ខែតុលា ឆ្នាំ២០២១ត្រង់ចំណុចមុខធនាគារ​ABAតាមបណ្តោយផ្លូវសហព័ន្ធរុស្សុី ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅវេលាកើតហេតុគេឃើញរថយន្តកាមរីបាឡែន ពណ៌ស្ករ ពាក់ស្លាកលេខភ្នំពេញ2AC.5773បើកដោយបុរសម្នាក់ស្រវឹងស្រា ធ្វើដំណើរតាមបណ្តោយផ្លូវសហព័ន្ធរុស្ស៊ីក្នុងទិសដៅពីលិចមកកើតយ៉ាងលឿន ខណ:មកដល់កន្លែងកើតហេតុក៏រេចង្កូតមកស្តាំដៃបុកឡើងលើសួនច្បារចែកផ្លូវបណ្តាលឲ្យខូចខាតថ្មខឿនអស់ជាច្រើនដុំ និងខូចខាតរថយន្តយ៉ាងដំណំផងដែរ តែសំណាងល្អមិនបង្កឲ្យមានអ្នកគ្រោះថ្នាក់នោះទេ។

បន្ទាប់ពីកើតហេតុសមត្ថកិច្ចជំនាញចុះមកវាស់វែងស្ទូចយករថយន្តបង្កទៅរក្សារទុកនៅការិយាល័យចរាចរណ៏រាជធានីភ្នំពេញរង់ចាំដោះស្រាយគ្នាបន្តទៀត៕

អត្ថបទ​៖ រស្មី