iPad Pro OLED និង iPad Air ជំនាន់ថ្មី អាចនឹងលើកថ្ងៃប្រកាសចេញ រហូតដល់ខែក្រោយ

ពាក្យចចាមអារ៉ាមនិយាយថា iPad Pro OLED និង iPad Air ២០២៤ នឹងបង្ហាញខ្លួននៅសប្តាហ៍ក្រោយ ប៉ុន្តែអាចនឹងត្រូវពន្យារពេលដល់ខែមេសា ដោយសារតែ ត្រូវដុះខាត់បន្ថែមទៅលើប្រព័ន្ធប្រតិបត្តិការថ្មីរបស់ខ្លួន ។

យោងតាមការបង្ហើបពីគេហទំព័រអ្នកស្រឡាញ់បច្ចេកវិទ្យា Instant Digital បានឱ្យដឹងកាលពីថ្ងៃទី២០ ខែមីនា នេះថា Apple អាចនឹងចេញផលិតផលថ្មីនៅថ្ងៃទី ២៦ ខែមីនា រួមមាន iPad Pro ដែលមានអេក្រង់ OLED និង iPad Air ជំនាន់ថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្អែកលើពាក្យចចាមអារ៉ាម Apple នឹងមិនរៀបចំព្រឹត្តិការណ៍ណាមួយឡើយ ចំពោះផលិតផលថ្មីទាំងនេះ ដោយគ្រាន់តែប្រកាសដំណឹង និងណែនាំប៉ុណ្ណោះ។ បន្ថែមពីលើនេះ Apple អាចនឹងប្រកាសតម្លៃលក់ ការបញ្ជាទិញ និងកាលបរិច្ឆេទចែកចាយសម្រាប់អ្នកប្រើប្រាស់ទៀតផង។

គេហទំព័រ IT Home របស់ប្រទេសចិន ក៏បានចែករំលែកព័ត៌មានស្រដៀងគ្នានេះផងដែរ។ ​នៅថ្ងៃទី២០ ដដែលនោះ អ្នករាយការណ៍ របស់ Bloomberg លោក Mark Gurman បាននិយាយថា Apple គ្រោងនឹងដាក់បង្ហាញ iPad Pro និង iPad Air ថ្មីនៅចុងខែមីនា ឬខែមេសា។ យោងតាមលោក Gurman មូលហេតុដែល iPad Pro និង iPad Air មិនអាចចេញក្នុងខែមីនា គឺដោយសារតែ iPad OS ជំនាន់ 17.4 នៅមិនទាន់ពេញលេញនៅឡើយ។

iPad Pro OLED គឺជាឧបករណ៍មួយរបស់ Apple ដែលត្រូវបានរង់ចាំយ៉ាងអន្ទះសារពីសំណាក់អ្នកគាំទ្រផលិតផលក្រុមហ៊ុនផ្លែប៉ោមឆែបមួយនេះ ។ បើប្រៀបធៀបទៅនឹង LCD បន្ទះ OLED ជួយបង្ហាញពណ៌នៅលើអេក្រង់កាន់តែភ្លឺច្បាស់ និងសន្សំសំចៃថាមពល។

ផ្អែកលើពាក្យចចាមអារ៉ាម iPad Pro OLED អាចនឹងត្រូវបានបំពាក់ដោយប្រព័ន្ធដំណើរការ M3 និងកាមេរ៉ាខាងមុខមានទម្រង់ផ្តេក។ ក្រៅពីជម្រើសទំហំ ១១ អ៊ីង ក្រុមហ៊ុន Apple ត្រូវបានគេនិយាយថា នឹងបង្កើនទំហំពី ១២,៩ អ៊ីញទៅ ១៣ អ៊ីញ។

ទន្ទឹមគ្នានេះ iPad Air ទំនងជានឹងបន្ថែមជម្រើសទំហំ ១២,៩ អ៊ីង ដើម្បីតម្រូវចិត្តអ្នកដែលចង់ធ្វើជាម្ចាស់ iPad អេក្រង់ធំក្នុងតម្លៃសមរម្យ។ បន្ថែមពីលើនេះ Pad Air អាចនឹងបំពាក់បន្ទះឈីបM2 , Wi-Fi កម្រិត 6E និង Bluetooth 5.3 ។

យោងតាមលោក Gurman ផលិតផលទាំងនេះ អាចនឹងត្រូវណែនាំដោយសេចក្តីប្រកាសព័ត៌មាននៅលើគេហទំព័រ Apple ដែលស្រដៀងទៅនឹង MacBook Air M3 ដែលទើបតែដាក់លក់នៅដើម ខែមីនា នេះ ៕

ប្រែសម្រួលដោយ៖ ប៉ោ កុសល