ព័ត៌មានជាតិ
កម្ពុជាមានជនជាតិដើមភាគតិច ២២ អម្បូរ រស់នៅ ៦ ខេត្ត
នៅក្នុងប្រទេសកម្ពុជាបច្ចុប្បន្នមានជនជាតិដើមភាគតិច ២២ អម្បូរ ស្មើជាង ១៨ ម៉ឺននាក់ប្រមាណ ១,២៥% នៃប្រជាជនកម្ពុជាសរុប ដែលកំពុងរស់នៅច្រើនជាងគេរហូត ដល់ជាង ៩០% នៅក្នុងខេត្តចំនួន៦ ភូមិភាគឥសាន្ត និងខេត្តកំពង់ធំ។ នេះបើយោងតាមរបាយការណ៍ជាតិស្តីពី ស្ថានភាពប្រជាសាស្ត្រ និងសង្គម សេដ្ឋកិច្ច របស់ជនជាតិដើមភាគតិចកម្ពុជា។

នៅថ្ងៃទី៤ ខែវិច្ឆិកានេះ លោកទេសរដ្ឋមន្ត្រី ឆាយ ថន រដ្ឋមន្ត្រីក្រសួងផែនការ បានចូលរួមក្នុងពិធីផ្សព្វផ្សាយរបាយការណ៍ជាតិស្តីពី ស្ថានភាពប្រជាសាស្ត្រ និងសង្គម សេដ្ឋកិច្ច របស់ជនជាតិដើមភាគតិចកម្ពុជា។ លោក ឆាយ ថន បានលើកឡើងថា ការកំណត់ជនជាតិដើមភាគតិចនៅកម្ពុជាត្រូវបានកំណត់តាមរយៈការប្រើភាសានិយាយពីដើមកំណើត។ ជនជាតិដើមភាគតិចនៅកម្ពុជាមានចំនួន ២២ អម្បូរដែលមានប្រជាជនសរុប ១៧៩ ១៩៣ នាក់ ស្មើនឹង ១,៣៤% នៃប្រជាជនកម្ពុជាសរុបនៅឆ្នាំ ២០០៨ និង មានចំនួន ១៨៣ ៨៣១ នាក់ស្មើនឹង ១,២៥% នៃប្រជាជនកម្ពុជាសរុបនៅឆ្នាំ២០១៣ (អត្រាកំណើនមានត្រឹម ០,៥១% ក្នុងមួយឆ្នាំ)។
លោករដ្ឋមន្ត្រីបានបន្តថា ក្នុងចំណោមអំបូរទាំង ២២ ជនជាតិដើមភាគតិចដែលមានចំនួនច្រើនជាង ១ ម៉ឺននាក់មានតែ ៦ អំបូរប៉ុណ្ណោះគឺ ទំពួន ព្នង គ្រឹង កួយ ចារាយ និងព្រៅ ដែលសរុបមានចំនួនស្មើនឹង ៨៨% នៃប្រជាជនជនជាតិដើមភាគតិចទាំង ២២ អម្បូរ។ ភាគច្រើននៃជនជាតិដើមភាគតិចទាំងនោះរស់នៅក្នុងខេត្តចំនួន ៦ ដូចជាខេត្តរតនគីរី មណ្ឌលគីរី ក្រចេះ ស្ទឹងត្រែង ព្រះវិហារ និងខេត្តកំពង់ធំ ដែលមានចំនួន ៩២,៤% នៃជនជាតិដើមភាគតិចរស់ទាំងអស់នៅឆ្នាំ២០១៣។

ទាក់ទងទៅនឹងការសិក្សាអប់រំ ជនជាតិដើមភាគតិចទទួលបានការអប់រំតិចគឺប្រហែល ១ភាគ៣ នៃជនជាតិដើមភាគតិចចេះអាន និងចេះសរសេរភាសាខ្មែរ ក្នុងនោះកុមារជិត ៥០% មិនបានរៀនសោះ។ ក្នុងចំណោមជនជាតិដើមភាគតិចអាយុ ១៥ ឆ្នាំឡើង ជិត ៦៦% មិនបានរៀន ឬបញ្ចប់កម្រិតសិក្សាអ្វីទាំងអស់ រីឯ ២៤,១% ទៀត បានរៀនត្រឹមបឋមសិក្សា ខណៈ ១០% បានរៀនដល់មធ្យមសិក្សាបឋមភូមិ និង ៤% រៀនបានមធ្យមសិក្សាទុតិយភូមិ។
ចំពោះស្ថានភាពសេដ្ឋកិច្ច និងការងារវិញ ជនជាតិដើមភាគតិចចាប់ពីអាយុ ១៥ ឆ្នាំឡើងទៅ ដែលមានការងារធ្វើប្រកបរបរក្នុងវិស័យកសិកម្ម គឺមានសរុបចំនួន ៩៣,៣% មានតិចតួចគឺ ១,៦% ធ្វើការក្នុងវិស័យឧស្សាហកម្ម និង ៥,១% បានបំរើការងារក្នុងវិស័យសេវាកម្ម។ ជាមួយគ្នានេះ បញ្ហាសុខភាព និង អនាម័យ គឺជនជាតិដើមភាគតិច ៥៣% ច្រើនសម្រាលកូនតាមផ្ទះ និង ៣៨% ទៅមន្ទីរពេទ្យ ខណៈ ៦% នៅមណ្ឌលសុខភាព។ ជាទូទៅជនជាតិដើមភាគតិច ៩៥% ឆ្នាំ២០១៣ មានលំនៅឋានខ្លួនឯងដោយពួកគេនៅបន្តប្រើប្រាស់ចង្កៀងប្រេងកាត និងអាគុយជាប្រភពភ្លើងបំភ្លឺ ខណៈអ្នកប្រើអគ្គិសនី ឬម៉ាស៊ីនភ្លើងផ្ទាល់ខ្លួនមានចំនួន ២០,៦%។ ក្រៅពីនេះ ៩៥% នៃជនជាតិដើមភាគតិច នៅបន្តប្រើប្រាស់អុសជាថាមពលចម្អិន ហើយ ១ភាគ៣ នៃគ្រួសារពួកគេមានទូរទស្សន៍ប្រើ។ ដោយឡែកសម្ភារៈសម្រាប់ធ្វើដំណើរវិញគ្រួសារជនជាតិដើមភាគតិចជាង ៧៦% មានម៉ូតូប្រើ ២,២% មានរថយន្ត ជាង ៩% មានគោយន្ត ៧,៨% មានទូក និងជាង ៣៧% ប្រើកង់។

លោកកិត្តិសេដ្ឋាបណ្ឌិត ឆាយ ថន មានប្រសាសន៍ថា របាយការណ៍ជាតិស្តីពីស្ថានភាពប្រជាសាស្ត្រ និងសង្គម សេដ្ឋកិច្ច របស់ជនជាតិដើមភាគតិចកម្ពុជា គឺជារបាយការណ៍សំខាន់ដែលរាជរដ្ឋាភិបាលសហការរៀបចំបង្កើនការយកចិត្តទុកដាក់អភិវឌ្ឍន៍ និងអភិរក្សដោយមិនទុកពលរដ្ឋខ្មែរណាម្នាក់ មិនទទួលសេវាអភិវឌ្ឍន៍ពីរដ្ឋឡើយ។
លោកបណ្ឌិតសភាចារ្យ អ៊ុក រ៉ាប៊ុន ថ្លែងថា តាមរយៈការទទួលបានរបាយការណ៍ជាតិស្តីពី ស្ថានភាពប្រជាសាស្ត្រ និងសង្គមសេដ្ឋកិច្ចរបស់ជនជាតិដើមភាគតិច នៅកម្ពុជានេះ គឺបានផ្តល់នូវធាតុជាច្រើនដែលនឹងជួយជំរុញដល់ការដាក់ផែនការជាតិនានាការរៀបចំគោលនយោបាយ និងការលើកគម្រោងអភិវឌ្ឍន៍ និងអភិរក្ស លើកស្ទួយវិស័យសេដ្ឋកិច្ច សង្គម និងវប្បធម៌របស់ជនជាតិដើមភាគតិចឱ្យបានល្អប្រសើរ ពិសសេស ការចូលរួមកាត់បន្ថយភាពក្រីក្រ និងបញ្ហាប្រឈមនានាទៀត ដល់ជនជាតិដើមភាគតិច៕
អត្ថបទ៖ ណារី

-
ព័ត៌មានអន្ដរជាតិ២ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
ព័ត៌មានអន្ដរជាតិ៥ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
សន្តិសុខសង្គម៣ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានជាតិ២ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៥ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ៦ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
សន្តិសុខសង្គម២ ថ្ងៃ ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
សន្តិសុខសង្គម២១ ម៉ោង ago
ជនសង្ស័យប្លន់រថយន្តលើផ្លូវល្បឿនលឿន ត្រូវសមត្ថកិច្ចស្រុកអង្គស្នួលឃាត់ខ្លួនបានហើយ