២ខែចុងឆ្នាំនេះ​កំណើនសេដ្ឋកិច្ចកម្ពុជា​នឹងកើនលើស ២,៤ភាគរយ

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានព្យាករណ៍ថា កំណើនសេដ្ឋកិច្ចកម្ពុជា នឹងកើនលើសការរំពឹងទុក នារយៈពេល ២ខែចុងឆ្នាំ ២០២១នេះ។ សម្តេចតេជោថ្លែងបែបនេះ នៅក្នុងពិធីសម្ពោធដាក់ឲ្យប្រើប្រាស់ជាផ្លូវការស្ពានឆ្លងទន្លេមេគង្គ ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នៅព្រឹកថ្ងៃទី ២៣ ខែវិច្ឆិកា ឆ្នាំ ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចមានប្រសាសន៍ដូច្នេះថា«ចរន្តសេដ្ឋកិច្ចនឹងមានកំណើនឡើងវិញ ស្ថានភាពបែបនេះ ខ្ញុំព្យាករណ៍ថា ស្ថានភាពសេដ្ឋកិច្ចចុងឆ្នាំនេះ នឹងអាចលើសការដែលយើងដាក់នៅក្នុងផែនការ ដែលថ្ងៃខានស្អែកនេះ នឹងត្រូវចាប់ផ្តើមឆ្លងនូវច្បាប់ថវិកា…យើងដាក់ថា កំណើនសេដ្ឋកិច្ចឆ្នាំ២០២១ មាន២,៤% ប៉ុន្តែមានអង្គការមួយមកវាយតម្លៃបានទៅដល់ ២,៨% ហើយខ្ញុំគិតថា បើសិនកំណើនសេដ្ឋកិច្ច២ខែចុងឆ្នាំនេះល្អ គឺកំណើនរបស់យើងអាចឈានឆ្ពោះទៅរកជុំវិញ ៣%។

លើសពីនេះទៀត សម្តេចបានមានប្រសាសន៍ថា ឆ្នាំ២០២២ខាងមុខ កម្ពុជា ដាក់កំណើនសេដ្ឋកិច្ចត្រឹម ៤,២% ប៉ុន្តែសម្តេចរំពឹងថា សេដ្ឋកិច្ចឆ្នាំក្រោយអាចហក់ឡើងលើស ៥%។  

សម្តេចដាក់ក្តីរំពឹងខ្ពស់លើសេដ្ឋកិច្ចឆ្នាំក្រោយបែបនេះ ដោយសារមើលឃើញអំពីវិស័យកសិកម្មនៅដំណើរការទាំងអស់ ថែមទាំងលើសផែនការកំណត់ទៅទៀត។ ចំណែកការនាំចេញផ្នែកវិស័យកសិម្មមានទំហំធំជាងមុនឆ្ងាយ។ ជាមួយគ្នានេះ សម្តេចតេជោ ក៏កំពុងចរចាជាមួយនាយករដ្ឋមន្រ្តីចិន ពីការនាំចេញផលិតផលកសិកម្មកម្ពុជាទៅចិនដោយត្រង់ ដោយមិនឆ្លងកាត់ប្រទេសទី៣ទៀតទេ៕

អត្ថបទ៖ ទួន ​សុផល