ព័ត៌មានជាតិ

មេបញ្ជាការរង ខេត្តបន្ទាយមានជ័យ បើកជែងរថយន្តទៅបុកបង្គោលភ្លើង រងរបួសធ្ងន់

Published

3 months ago

December 11, 2020

លោកឧត្តមសេនីយ៍ត្រីជុំ សេដ្ឋា មេបញ្ជាការរងនិងជានាយសេនាធិការកងពលលេខ៥១ នៅខេត្តបន្ទាយមានជ័យ បានបើករថយន្តទៅបុកបង្គោលភ្លើងធំ ខ្សែបញ្ជូនតង់ស្យុងខ្ពស់ រងរបួសធ្ងន់ នៅវេលាម៉ោង៥និង៣០នាទីល្ងាច កាលពីថ្ងៃទី១០ ខែធ្នូ ឆ្នាំ២០២០ លើកំណាត់ផ្លូវជាតិលេខ៥ ចំណុចដើមពោធិ៍២ដើម ភូមិសុរិយាថ្មីឃុំកូប ស្រុកអូរជ្រៅ ខេត្តបន្ទាយមានជ័យ។

លោកវរសេនីយ៍ សេស វិបុល អធិការនគរបាលស្រុកអូរជ្រៅ បានឲ្យដឹងថា នៅមុនពេលកើតហេតុនោះ មានរថយន្តឃ្លុបពណ៌ត្រេអ៊ី ពាក់ស្លាកលេខខេមរៈ ភូមិន្ទ០៧.២-៣៤០៥ បើកក្នុងល្បឿនលឿនពីទិសខាងកើតទៅលិច លុះបើកមកដល់កន្លែងកើតហេតុ រថយន្តបានឡើងជែងរថយន្តក្នុងទិសស្របជ្រុលចង្កូត ធ្លាក់ផ្លូវទៅបុកបង្គោលភ្លើងធំខ្សែបញ្ជូនតង់ស្យុងខ្ពស់១១៥គីឡូវ៉ុល បណ្តាលឲ្យបង្គោល១ដើមបាក់ដល់ដី ទ្រេតបង្គោលផ្សេងទៀត ចំណែកអ្នកបើករថយន្ត រងរបួសធ្ងន់ ត្រូវបាននគរបាលនិងក្រុមអ្នកសង្គ្រោះប្រញាប់ ដឹកបញ្ជូនទៅសង្គ្រោះព្យាបាលនៅមន្ទីរពេទ្យខេត្តមិត្តភាពកម្ពុជា ជប៉ុន មង្គលបូរី។ ក្រោយគ្រោះថ្នាក់ រថយន្តត្រូវនាំទៅរក្សាទុកបណ្ដោះអាសន្ន នៅនគរបាលស្រុក ដើម្បីដោះស្រាយទៅតាមនីតិវិធីច្បាប់។

ទាក់ទិនករណីនេះដែរ ប្រភពព័ត៌មានពីមន្ត្រីអគ្គិសនី នៅខេត្តបន្ទាយមានជ័យ បានឲ្យដឹងថានៅពេលបង្គោលភ្លើងខ្សែបញ្ជូនតង់ស្រុងខ្ពស់ដួលរលំ វាជាសំណាងល្អដែរ ដោយពុំមានទុស្សេឬឆ្លងចរន្តឆក់ពលរដ្ឋនៅតាមផ្ទះ ដែលបង្គោលដួលលើនិងអ្នកធ្វើដំណើរតាមផ្លូវជាតិលេខ៥ ជាងនេះទៅទៀត ចរន្តអគ្គិសនីក៏ត្រូវកាត់ផ្តាច់ក្នុងរយៈពេលខ្លី ពីព្រោះត្រូវក្រុមការងារអគ្គិសនីតភ្ជាប់បាន ប្រើប្រាស់បន្ទាន់ឡើងវិញ ផងដែរ៕