កម្ពុជាគ្រោងបើកច្រកទ្វារព្រំដែនអន្តរជាតិជាមួយថៃ មួយកន្លែងទៀត

រាជរដ្ឋាភិបាលកម្ពុជាគ្រោងនឹងបើកច្រកទ្វារអន្តរជាតិជាប់ព្រំដែនជាមួយប្រទេសថៃមួយកន្លែងទៀត ដែលស្ថិតនៅភូមិសាស្ត្រថ្មដា ស្រុកវាលវែង ខេត្តពោធិ៍សាត់ មានទីតាំងជាប់ព្រំដែនជាមួយខេត្តត្រាត ប្រទេសថៃ ខណៈបច្ចុប្បន្នមានច្រកចំនួន ៧ រួចហើយ។

ថ្លែងក្នុងកិច្ចប្រជុំក្រុមការងារបច្ចេកទេសក្រសួងពិនិត្យ គម្រោងសាងសង់ច្រកព្រំដែនអន្តរជាតិថ្មដា កាលពីថ្ងៃទី១០ ខែកុម្ភៈនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ថា គម្រោងសាងសង់ច្រកព្រំដែនអន្តរជាតិថ្មដា ដើម្បីបើកច្រកព្រំដែនអន្តរជាតិរវាងកម្ពុជា-ថៃសំដៅបង្កើនកិច្ចសហប្រតិបត្តិការពាណិជ្ជកម្ម និងទេសចរណ៍រវាងប្រទេសទាំងពីរឱ្យកាន់តែមានភាពខ្លាំងក្លាថែមទៀត។

លោកទេសរដ្ឋមន្ត្រី បានបន្តទៀតថា មុននឹងឈានដល់បើកច្រកនេះ រដ្ឋាភិបាលឱ្យសាងសង់ហេដ្ឋារចនាសម្ព័ន្ធនានារួមមាន៖ អគារអន្តោប្រវេសន៍ អគារគយ និងរដ្ឋាករសម្រាប់ត្រួតពិនិត្យរួម ចំណតសម្រាប់ផ្ទេរទំនិញឆ្លងកាត់ ‌‌ឃ្លាំងទីលានកុងទីន័រ និងអគាររដ្ឋបាល និងសំណង់អគារអន្តេវាសិកដ្ឋាន ដើម្បីបើកឱកាសឱ្យបានទូលំទូលាយដល់កិច្ចសហប្រតិបត្តិការអន្តរជាតិ ការវិនិយោគ ការធ្វើពាណិជ្ជកម្មឆ្លងកាត់ដែន ការបង្កើតការងារធ្វើ និងការទាក់ទាញភ្ញៀវទេសចរ សំដៅលើកកម្ពស់សេដ្ឋកិច្ចគ្រួសារ និងសង្គមជាតិនៃប្រជាជាតិទាំងពីរ។

សូមបញ្ជាក់ថា យោង​តាម​អគ្គនាយកដ្ឋាន​អន្តោប្រវេសន៍នៃក្រសួង​មហាផ្ទៃ គិតត្រឹម​ឆ្នាំ​២០២០ កម្ពុជាមានច្រក​ទ្វារ​ព្រំដែន​អន្តរជាតិ​ជាប់​ជាមួយ​ប្រទេស​ថៃ​ចំនួន០៧ រួមមានច្រកទ្វារព្រំដែនអន្តរជាតិចាំយាមនៅខេត្ត​កោះកុង ច្រកទ្វារព្រំដែនអន្តរជាតិព្រំនៅខេត្ត​ប៉ៃលិន ច្រកទ្វារព្រំដែនអន្តរជាតិដូងនៅខេត្ត​បាត់ដំបង ច្រកទ្វារព្រំដែនអន្តរជាតិភ្នំដីនៅខេត្ត​បាត់ដំបង ច្រកទ្វារព្រំដែនអន្តរជាតិប៉ោយប៉ែតនៅខេត្ត​បន្ទាយមានជ័យ ច្រកទ្វារព្រំដែនអន្តរជាតិអូរ​ស្មាច់នៅខេត្ត​ឧត្តរមានជ័យ និងច្រកទ្វារព្រំដែនអន្តរជាតិជាំនៅខេត្ត​ឧត្តរមានជ័យ៕

អត្ថបទ៖ សំអឿន