ឯក​អគ្គរដ្ឋទូតចិន ​គាំទ្រប្រសាសន៍សម្ដេចតេជោ ថា “​មិនជឿថា​ ប្រើ​សង្គ្រាមមកបញ្ចប់សង្គ្រាម​​”​

លោក វ៉ាង វិនធាន ឯក​អគ្គរដ្ឋទូតចិនប្រចាំនៅកម្ពុជា បានប្រកាស​​គាំទ្រប្រសាសន៍របស់ សម្ដេចអគ្គមហា​សេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែ​លលើកឡើងថា ​​“​មិនជឿថា​ ប្រើ​សង្គ្រាមមកបញ្ចប់សង្គ្រាម​​” បាននោះទេចំពោះ ករណីនៅអ៊ុយក្រែន។​​

លោកបានមានប្រសាសន៍នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ​ ​មន្ទីរពេទ្យមិត្តភាពកម្ពុជា-ចិន នៅខេត្តត្បូងឃ្មុំ ​នៅ​ថ្ងៃចន្ទ ទី០៧ ខែមីនា ឆ្នាំ២០២​២​នេះ​។

លោក វ៉ាង វិនធាន មានប្រសាសន៍ថា៖​​ “ការវិវឌ្ឍន៍​នៃស្ថានការណ៍នៅអ៊ុយក្រែន ​បានទាក់ទាញការចាប់អារម្មណ៍យ៉ាងខ្លាំង ហើយ​ស្ថានការណ៍នេះ ដូចដែលសម្ដេចតេជោ ហ៊ុន សែន បានមានប្រ​សាស​ន៍កន្លងមកហើយថា មិនជឿថា ប្រើសង្គ្រាមមកបញ្ចប់សង្គ្រាមបានទេ មធ្យោ​បាយល្អមានតែមួយគត់គឺ ការចចារគ្នា ដោយសន្តិវិធី”។ ​

គួរបញ្ជាក់ថា ថ្មីៗនេះសម្តេចនាយក​រដ្ឋមន្ត្រី​ ហ៊ុន សែន បានលើកឡើងថា ​​កង​ទ័ព​​រុស្ស៊ី មិនអាច​​​ផ្តួលរំលំអ៊ុយក្រែន​ និង​​បញ្ចប់​​សង្គ្រាម​​តាម​រយៈការ​​ប្រើ​ប្រាស់​​កម្លាំង​យោធា​បានទេ។​​​ ចំណែ​ក​​យោធារបស់អ៊ុយក្រែន ក៏មិនអាចកម្ទេចកម្លាំងយោធារបស់រុស្ស៉ីបានដែរ ពោល​គឺមិនអាចយកសង្គ្រាមបញ្ចប់សង្រ្គាមបាននោះទេ នៅសល់ច្រកចេញតែមួយគត់ គឺការចរចាដោះស្រាយដោយសន្តិវិធី៕

អត្ថបទ៖ កោះកែវ