ទូតចិនប្រកាសផ្ដល់ជំនួយ១០ម៉ឺនដុល្លារជួយដល់ជនភៀសសឹកកម្ពុជា

ឯកអគ្គរដ្ឋទូតចិនប្រចាំនៅរាជធានីភ្នំពេញ​ លោក វ៉ាង វិនពីន បានប្រកាសផ្ដល់ជំនួយជាថវិកា១០ម៉ឺនដុល្លារសម្រាប់ជួយដល់ជនភៀសសឹករបស់កម្ពុជា ដែលកំពុងស្នាក់នៅក្នុងជំរុំភៀសខ្លួន ក្នុងខេត្តឧត្តរមានជ័យ។

លោក វ៉ាង វិនពីន បានសរសេរលើបណ្ដាញសង្គមហ្វេសប៊ុករបស់លោក នាព្រឹកថ្ងៃទី២ ខែសីហានេះថា «ស្ថានទូតចិនប្រចាំកម្ពុជា នឹងផ្តល់ជំនួយចំនួន១០ម៉ឺនដុល្លារដល់ប្រជាពលរដ្ឋនៅទីតាំងជនភៀសខ្លួន នៅវត្តភ្នំថ្មកំបោរ ភូមិពោធិ៍ចាស់ ឃំបេង ស្រុកបន្ទាយឣំពិល ខេត្តឧត្តរមានជ័យ ដើម្បីជួយកែលំឣជីវភាពរស់នៅ»។

លោកឯកអគ្គរដ្ឋទូតចិន ក៏បានជូនពរដល់ប្រជាជនកម្ពុជាដែលជាជនរងគ្រោះដោយសង្រ្គាមឣាចត្រឡប់ទៅផ្ទះវិញឱ្យបានឆាប់ផងដែរ។

ការប្រកាសផ្ដល់ជំនួយនេះ បានធ្វើឡើងក្នុងពេលដែលលោក វ៉ាង វិនពីន បានចុះទៅមើលដោយផ្ទាល់ដល់ទីតាំងស្នាក់នៅរបស់ជនភៀសខ្លួនកម្ពុជា ដែលបានរត់គេចពីការវាយប្រហារដោយអាវុធពីសំណាក់យោធាថៃក្នុងការឈ្លានពានមកលើកម្ពុជា កន្លងមក។

ក្នុងដំណើរចុះពិនិត្យទីតាំងជនភៀសខ្លួននេះគឺត្រូវបានដឹកនាំដោយឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា ដែលមិនត្រឹមវត្តមានលោកឯកអគ្គរដ្ឋទូតចិនប៉ុណ្ណោះទេ ក៏មានវត្តមានអង្គទូត តំណាងអង្គការសហប្រជាជាតិ និងអង្គការអន្តរជាតិជាច្រើនទៀត បានចុះទៅកាន់តំបន់ព្រំដែន ក្នុងខេត្តឧត្តរមានជ័យ ដែលជាទិសសមរភូមិប្រយុទ្ធគ្នារវាងកម្ពុជា និងថៃ ក្នុងរយៈពេល៥ថ្ងៃកន្លងមក។

អ្នកនាំពាក្យក្រសួងការបរទេស លោក ជុំ សុន្ទរី បានថ្លែងឱ្យដឹងថា ដំណើរចុះពិនិត្យបញ្ហាតាមព្រំដែនរវាងកម្ពុជា និងថៃ ដែលដឹកនាំដោយប្រមុខការទូតកម្ពុជា លោកឧបនាយករដ្ឋមន្ត្រី ប្រាក់ សុខុន គឺបានប្រព្រឹត្តទៅក្នុងរយៈពេល២ថ្ងៃ នៅថ្ងៃទី១ ខែសីហា ម្សិលមិញ និងនៅថ្ងៃទី២ ខែសីហានេះ។

បើតាមអ្នកនាំពាក្យក្រសួងការបរទេស ដំណើរចុះពិនិត្យដោយមានការចូលរួមដោយអង្គទូត តំណាងអង្គការសហប្រជាជាតិ និងអង្គការអន្តរជាតិ នៅពេលនេះ គឺដើម្បីចុះត្រួតពិនិត្យតាមតំបន់រងផលប៉ះពាល់នៅខេត្តឧត្ដរមានជ័យ ដែលបង្កឡើងពីការវាយប្រហារដោយយោធាថៃ ពិសេសទីតាំងដែលយោធាថៃបានប្រើយន្តហោះ F-16 ទម្លាក់គ្រាប់បែកប្រភេទ MK-84 តែមិនទាន់ផ្ទុះនៅឡើយ និងទីតាំងភូមិដ្ឋាន វត្ត សាលា ដែលរងការខូចខាតដោយការទម្លាក់គ្រាប់នេះ។

ជាមួយគ្នានេះ ឧបនាយករដ្ឋមន្ត្រី ប្រាក់ សុខុន ក៏នឹងដឹកនាំអង្គទូត និងតំណាងអង្គការអន្តរជាតិ ដើម្បីចុះជួបសួរសុខទុក្ខ និងចែកអំណោយមួយចំនួនដល់កងទ័ពជួរមុខកម្ពុជា ដែលឈរជើងនៅសមរភូមិជួរមុខ ក្នុងខេត្តឧត្តរមានជ័យ ព្រមទាំងចុះសួរសុខទុក្ខជនភៀសសឹក៕

ដោយ៖ ធឿន វ៉ាន់សុង