ថវិកា១០ម៉ឺនដុល្លាររបស់ស្ថានទូតចិនបានប្រគល់ឱ្យអាជ្ញាធរខេត្តឧត្តរមានជ័យ ដើម្បីជួយជនភៀសសឹក

ស្ថានឯកអគ្គរដ្ឋទូតចិនប្រចាំនៅកម្ពុជា បានប្រគល់ជំនួយជាថវិកាចំនួន ១០ម៉ឺនដុល្លារ ដល់រដ្ឋបាលខេត្តឧត្តរមានជ័យ ដើម្បីជួយដល់ប្រជាពលរដ្ឋរងគ្រោះដោយសារបញ្ហាសង្គ្រាមនៅតំបន់ព្រំដែន ហើយកំពុងរស់នៅក្នុងជំរុំជនភៀសខ្លួន ពិសេសការស្ដារឡើងវិញនូវហេដ្ឋារចនាសម្ព័ន្ធដែលរងផលប៉ះពាល់ដោយគ្រាប់ផ្លោងរបស់យោធាថៃ។

ជំនួយនេះត្រូវបានតំណាងស្ថានទូតចិន ប្រគល់ឱ្យលោក មាន ចាន់យ៉ាដា អភិបាលខេត្តឧត្តរមានជ័យ នារសៀលថ្ងៃទី៦ ខែសីហា ឆ្នាំ២០២៥នេះ ដែលជាជំនួយមនុស្សធម៌ មានបំណងជួយដល់ការរៀបចំមណ្ឌលសុវត្ថិភាពជនភៀសសឹក និងជួសជុលផ្ទះប្រជាពលរដ្ឋ និងវត្តអារាម ដែលរងផលប៉ះពាល់ពីសង្គ្រាមឈ្លានពានរបស់កងទ័ពថៃមកលើកម្ពុជា។

ការផ្ដល់ជំនួយរបស់ស្ថានទូតចិនពេលនេះ គឺបានធ្វើឡើងតាមការសន្យារបស់ឯកអគ្គរដ្ឋទូតចិន លោក វ៉ាង វិនពីន ដែលបានប្រកាសថា ស្ថានទូតចិនប្រចាំកម្ពុជា នឹងផ្តល់ជំនួយដល់ប្រជាពលរដ្ឋនៅទីតាំងជនភៀសខ្លួន ដើម្បីជួយលើកស្ទួយជីវភាពរស់នៅរបស់ប្រជាពលរដ្ឋដែលបានរងគ្រោះដោយសារបញ្ហាសង្គ្រាមនៅតំបន់ព្រំដែន បន្ទាប់ពីលោក វ៉ាង វិនពីន បានចុះទៅមើលដោយផ្ទាល់ដល់ទីតាំងស្នាក់របស់ជនភៀសសឹកកម្ពុជា ដែលបានរត់គេចពីការវាយប្រហារដោយអាវុធពីសំណាក់យោធាថៃក្នុងការឈ្លានពានមកលើកម្ពុជា កន្លងមក។

អភិបាលខេត្តឧត្តរមានជ័យ លោក មាន ចាន់យ់ាដា បានអរគុណចំពោះលោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា ដែលបានផ្ដល់ជំនួយមនុស្សធម៌ចំនួន១០ម៉ឺនដុល្លារអាមេរិកនេះ ដល់ជនភៀសខ្លួននៅក្នុងខេត្តឧត្តរមានជ័យ។

ការផ្ដល់ជំនួយរបស់ស្ថានទូតចិន ត្រូវបានគេមើលឃើញថា មិនត្រឹមជាក្ដីអាណិតអាសូរចំពោះជនភៀសសឹកប៉ុណ្ណោះទេ ប៉ុន្តែបង្ហាញពីមិត្តភាពរឹងមាំរវាងប្រជាជនចិន និងប្រជាជនកម្ពុជា ដែលតែងតែឈរជើងគាំទ្រនៅពេលមានស្ថានភាពការលំបាក៕

ដោយ៖ ធឿន វ៉ាន់សុង