ព័ត៌មានជាតិ

រដ្ឋមន្ត្រីការបរទេសកម្ពុជា ជំរុញឲ្យគណៈកម្មការចម្រុះព្រំដែនកម្ពុជា-ឡាវ ពន្លឿនការចរចាដោះស្រាយបញ្ហាខ្សែព្រំដែនដែលនៅសេសសល់

បានផុស

៤ years មុន

នៅ

ថ្ងៃសុក្រ ២២ មេសា ២០២២

ដោយ

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា បានលើកទឹកចិត្តឲ្យគណៈកម្មការចម្រុះកិច្ចការព្រំដែន (JBC) កម្ពុជា-ឡាវ ពន្លឿនការចរចារ ដើម្បីដោះស្រាយបញ្ហាខ្សែព្រំដែនពុំទាន់ខណ្ឌសីមា ដែលនៅសេសសល់ចំនួន១៤ ភាគរយ តាមការឯកភាពរវាងថ្នាក់ដឹកនាំប្រទេសទាំងពីរកាលពីខែវិច្ឆិកា ឆ្នាំ២០២១ កន្លងទៅ និងការពិភាក្សាលើសេចក្តីព្រាងសន្ធិសញ្ញាកំណត់ព្រំដែនរវាងប្រទេសទាំងពីរចំពោះខ្សែបន្ទាត់ព្រំដែន ដែលបានឯកភាពគ្នារួចហើយចំនួន៨៦ ភាគរយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញរបស់ប្រមុខកាទូតកម្ពុជា បានធ្វើឡើងខណៈលោកអនុញ្ញាតិឲ្យលោក បួរកែវ ភូមិវង្សសៃ (Buakeo Phumvongsay) ឯកអគ្គរដ្ឋទូតថ្មីឡាវប្រចាំកម្ពុជា ចូលជួបសម្តែងការគួរសម នៅទីស្តីការក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី២២ ខែមេសា ឆ្នាំ២០២២នេះ។

នៅក្នុងជំនួបនោះ លោកឧបនាយករដ្ឋមន្ត្រី ប្រាក់ សុខុន បានគូសបញ្ជាក់អំពីទំនាក់ទំនងដ៏ជិតស្និទ្ធរវាងប្រទេសទាំងពីរកម្ពុជា-ឡាវ ក្រោមស្មារតីភាពជាអ្នកជិតខាងល្អ សាមគ្គីភាពជាភាតរៈ និងភាពជាដៃគូយុទ្ធសាស្ត្រយូរអង្វែង និងគ្រប់ជ្រុងជ្រោយ និងបានលើកទឹកចិត្តឱ្យជំរុញបន្ថែមទៀត នូវកិច្ចសហប្រតិបត្តិការល្អប្រសើរលើគ្រប់វិស័យ រួមមាន ពាណិជ្ជកម្ម វិនិយោគ អប់រំ ទេសចរណ៍ ការតភ្ជាប់ និងទំនាក់ទំនងរវាងប្រជាជន និងប្រជាជន។ លោកក៏បានរំលឹកឡើងវិញផងដែរ អំពីការប្រារព្ធខួបអនុស្សាវរីយ៍លើកទី៦៥ នៃការបង្កើតទំនាក់ទំនងការទូត កាលពីឆ្នាំ២០២១ និងដំណើរទស្សនកិច្ចផ្លូវការប្រកបដោយជោគជ័យរបស់នាយករដ្ឋមន្ត្រីឡាវ លោក ផនខាំ វីផាវ៉ាន់ និងរដ្ឋមន្ត្រីការបរទេស សាលើមសៃ គុំម៉ាស៊ីត មកកាន់កម្ពុជា នាពេលកន្លងមក ដែលបានរួមចំណែកយ៉ាងសំខាន់ក្នុងការលើកស្ទួយទំនាក់ទំនងទ្វេភាគី។

លោក Buakeo Phumvongsay បានពាំនាំនូវការថ្លែងអំណរគុណដ៏ជ្រាលជ្រៅរបស់រដ្ឋាភិបាល និងប្រជាជន ឡាវ ជូនចំពោះរាជរដ្ឋាភិបាល និងប្រជាជនកម្ពុជា ដែលបានផ្តល់វ៉ាក់សាំងចំនួន៧០០.០០០ ដូស សម្ភារៈពេទ្យ រថយន្ត និងថវិកា សម្រាប់ការប្រយុទ្ធប្រឆាំងនឹងជំងឺកូវីដ-១៩។ លោកឯកអគ្គរដ្ឋទូត ក៏បានវាយតម្លៃខ្ពស់ចំពោះការខិតខំរបស់កម្ពុជាក្នុងនាមជាប្រធានអាស៊ាន ក្នុងការស្វែងរកដំណោះស្រាយចំពោះវិបត្តិនៅមីយ៉ាន់ម៉ា និងបានគូសបញ្ជាក់ពីការគាំទ្ររបស់ឡាវចំពោះការខិតខំនេះ។

លោកឧបនាយករដ្ឋមន្ត្រី ប្រាក់ សុខុន និងលោកឯកអគ្គរដ្ឋទូត ក៏បានពិភាក្សាគ្នាផងដែរ អំពីការត្រៀមរៀបចំកិច្ចប្រជុំរបស់គណៈកម្មការចម្រុះកម្ពុជា-ឡាវ ស្តីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកវិទ្យា (JCBC) ដែលគ្រោងធ្វើនៅរាជធានីភ្នំពេញ ក្នុងខែកក្កដា ខាងមុខនេះ៕

ដោយ ៖ កោះកែវ

Related Topics:

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា