មន្ត្រីសង្គមកិច្ច៖ អំពើហិង្សាយេនឌ័រ គឺជាការរំលោភបំពានលើសិទ្ធិមនុស្ស

មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា អំពើហិង្សាទាក់ទងយេនឌ័រ គឺជាការរំលោភបំពានលើសិទ្ធិមនុស្សហើយមានផលប៉ះពាល់ដល់ភាពថ្លៃថ្នូរ និងអាយុជីវិតរបស់ជនរងគ្រោះ។

ថ្លែងបើកវគ្គបណ្ដុះបណ្ដាលបទដ្ឋានអប្បបរមាសម្រាប់ការប្រឹក្សាយោបល់ជាមូលដ្ឋានដល់ស្រ្តី និងក្មេងស្រីជារងគ្រោះដោយសារអំពើហិង្សាទាក់ទងនឹងយេនឌ័រ និងក្នុងការគ្រប់គ្រងភាពតានតឹងនៅសណ្ឋាគារ សាន់វ៉េ នៅព្រឹកថ្ងៃទី២៤​ ខែឧសភានេះ លោក ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការបានមានប្រសាសន៍ថា អំពើហិង្សាយេនឌ័រ គឺជាអំពើហិង្សាដែលបង្កឡើងលើជនណាម្នាក់ដោយសារតែយេនឌ័ររបស់ពួកគេរួមបញ្ចូលទាំងទង្វើហិង្សាដែលបង្កឲ្យជនរងគ្រោះទទួលគ្រោះថ្នាក់ផ្នែករាងកាយ
ផ្លូវភេទ និងផ្លូវចិត្ត។

លោករដ្ឋលេខាធិការបានបន្តថា «យើងទាំងអស់គ្នាដឹងហើយថា អំពើហិង្សាទាក់ទងយេនឌ័រគឺជាការរំលោភបំពានលើសិទ្ធិមនុស្សហើយមានផលប៉ះពាល់ដល់ភាពថ្លៃថ្នូរនិងអាយុជីវិតរបស់ជនរងគ្រោះ»។ លោករដ្ឋលេខាធិការបានបន្តទៀតថា ក្នុងន័យនេះការយល់ដឹងឱ្យកាន់តែស៊ីជម្រៅអំពីដំណើរការ និងកត្តាកៀគរសហគមន៍ដើម្បីទប់ស្កាត់អំពើហិង្សាលើស្ត្រីនិងក្មេងស្រីមានពិការភាពទាន់ពេលវេលាគឺជាតម្រូវការចាំបាច់បំផុតព្រោះថាគ្រួសារនិងសហគមន៍ដែលរងផលប៉ះពាល់ដោយអំពើហិង្សាត្រូវបានបាត់បង់អត្ថប្រយោជន៍ជាច្រើនពិសេសទាក់ទិននឹងទំនាក់ទំនងគ្រួសារ។

លោករដ្ឋលេខាធិការបានបន្ថែមទៀតថាដូចនេះការបង្កើនទំនុកចិត្តលើខ្លួនឯងសម្រាប់ស្ត្រីនិងក្មេងស្រីមានពិការភាពដែលរងគ្រោះដោយអំពើហិង្សា ភាពរួបរួមក្នុងគ្រួសារ និងការជឿទុកចិត្ត គឺជាកាលានុវត្តភាពដែលធ្វើឱ្យប្រសើរឡើងនូវការបង្កើនការចូលរួមជីវិតក្នុងសហគមន៍ប្រកបដោយ វឌ្ឍនភាពនិងការអភិវឌ្ឍសហគមន៍។

លោក ខុនន័រ ហ្វយ លេខាទី២នៃស្ថានទួតអូស្ត្រាលីប្រចាំនៅកម្ពុជាបានមានប្រសាសន៍ឱ្យដឹងដែរថាស្ត្រីពិការមានលទ្ធភាពទទួលរងអំពើហិង្សាច្រើនជាងស្ត្រីដែលគ្មានពិការភាពដល់ទៅបីដងហើយពួកគេភាគច្រើនមិនបានស្វែងរកការគាំទ្រ ឬរាយការណ៍ករណីរំលោភបំពានដោយសារបញ្ហាប្រឈមដូចជា ខ្វះទំនុកចិត្តលើខ្លួនឯងខ្វះការគាំទ្រពីសមាជិកគ្រួសារ ឬសមាជិកសហគមន៍កង្វះព័ត៌មានអំពីសេវាកម្មដែលមាន ឬកង្វះលទ្ធភាពប្រើប្រាស់សេវាទាំងនេះ។

លោកបានបន្តថា នៅពេលដែលការងាររបស់អ្នកផ្តោតលើពិការភាពអ្នកអាចជួបប្រទះស្ថានភាពរបស់ស្ត្រីរងគ្រោះដោយអំពើហិង្សា។ ភាគច្រើនមិនមែនជាតួនាទីរបស់អ្នកក្នុងការគ្រប់គ្រងបញ្ហាទាំងនេះទេប៉ុន្តែវគ្គបណ្តុះបណ្តាលនេះអាចជួយអ្នកក្នុងការកំណត់បញ្ហាដែលពួកគេប្រឈមមុខព្រោះវាច្រើនតែមិនបានកត់សម្គាល់។ អាចស្តាប់បញ្ហារបស់ពួកគេដោយមិនវិនិច្ឆ័យ និងគោរពសិទ្ធិឯកជន និងសិទ្ធិរបស់ពួកគេនិងណែនាំពួកគេទៅកាន់អ្នកផ្តល់សេវាដែលពាក់ព័ន្ធ។លេខាទី២ស្ថាន​ទួតអូស្ត្រាលីបានបញ្ជាក់ថាវគ្គបណ្តុះបណ្តាលនេះ គឺជាឱកាសដ៏ល្អមួយដើម្បីចែករំលែក និងស្វែងយល់ពី​គ្នាទៅវិញទៅមកអំពីភាពជោគជ័យ និងបញ្ហាប្រឈមក្នុងការធ្វើការជាមួយស្ត្រី និងកុមារីដែលមានពិការភាពហើយលោកជឿថាការរៀនសូត្រចាប់ពីបីថ្ងៃខាងមុខនេះ នឹងជម្រុញសកម្មភាពជាក់ស្តែងដែលអ្នកអាចអនុវត្តក្នុងការងាររបស់អ្នក៕

អត្ថបទ៖ សំអឿន