អន្តរក្រសួង កំពុងរៀបចំគោលនយោបាយជួយដល់ជនងាយរងគ្រោះ និងទារកកំព្រា

អន្តរក្រសួង កំពុងរៀបចំសេចក្តីព្រាងអនុក្រឹត្យ ដើម្បីជួយដល់ជនងាយរងគ្រោះ ទារកកំព្រា កុមារកំព្រា កុមាររស់នៅក្នុងគ្រួសារទីទាល់ក្រ ឬមានពិការភាព ឬកូនតាមម្តាយនៅក្នុងពន្ធនាគារ ជនវិបល្លាសស្មារតី និងជនរងគ្រោះដោយសារធាតុញៀនខុសនឹងច្បាប់ជាដើម។

នៅថ្ងៃទី ០៦ ខែកុម្ភៈ ឆ្នាំ ២០២៥ អន្តរក្រសួង ដែលដឹកនាំដោយលោក ប្រាក់ សុខយូរ រដ្ឋលេខាធិការប្រចាំការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានដឹកនាំកិច្ចប្រជុំពិគ្រោះយោបល់អន្តរក្រសួង លើសេចក្តីព្រាងអនុក្រឹត្យស្តីពី «របបគោលនយោបាយចំពោះជនរងគ្រោះនិងងាយរងគ្រោះស្នាក់នៅមជ្ឈមណ្ឌលរបស់រដ្ឋ និងមុខសញ្ញាដែលបានធ្វើសមាហរណកម្មពីមជ្ឈមណ្ឌលរបស់រដ្ឋស្ថិតនៅក្នុងដំណើរការគ្រប់គ្រងករណី» ។ អន្តរក្រសួងរួមមានតំណាងក្រសួងសេដ្ឋកិច្ច និងហិរញ្ញវត្ថុ ក្រសួងមុខងារសាធារណៈ អគ្គនាយកនៃអគ្គនាយកដ្ឋានគោលនយោបាយសង្គមកិច្ច អគ្គលេខាធិការដ្ឋានក្រុមប្រឹក្សាជាតិគាំពារសង្គម និងមន្ដ្រីពាក់ព័ន្ធ។

កិច្ចប្រជុំនេះត្រូវបានរៀបចំឡើង ដើម្បីប្រមូលធាតុសំខាន់ៗពីតួអង្គពាក់ព័ន្ធសម្រាប់បញ្ចូលក្នុងសេចក្តីព្រាង​ ធ្វើយ៉ាងណាឱ្យការអនុវត្តទទួលបានលទ្ធផល និងមានប្រសិទ្ធភាព។

សេចក្ដីព្រាងអនុក្រឹត្យស្ដីពីរបបគោលនយោបាយចំពោះជនរងគ្រោះ និងងាយរងគ្រោះស្នាក់នៅមជ្ឈមណ្ឌលរបស់រដ្ឋ និងមុខសញ្ញាដែលបានធ្វើសមាហរណកម្មពីមជ្ឈមណ្ឌលរបស់រដ្ឋស្ថិតនៅក្នុងដំណើរការគ្រប់គ្រងករណីនេះ មានវិសាលភាពអនុវត្តចំពោះមជ្ឈមណ្ឌលរបស់រដ្ឋ និងមុខសញ្ញាដែលបានធ្វើសមាហរណកម្ម ចេញពីមជ្ឈមណ្ឌលរបស់រដ្ឋស្ថិតនៅក្នុងដំណើរការគ្រប់គ្រងករណីជនរងគ្រោះ និងងាយរងគ្រោះទាំងឡាយ។

ក្នុងអនុក្រឹត្យនេះសំដៅដល់ ទារកកំព្រា កុមារកំព្រា កុមាររស់នៅក្នុងគ្រួសារទីទាល់ក្រ ឬមានពិការភាព ឬកូនតាមម្តាយនៅក្នុងពន្ធនាគារ អនីតិជនទំនាស់នឹងច្បាប់ ជនវិបល្លាសស្មារតី ជនរងគ្រោះដោយសារធាតុញៀនខុសនឹងច្បាប់ ជនរងគ្រោះដោយសារការជួញដូរមនុស្ស អំពើធ្វើអាជីវកម្មផ្លូវភេទ ការកេងប្រវ័ញ្ច និងគ្រប់ទម្រង់ផ្សេងៗក្នុងការរំលោភបំពាន ជនមានពិការភាព ជនអនាថា អ្នកផ្ទុកមេរោគអេដស៍និងជំងឺអេដស៍ និងជនចាស់ជរាគ្មានទីពឹង ដែលស្នាក់នៅក្នុងមជ្ឈមណ្ឌលរបស់រដ្ឋ ។

អញ្ជើញជាអធិបតីចូលរួម បិទសន្និបាតបូកសរុបការងារក្រសួងសង្គមកិច្ច កាលពីខែកុម្ភៈ ឆ្នាំ ២០២៤
សម្តេចធិបតី ហ៊ុន ម៉ាណែត លើកទឹកចិត្តដល់ក្រសួង សិក្សា រៀបចំកម្មវិធីស្ពានចម្លងសេវាសង្គមដល់គ្រួសារក្រីក្រ ជាពិសេស គ្រួសារដែលមានកុមារកំព្រា កុមារដែលត្រូវបានបោះបង់ចោល មនុស្សវ័យចាស់គ្មានទីពឹង ជនមានពិការភាព ជនអនាថា និងអ្នកញៀនគ្រឿងញៀនជាដើម៕