លោក កឹម សុខា សរសេរលិខិត​ស្នើ​បណ្តាប្រទេសសំបូរធនធាន ជួយផ្តល់វ៉ាក់សាំងប្រឆាំង​កូវីដ​១៩ ដល់កម្ពុជា

លោក កឹម សុខា បានសរសេរលិខិតទៅកាន់រដ្ឋាភិបាលនៃបណ្តាប្រទេសសំបូរ​ធនធាន​ ដើម្បីជួយផ្តល់វ៉ាក់សាំងប្រឆាំងជំងឺកូវីដ១៩ ដើម្បីចាក់ជូនប្រជាពលរដ្ឋកម្ពុជា​ដោយឥតគិតថ្លៃ។

ការបញ្ជាក់របស់លោក កឹម សុខា បានធ្វើឡើងក្រោយពីលោកបានជួបពិភាក្សាជាមួយលោក Pablo Kang ឯកអគ្គរាជទូតអូស្ត្រាលីប្រចាំនៅព្រះរាជាណាចក្រកម្ពុជា កាលពីរសៀលថ្ងៃទី១៨ ខែធ្នូ នៅគេហដ្ឋានរបស់លោក នាខណ្ឌទួលគោក រាជធានីភ្នំពេញ។

លោក មុត ចន្ថា មន្ត្រីជំនិតរបស់លោក កឹម សុខា បានឲ្យដឹងថា ក្នុងជំនួបនេះ ក្រៅពីសួរសុខទុក្ខ ភាគីទាំង២ បានផ្លាស់ប្តូរទស្សនៈ និងព័ត៌មានជុំវិញស្ថានភាពសិទ្ធិមនុស្ស ប្រជាធិបតេយ្យ សេដ្ឋកិច្ច និងបញ្ហាមួយចំនួនទៀត។​ ជាមួយគ្នានេះ ក៏បានពិភាក្សាផ្តោតលើបញ្ហាវ៉ាក់សាំងប្រឆាំងនឹងកូវីដ-១៩ ផងដែរ។

តាមរយៈលោក មុត ចន្ថា លោក កឹម សុខា បានអះអាងថា “ខ្ញុំបានសរសេរលិខិត ផ្ញើទៅរដ្ឋាភិបាលនៃប្រទេសខ្លះ​ និងជួបផ្ទាល់ជាមួយឯកអគ្គរដ្ឋទូតតំណាងប្រទេសមួយចំនួន ស្នើសុំឲ្យប្រទេសអ្នកមានធនធានច្រើនទាំងនោះ​ ជួយផ្តល់នូវវ៉ាក់សាំងប្រឆាំងកូវីដ-១៩​ ចាក់ជូនដល់ប្រជាពលរដ្ឋខ្មែរ។ តាមរយៈជំនួបការទូតទាំងនេះ ខ្ញុំក៏បានដឹងថាប្រទេសមួយចំនួន មានគម្រោងជួយដល់ប្រជាពលរដ្ឋខ្មែរតាមរយៈស្ថាប័នអន្តរជាតិពហុភាគី និងខ្លះទៀតអនុវត្តតាមកម្មវិធីជំនួយបច្ចេកទេសខាងសុខាភិបាលនៅប្រទេសកម្ពុជា ដូចជាប្រទេសអូស្រ្តាលីជាដើម”។

បើតាមលោក មុត ចន្ថា ក្នុងរយៈពេលដែលស្ថានភាពជំងឺកូវីដ-១៩​ រាលដាលក្នុងសហគមន៍នៅក្នុងប្រទេសនេះ លោកមិនបានទៅមូលដ្ឋាន ដើម្បីជួបជាមួយដល់ប្រជាពលរដ្ឋទេ ហើយនៅសប្តាហ៍ក្រោយៗ លោកនឹងមានកម្មវិធីជួបជាមួយឯកអគ្គរាជទូត ឯកអគ្គរដ្ឋទូតមួយចំនួនទៀត ដែលតែងតែរក្សាទំនាក់ទំនងល្អ ក្នុងការផ្លាស់ប្តូរយោបល់ និងស្វែងយល់ពីទស្សនៈរបស់លោក ជុំវិញកិច្ចសហប្រតិ បត្តិការ ដែលផ្តល់ផលប្រយោជន៍ដល់ប្រជាពលរដ្ឋខ្មែរ និងប្រទេសកម្ពុជា៕

អត្ថបទ៖ កោះកែវ