សម្ដេច​តេជោ​ ហ៊ុន សែន​ ឱ្យ​សិក្សា​បូមស្ដារ​ដីល្បាប់​ចេញ​ពីបឹងទន្លេសាប​ដើម្បី​អភិរក្សពូជត្រី

សម្ដេចតេជោ​ ហ៊ុន សែន​ នាយករដ្ឋមន្ត្រីកម្ពុជា​ នៅថ្ងៃទី ២៧ ​ខែឧសភា​នេះ​បាន​ថ្លែង​ស្នើឱ្យ​អាជ្ញាធរ​បឹងទន្លេសាប​ សហការជា​មួយក្រសួងធនធានទឹក​ និងក្រសួងកសិកម្ម​ សិក្សា​ទីតាំងបូមស្ដារ​បឹង​ទន្លេសាប ​ខណៈដីល្បាប់​ និងស្លឹកឈើ ​បាន​ហូរ​ចូល​ទៅក្នុងបឹង​ទន្លេសាប​ជារៀងរាល់ឆ្នាំ​ធ្វើឱ្យទន្លេសាបកាន់តែគោករាក់។

សម្ដេចតេជោ ហ៊ុន សែន មានប្រសាសន៍ថា ការគោករាក់ដោយដីល្បាប់ ធ្វើឱ្យកម្ដៅទឹកកើនឡើង ដែលជាបញ្ហាដល់ការអភិរក្សពូជន៍ត្រី។ ហើយដើម្បីធានាថា តើយើងរក្សាពូជត្រីបែបណានៅក្នុងបឹងទន្លេសាបចាំបាច់​ត្រូវកំណត់ទីតាំង ដើម្បីយើងរកទុន​សម្រាប់ជួយទៅលើការបូមស្ដារនៅក្នុងតំបន់នោះ​ឱ្យមានជម្រៅទឹកជ្រៅ​ ហើយធានាថា នៅក្នុងរដូវប្រាំង ត្រីអាចមានលទ្ធភាពចូលទៅក្នុងតំបន់នោះ​សម្រាប់ការរស់រាន។

សម្ដេចតេជោណែនាំសំដៅដល់ក្រសួងកសិកម្មជាពិសេសត្រូវដឹងថា តើតំបន់ណាដែលត្រូវអភិរក្សពូជត្រី ហើយចាំបាច់ត្រូវបូមស្ដារ ក្នុងជម្រៅប៉ុន្មានម៉ែត្រ និងទំហំប៉ុន្មានហិកតា ដោយត្រូវលើកក្នុងគម្រោងដើម្បីដាក់ចូលទៅក្នុងថវិការជាតិ​ សម្រាប់ការបូមស្ដារ ឬក្រសួងប្រគល់កិច្ចការនេះទៅឱ្យអាជ្ញាធរថ្នាក់ក្រោមជាតិជាអ្នកធ្វើ។

សម្ដេចតេជោ ហ៊ុន សែន ក៏ណែនាំថា ពេលបូមស្ដារដីល្បាប់ក្នុងបឹងទន្លេសាបបានហើយនោះ អាចយកទៅធ្វើជាជី ឬយ៉ាងណានោះ ត្រូវសិក្សាឱ្យបានច្បាស់លាស់ ព្រោះដីបឹងទន្លេសាប គឺជាដីល្បាប់ដែលមានជីជាតិ។ ម្យ៉ាងទៀត ក៏អាចសហការជាមួយវិស័យឯកជន សិក្សាកែច្នៃដីល្បាប់នេះ យកមកធ្វើជាជីធម្មជាតិសម្រាប់បង្កបង្កើនផល ក្នុងវិស័យកសិកម្ម៕