ព័ត៌មានជាតិ
ជិត ១០ ឆ្នាំទៀត កម្ពុជាគ្រោងលុបបំបាត់ ជំងឺហង់សិន ឬជំងឺឃ្លង់ ឱ្យអស់
ប្រទេសកម្ពុជាបាន និងកំពុងរៀបចំឯកសារផែនទីបង្ហាញផ្លូវ និងផែនការសកម្មភាពឆ្នាំ២០២២ ដល់ឆ្នាំ២០៣០ ដើម្បីកាត់ផ្ដាច់ការចម្លងជំងឺហង់សិន ឬជំងឺឃ្លង់ នៅតាមសហគមន៍ក៏ដូចជាឈានទៅលុបបំបាត់ជំងឺនេះឱ្យអស់ទាំងស្រុងពីប្រទេសកម្ពុជា នាឆ្នាំ២០៣០ ខាងមុខ។
ថ្លែងក្នុងពិធីបើកកិច្ចប្រជុំដៃគូម្ចាស់ជំនួយស្ដីពី ផែនទីបង្ហាញផ្លូវ និងផែនការសកម្មភាពជំងឺហង់សិន ឆ្នាំ២០២២ ដល់ឆ្នាំ២០៣០ នៅព្រឹកថ្ងៃទី២១ ខែមិថុនានេះ លោកវេជ្ជបណ្ឌិត ហួត ចាន់យូដា ប្រធាន មជ្ឈមណ្ឌលជាតិកម្ចាត់រោគរបេង និងហង់សិន បានឱ្យដឹងថា ឯកសារផែនទីបង្ហាញផ្លូវ និងផែនការសកម្មភាពរបស់កម្ពុជាឆ្នាំ២០២២ ដល់២០៣០នេះមានសារៈសំខាន់ណាស់ ព្រោះជាឯកសារគំរូដែលត្រូវយកទៅអនុវត្តនៅប្រទេសនានាដែលមានអត្រាប្រឡង់ជំងឺហង់សិនទាបដូចប្រទេសកម្ពុជា ហើយជាឯកសារចាំបាច់សម្រាប់កម្មវិធីជាតិ ដើម្បីសុំការគាំទ្រពីក្រសួងសុខាភិបាល អង្គការជាតិ និងអន្តរជាតិនានា ដើម្បីដំណើរការគំរោងនេះឈានទៅបំបាត់ជំងឺហង់សិនពីប្រទេសកម្ពុជានាពេលអនាគត។
លោកវេជ្ជបណ្ឌិតបានបន្តថា ជំងឺហង់សិននៅកម្ពុជាបានបន្តធ្លាក់ចុះជាបន្តបន្ទាប់ ពោលគឺធ្លាក់ចុះពី ១២៧ ករណីនៅឆ្នាំ២០១៩ មកនៅ ៥៥ ករណីនៅឆ្នាំ២០២០ និង ៣៥ ករណីនៅឆ្នាំ២០២១ ព្រមទាំងធ្លាក់ចុះមកនៅ ១២ ករណីនៅត្រឹមត្រីមាសទី១ ឆ្នាំ២០២២នេះ។
លោកវេជ្ជបណ្ឌិត ឡាយ សម្បត្តិ អនុប្រធាន មជ្ឈមណ្ឌលជាតិកម្ចាត់រោគរបេង និងហង់សិន និងជាប្រធានកម្មវិធីជាតិកម្ចាត់ជំងឺរបេង និងហង់សិន បានឱ្យដឹងថា តាមផែនការចាប់ពីឆ្នាំ២០២២ ដល់២០២៥ ធ្វើយ៉ាងម៉េចឱ្យអ្នកជំងឺហង់សិនចុះថយ នៅក្រោម ១០០ នាក់ក្នុង១ឆ្នាំ និងអស់អ្នកជំងឺថ្មីរហូតដល់ឆ្នាំ២០២៩ ខាងមុខ។
លោកវេជ្ជបណ្ឌិតបានបន្តទៀតថា ការកាត់បន្ថយ និងឈានទៅលុបបំបាត់ជំងឺហង់សិននេះ ដោយសារយើងមានផែនទីបង្ហាញផ្លូវមួយច្បាស់លាស់ ដោយចាប់ពី២០២២ ដល់ឆ្នាំ២០៣០ គឺគ្រប់មណ្ឌលសុខភាពទាំងអស់ត្រូវព្យាបាលអ្នកជំងឺហង់សិនថ្មី ហើយគ្រប់អ្នកពិការភាពទាំងអស់ត្រូវទទួលបានសេវាព្យាបាលផងដែរ ពោលគឺធ្វើយ៉ាងណាឱ្យអត្រាប្រេវ៉ាឡង់ចុះក្រោម១ លើ១លាននាក់នៅ ឆ្នាំ២០៣០។
លោកវេជ្ជបណ្ឌិត បានបន្ថែមថា ប្រទេសកម្ពុជាជាប្រទេសមួយឈានមុខគេនៅតំបន់អាស៊ាន ដែលមានឯកសារផែនទីបង្ហាញផ្លូវសម្រាប់លុបបំបាត់ជំងឺហង់សិននេះ។
លោកសាស្ត្រាចារ្យ ស៊ា ហួង រដ្ឋលេខាធិការ ក្រសួងសុខាភិបាលបានថ្លែងថា ក្រសួងសូមគាំទ្រផែនទីបង្ហាញផ្លូវ និងផែនការសកម្មភាពជំងឺហង់សិន ឆ្នាំ២០២២ ដល់ឆ្នាំ២០៣០ ដែលតាក់តែងរៀបចំដោយមជ្ឈមណ្ឌលជាតិកំចាត់ជំងឺរបេង និងហង់សិន សហការជាមួយដៃគូសំដៅកាត់ផ្ដាច់ការចម្លងជំងឺនេះតាមសហគមន៍ ព្រមទាំងឈានទៅលុបបំបាត់ជំងឺនេះឱ្យអស់ពីប្រទេសកម្ពុជានៅឆ្នាំ២០២៣ ខាងមុខ។
លោករដ្ឋលេខាធិការបានបញ្ជាក់ថា ដើម្បីកុំឱ្យជាឧបសគ្គក្នុងការឈានទៅសម្រេចតាមផែនការ មន្ត្រីកម្មវិធីជាតិត្រូវបង្កើនការអប់រំផ្សព្វផ្សាយសំដៅធ្វើយ៉ាងណាឱ្យប្រជាពលរដ្ឋនៅតាមសហគមន៍បានដឹងថា ជំងឺហង់សិន ឬជំងឺឃ្លង់នេះមិនមែនជាជំងឺតពូជនោះទេ វាជាជំងឺឆ្លងប៉ុណ្ណោះ និងកុំមានការរើសអើងចំពោះអ្នកជំងឺ។
លោកវេជ្ជបណ្ឌិត ឡាយ សម្បត្តិ បានណែនាំថា ប្រសិនប្រជាពលរដ្ឋមានស្នាកស្នាមនៅលើស្បែក ហើយមានស្ពឹកនៅលើស្នាមនោះ សូមប្រញាប់ទៅមណ្ឌលសុខភាពដែលនៅជិតបំផុត ដើម្បីទទួលបានការពិនិត្យ និងព្យាបាល ហើយរាល់ការព្យាបាលគឺមិនគិតថ្លៃឡើយ៕
អត្ថបទ៖ សំអឿន
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
កីឡា២ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត