បង្គោលព្រំដែនកម្ពុជា-វៀតណាម​មួយដើម​ប្រឈម​ធ្លាក់ចូលទឹកអូរ​ក្រោយភ្លៀង​ធ្លាក់ច្រើនថ្ងៃ​

បង្គោលព្រំដែនកម្ពុជា-វៀតណាមមួយដើមស្ថិតនៅស្រុកកែវសីមា ខេត្តមណ្ឌលគិរី ប្រឈមនឹងការធ្លាក់ចូលក្នុងទឹកអូរ បន្ទាប់ពីមានភ្លៀងធ្លាក់ច្រើនថ្ងៃ។

លោក នួន សារ៉ន អភិបាលស្រុកកែវសីមា ខេត្តមណ្ឌលគិរី​បានឲ្យដឹងនៅល្ងាចថ្ងៃទី ១០ ខែកក្កដា ឆ្នាំ ២០២២ថា​ ក្រោយទទួល​ព័ត៌មាននេះ លោកបានដឹកនាំកម្លាំងការពារព្រំដែនស្រុកចុះពិនិត្យឃើញថា ទឹកអូរបានជន់​ឡើងខ្លាំងបណ្តាលឲ្យបាក់ដីមាត់ច្រាំងខាងកម្ពុជា ហើយជិតដល់បង្គោលព្រំដែនដែលបានបោះរួច។

​លោកអភិបាលស្រុកបន្តថា បច្ចុប្បន្នលោកបានរាយការណ៍ជូនដល់អាជ្ញាធរខេត្តរួច​រាល់ហើយជាប៉ុណ្ណោះអាសន្ន លោកបានចាត់ក្រុមការងារឱ្យយកខ្សែទាក់ចង​បង្គោល​កុំឲ្យធ្លាក់​ចូលទឹកអូរ។ ប៉ុន្តែរហូតដល់ពេលនេះ ក្រុមការងារមិនទាន់អាចចូលទៅតំបន់នោះបានទេ ព្រោះ​មេឃ​នៅធ្លាក់ភ្លៀងខ្លាំង ម្យ៉ាងទីតាំងនោះស្ថិតនៅចំណោតភ្នំខ្ពស់ៗ ព្រៃ គ្មានផ្លូវចូលដល់ទេ។

ចំណុច​បង្គោលលេខ ៦០/៣៨(១)​ចំណុច UTM72079,1340735 ស្ថិតលើព្រំដែនគោកអូរហ៊ុច ព្រំប្រទល់​ប្រទេស​កម្ពុជា-វៀតណាម។ បង្គោលលេខ៦០នេះ កំពុងរងផល​ប៉ះពាល់ខ្លាំង ដោយជំនន់ទឹកភ្លៀងធ្វើឲ្យបាក់ដីហូរច្រោះខ្វះតែ ០,៤០ម៉ែត្រទៀត​និងដល់បង្គោលហើយ៕