សាស្រ្តាចារ្យប្រវត្តិវិទ្យា លោក សំបូរ ម៉ាណារ៉ា ​ប្រាប់​​ពី​បុគ្គលិកលក្ខណៈ​អ្នក​បង្កើត​មនោគមវិជ្ជា

សាស្រ្តាចារ្យប្រវត្តិវិទ្យា លោក សំបូរ ម៉ាណារ៉ា បានគូសបញ្ជាក់ថា អ្នកដែលបង្កើតមនោគមវិជ្ជា គួរតែអ្នកដែលបានបំពេញកាតព្វកិច្ចដើម្បីសង្គមជាតិ មិនគិតពីផលប្រយោជន៍ផ្ទាល់ខ្លួន នោះជាមនោគមវិជ្ជារីកចម្រើន គូរជាទីគោរព ជាមហាវីរភាព​សម្រាប់​ជាតិ។

ផ្តល់​បទ​សម្ភាសដល់​កម្ពុជាថ្មី លោកសាស្រ្តាចារ្យប្រវត្តិវិទ្យា សំបូរ ម៉ាណារ៉ា បានឲ្យដឹងថា មនោគមវិជ្ជា​ជាគំនិតមួយរបស់បុគ្គលម្នាក់ៗ គំនិតមួយដែលផុសចេញ អំពីដំណើរវិវត្តនៃការចង់បាន ការទោរទន់ ហើយក៏ចាប់ផ្តើមធ្វើអ្វីមួយដោយការជឿជាក់ និងកំណត់ទិសដៅ។

មនោគមវិជ្ជា​ជាផ្នែកមួយ ដែលញ៉ាំង​ឲ្យមនុស្សទាំងឡាយយកចិត្តទុកដាក់ ពិចារណាក្នុងការផ្សំគំនិត ចំណេះដឹងដែលមាន ឈានដល់ការអនុវត្តផ្ទាល់ទៀតផង។ អ្នកដែលបង្កើតមនោគម សុទ្ធតែជាមនុស្សដែលអះអាងថាខ្លួនចង់ឲ្យមនុស្សទាំងឡាយ​ក្លាយ​ជាអ្នកបានទទួលផល។

លោកសាស្តាចារ្យបានបន្តថា មនុស្សបង្កើតមនោគមវិជ្ជា គួរជាមនុស្សធ្វើអំពើល្អ មានការគិតបញ្ញា បម្រើ​ផលប្រយោជន៍ ស្តាប់បេះដួងខ្លួនឯង ស្តាប់គំនិតដែលខ្លួនឯងបានគិតឲ្យបានច្រើន ហើយឲ្យតម្លៃទៅលើអ្នកដទៃឲ្យបានច្រើនបើអាចធ្វើទៅបាន។ ប៉ុន្តែលោកបានលើកឡើងថា ក្នុងចំណោមមនោគមវិជ្ជា​ទាំងនោះ ក៏មានមួយទៀតគឺជាចិត្តលោភលន់ ជាការបំពាន ទន្រ្ទាន ដែលធ្វើឲ្យអ្នកទាំងឡាយក្លាយទៅជាសាវក​របស់ខ្លួន ត្រូវតែធ្វើតាមដើម្បីបំពេញបំណងនៅអ្វីដែលបានដាក់តម្កល់។

ពាក់ព័ន្ធបញ្ហានេះ លោកសាស្តា្រចារ្យ បានលើកឧទាហរណ៏ថា «យើងនាំគ្នាដាក់ស្មៅមុខសេះ បង្អើល​ឲ្យសេះរត់ ព្រោះ​តែ​សេចក្តីស្រេកឃ្លាន សេះដេញតាមស្មៅ ចេះតែរត់តាម ជិតបង្កើយៗ។ នេះហើយមនោគមវិជ្ជា​បម្រើផលប្រយោជន៏ដែលឲ្យសេះរត់តាមខ្លួន ដើម្បីទទួលបានស្មៅ តែដល់ទីបំផុតសេះរត់រហូតដល់ដាច់ខ្យល់ស្លាប់ នៅមិនអាចទទួលបានស្មៅ គ្រាន់តែបានឃើញ»។

កត្តាទាំងអស់នេះហើយ ជាមនោគមវិជ្ជា​មួយដែលនាំឲ្យបាត់តម្លៃ ភាពជឿជាក់ពិតប្រាដករបស់មនុស្សក្នុងការផ្សំគំនិតនៃការបង្កើតមនោគមវិជ្ជា។

«ទៀតសោទ នាសម័យអង្គរ ព្រះរាជាជាច្រើនអង្គបានបង្កើតនៅមនោគមសម្រាប់កសាងប្រទេស​ជាតិ ប្រដៅមនុស្ស អប់រំមនុស្សឲ្យបំពេញកាតព្វកិច្ចដើម្បីជាតិ។ ព្រះរាជានៅក្នុងសម័យអង្គរជិះ តែដំរី គោ ក្របី រទះសេះ សម្រាប់សាង់សង់ស្ពាន និងធ្វើអ្វីផ្សេងៗបានបញ្ជាក់ថា ជាមនោគមវិទ្យាមួយ បានបណ្តុះគំនិតប្រជាជនសម័យនោះឲ្យធ្វើអ្វីដើម្បីជាតិ»។ លោកសាស្រ្តាចារ្យ បានបន្ថែម។

ទន្ទឹមនោះ លោកសាស្រ្តាចារ្យបានបង្ហើបថា ចំពោះអ្នកបានជឿទៅលើមនោគមវិជ្ជា​អសកម្មយ៉ាងងប់ងល់ នាំឲ្យប៉ះពាល់​ឬ​ខូចប្រយោជន៍ដល់​​ខ្លួន​ឯង មនុស្ស​ជុំវិញ​ខ្លួន​​ក៏​ដូចជា​​ប្រទេស​ជាតិ​៕

ដោយ៖ ឌឿនចាន់ ថារី