ភ្ញៀវទេសចរទៅកម្សាន្តនៅខេត្តកំពង់ចាមជិត ៨ម៉ឺននាក់ ៣ថ្ងៃភ្ជុំបិណ្ឌ

កំពង់ចាម ៖  នៅក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ រយៈពេល៣ថ្ងៃ មានភ្ញៀវទេសចរជាតិ  និងអន្តរជាតិ  ដែលមកលេងកម្សាន្ត រមណីយដ្ឋាននានា ក្នុងខេត្តកំពង់ចាម សរុបប្រមាណជិត៨ម៉ឺននាក់។

លោក ស៊ាន សុគុន ប្រធានមន្ទីរទេសចរណ៍ ខេត្តកំពង់ចាម បានបញ្ជាក់ឲ្យដឹងថា  អ្នកទេសចរដែលមកលេង​កម្សាន្តខេត្តកំពង់ចាម  នាឱកាសភ្ជុំបិណ្ឌនេះ  សរុបមានចំនួន ៧៩.៥៧៤នាក់ ក្នុងនោះភ្ញៀវជាតិ មានចំនួន ៧៩.៣២៨នាក់ និងភ្ញៀវបរទេស មានចំនួន ២៤៦នាក់ ។

ប្រធានមន្ទីរទេសចរណ៍ បានឲ្យដឹងថា ក្នុងចំនួនភ្ញៀវសរុបខាងលើនេះ គឺបានអញ្ជើញមកលេង នៅតាមកន្លែងកម្សាន្ត និងរមណីយដ្ឋាននានា រួមមាន ៖ រមណីយដ្ឋានទឹកឆា ភ្ញៀវទេសចរ មានចំនួន ១០.៤៤០នាក់ គ្មានភ្ញៀវបរទេស។ រមណីយដ្ឋានកសិទេសចរណ៍-ថ្មដាទឹកឆា ភ្ញៀវទេសចរ មានចំនួន ២.៨៩៥នាក់ ក្នុងនោះភ្ញៀវបរទេស មានចំនួន ០៥នាក់ ។ រមណីយដ្ឋានប្រាសាទភ្នំហាន់ជ័យ មានភ្ញៀវទេសចរ ចំនួន ១៣.២៨១នាក់ ក្នុងនោះ ភ្ញៀវបរទេស មានចំនួន ០២នាក់ ។ រមណីយដ្ឋានបែមប៊ូរីសត មានភ្ញៀវទេសចរ ចំនួន ១៧៨នាក់ ក្នុងនោះភ្ញៀវបរទេស មានចំនួន ២៣នាក់ ។ រមណីយដ្ឋានភ្នំប្រុស-ភ្នំស្រី មានភ្ញៀវទេសចរ  ចំនួន ៩.៤៣៤នាក់ ក្នុងនោះភ្ញៀវបរទេស មានចំនួន ៤៤នាក់ ។ រមណីយដ្ឋាននគរបាជ័យ មានភ្ញៀវទេសចរ ចំនួន ៦.៨៧៧នាក់ គ្មានភ្ញៀវបរទេសទេ ។ រមណីយដ្ឋានប្រាសាទភ្នំជើងព្រៃ មានភ្ញៀវទេសចរ ចំនួន ៤.៤២២នាក់ គ្មានភ្ញៀវបរទេសទេ ។ អាហារដ្ឋានសួនស្នេហ៍​សុភមង្គល មានភ្ញៀវទេសចរ ចំនួន ១.៩៦២នាក់ គ្មានភ្ញៀវបរទេសទេ ។ ក្រុងកំពង់ចាម មានភ្ញៀវទេសចរ ចំនួន ១៥.១១៦នាក់ ក្នុងនោះភ្ញៀវបរទេស មានចំនួន ៤៧នាក់ ។ ភ្ញៀវស្នាក់នៅតាមផ្ទះសំណាក់ និងសណ្ឋាគារ  សរុបមានចំនួន ៥.២៥៧នាក់ ក្នុងនោះភ្ញៀវជាតិ មានចំនួន ៥.១៣២នាក់ និងភ្ញៀវបរទេសមានចំនួន ១២៥នាក់ ។ ដោយឡែក ភ្ញៀវទេសចរ ដែលចូលរួមកម្មវិធីប្រណាំងទូក នៅស្រុកស្ទឹងត្រង់ សរុប ៩.៧១២នាក់៕ អត្ថបទ  និងរូបភាព ៖  ឡេក  ចាន់ពេជ្រ