មកដឹងមូលហេតុ ដែលមេដឹកនាំអាស៊ានថតរូបជុំគ្នា មិនមានការចាប់ដៃខ្វែងគ្នាដូចមុន

អ្នកនាំពាក្យកិច្ចប្រជុំកំពូលអាស៊ានឆ្នាំ ២០២២ បានបញ្ជាក់ថា មូលហេតុដែលមេដឹកនាំអាស៊ានថតរូបជុំគ្នា មិនមានការចាប់ដៃខ្វែងគ្នាដូចមុននោះ គឺមិនមានអ្វីផ្លាស់ប្ដូរឡើយ គ្រាន់តែមេដឹកនាំអាស៊ានចង់ចូលរួមទប់ស្កាត់ ការឆ្លងរាលដាលជំងឺកូវីដ-១៩ តែប៉ុណ្ណោះ។

ការបញ្ជាក់នេះ បន្ទាប់ពីមានអ្នកសារព័ត៌មានមួយចំនួន បានកត់សម្គាល់ឃើញថា នៅក្នុងកិច្ចប្រជុំកំ​ពូលអាស៊ានលើកទី ៤០ និង ៤១ ដែលប្រទេសកម្ពុជាធ្វើជាម្ចាស់ផ្ទះ គឺនៅពេលថតរូបជុំគ្នា មេដឹកនាំអាស៊ាន មិនមែនការចាប់ដៃខ្វែងគ្នាដូចមុន បែរជាលើកដៃម្ខាងរៀងៗខ្លួនទៅវិញ។

លោក គង់ ភោគ រដ្ឋលេខាធិការក្រសួងការបរទេសកម្ពុជា និងជាអ្នកនាំពាក្យកិច្ចប្រជុំកំពូលអាស៊ាន បានថ្លែងក្នុងសន្និសី ទសារព័ត៌មាន នៅយប់ថ្ងៃទី ១១ ខែកញ្ញានេះថា ការដែលមេដឹកនាំអាស៊ានថតរូបជុំគ្នា មិនមានការចាប់ដៃខ្វែងគ្នាដូចមុននោះ គឺដោយសារតែចង់ចូលរួមទប់ស្កាត់ ការឆ្លងរាលដាលជំងឺកូវីដ-១៩ ដោយមិនមានអ្វីផ្លាស់ប្ដូរឡើយ។

លោកថ្លែងយ៉ាងដូច្នេះថា «គឺដោយសាររឿងកូវីដ ជៀសវាងតាមដែលអាចធ្វើទៅបាន ការប៉ះការអី ដូច្នេះក៏យើងយក ជម្រើសមួយនេះទៅ អត់មានអីប្រែប្រួលទេ គឺដោយសាររឿងកូវីដទេ ហើយនេះគឺចាប់ផ្ដើមអនុវត្តម្ដងម្កាលមកហើយ កាលពីមុននៅក្នុងពេលដែលមានការប្រជុំដោយផ្ទាល់ខ្លះ នៅពេលដែលចំនួនករណីកូវីដ នៅខ្ពស់នៅឡើយ»។

រដ្ឋលេខាធិការក្រសួងការបរទេសកម្ពុជា បានបញ្ជាក់ទៀតថា ទោះបីជាជំងឺកូវីដ-១៩ នៅក្នុងប្រទេសកម្ពុជា ហាក់មានភាពធូរស្រាលក៏ដោយ ក៏កម្ពុជានៅតែគិតគូរខ្ពស់ទៅសុខុមាលភាពរបស់ភ្ញៀវ ដែលចូលរួមក្នុងកិច្ចប្រជុំកំពូលអាស៊ានលើកទី ៤០ និង ៤១នេះដែរ។

លោក គង់ ភោគ បន្ថែមយ៉ាងដូច្នេះថា «ថ្វីត្បិតតែក្នុងករណីប្រទេសកម្ពុជាយើង យើងមិនមានបញ្ហាកូវីដ ឬមួយក៏យើងមិនមែនជារឿងគួរឲ្យព្រួយបារម្ភ ប៉ុន្តែសុខភាព សុខុមាភាពរបស់ភ្ញៀវយើង គឺជារឿងសំខាន់បំផុត យើងចង់ឲ្យគាត់មកដល់ចូលរួមប្រជុំត្រឡប់ទៅវិញ កូវីដហ្វ្រី»៕

អត្ថបទ៖ ឃួន សុភ័ក្រ