លោក គង់ សោភ័ណ្ឌ ដឹកនាំកិច្ចប្រជុំពិនិត្យពិភាក្សា លើការងារចុះបញ្ជីដីធ្លីលក្ខណៈជាប្រព័ន្ធ ក្នុងភូមិសាស្ដ្រខេត្ដ​កណ្ដាល

លោក គង់ សោភ័ណ្ឌ អភិបាលខេត្តកណ្តាល កាលពីរសៀលថ្ងៃទី ៧ ខែធ្នូ បានដឹកនាំកិច្ចប្រជុំពិនិត្យ និងពិភាក្សាលើការងារចុះបញ្ជីដីធ្លីលក្ខណៈជាប្រព័ន្ធ នៅក្នុងភូមិសាស្ដ្រខេត្ដ​កណ្ដាល និងត្រួតពិនិត្យវឌ្ឍនភាពការស្រាវជ្រាវដោះស្រាយករណីដីធ្លី និងការឆ្លើយតបលិខិតក្រសួងមហាផ្ទៃ ទូទាំងខេត្តកណ្តាល។

គួររំលឹកថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសអញ្ជើញជួបសំណេះ​សំណាល ជាមួយមន្ត្រីគណបក្សប្រជាជនកម្ពុជាខេត្តកណ្ដាលជាង ៣ពាន់នាក់ កាលពីថ្ងៃទី ៣ ខែធ្នូ ឆ្នាំ ២០២២កន្លងទៅនេះ បានណែនាំដល់អាជ្ញាធរខេត្តកណ្ដាលត្រូវយកចិត្តទុកដាក់ ដោះស្រាយជម្លោះដីធ្លីជូនប្រជាពលរដ្ឋឲ្យបានរហ័ស និងមានប្រសិទ្ធិភាព។  

លោក គង់ សោភ័ណ្ឌ អភិបាលខេត្តកណ្ដាល តាមរយៈទំព័រហ្វេសប៊ុករបស់ខ្លួន បានលើកឡើងថា ការសម្របសម្រួល​ដោះស្រាយទំនាស់ដីធ្លីជូនប្រជាពលរដ្ឋ ជាយន្តការមួយដ៏មានសារ:សំខាន់ សម្រាប់សង្គម និងប្រជាពលរដ្ឋ។

លោកថា «គុណតម្លៃនេះ ជាលទ្ធផលនយោបាយឈ្នះឈ្នះ នៃសម័យប្រទេ​សកំពុងមានសុខសន្តិភាព និងការអភិវឌ្ឍពេញលេញ ប្រកបដោយបរិយាប័ន្ន និងសមធម៌។ សន្តិភាព អនុញ្ញាតឲ្យមានកាលានុវត្តភាព ក្នុងនូវការកាត់បន្ថយវិវាទ​ ដើម្បីការអភិវឌ្ឍសង្គមជាតិ»៕