ឆ្នាំ២០២៣ ស៊ីម៉ាក់ដាក់ផែនការបោសសំអាតផ្ទៃដីគ្រាប់មីន និងយុទ្ធភណ្ឌមិនទាន់ផ្ទុះជាង២៦៥​គីឡូ​ម៉ែត្រក្រឡា

សម្រាប់ឆ្នាំ២០២៣នេះ អង្គភាពស៊ីម៉ាក់បានដាក់ចេញផែនការបង្កើនសមត្ថភាពកម្លាំងបោសសំអាតផ្ទៃដីគ្រាប់មីន និងយុទ្ធភណ្ឌមិនទាន់ផ្ទុះប្រមាណជាង២៦៥គីឡូម៉ែត្រក្រឡា ស្មើនឹង២៦.៥០០ហិកតា។

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានសរសេរនៅក្នុងទំព័រហ្វេប៊ុករបស់ខ្លួនថាទន្ទឹងនឹងជោគជ័យក្នុងឆ្នាំ២០២២ដែលជាគ្រឹះយ៉ាងសំខាន់សំរាប់បន្តភារកិច្ចក្នុងឆ្នាំ២០២៣ខាងមុខទៀតប្រកបដោយ​មហ្ឆិតាខ្ពស់ ក្នុងនាមជាសេនាធិការរបស់រាជរដ្ឋាភិបាលត្រូវចូលរួមសម្រេចឱ្យខាងតែបាននូវគោលដៅកម្ពុជាគ្មានគ្រាប់​មីនឆ្នាំ២០២៥ ។

លោកអគ្គនាយកបានសេសេរទៀតថា «ដើម្បីសម្រេចបាននូវមហិ្ឆតានេះ អង្គភាពនឹងបង្កើនសមត្ថភាពកម្លាំងបោសសំអាតផ្ទៃដីគ្រាប់មីន និងយុទ្ធភណ្ឌមិនទាន់ផ្ទុះចំនួនជាង២៦៥គីឡូម៉ែត្រក្រឡា (២៦.៥០០ហិកតា) ក្នុងឆ្នាំ២០២៣​នេះ»។

លោកអគ្គនាយកស៊ីម៉ាក់បានសរសេរទៀតថា ចាប់ពីខែមករា រហូតមកដល់ពាក់កណ្តាលខែធ្នូ ឆ្នាំ២០២២ ស៊ីម៉ាក់បាន​បោសសម្អាតផ្ទៃដីចំនួន ១៨៩.២៥៧.២៨១ ម៉ែត្រការ៉េ (១៨.៩២៥ហិកតា) ស្មើនឹងជាង៩០%នៃផែនការឆ្នាំ២០២២​និងរកឃើញ និងកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួន ៥៤.៩០៦គ្រាប់។ ក្រៅពីនេះស៊ីម៉ាក់បានធ្វើការឆ្លើយតបសំណើរសង្គ្រោះបន្ទាន់ៗ ចំនួន២.៩៦៣លើក អប់រំផ្សព្វផ្សាយយល់ដឹងពីមីនចំនួន​១.១០៨.១៥២​នាក់ ស្រាវជ្រាវចម្ការមីន/គ្រាប់ចំនួន៧១.២១៨.៩៦៨ ម៉ែត្រការ៉េ ស្រាវជ្រាវចម្ការមីនចំនួន៤១៥ បោះស្លាកចម្ការមីនប្រវែង៥៧.១៨៥ម៉ែត្រការអភិវឌ្ឍសង្គមកិច្ចជួយសង្គ្រោះជនពិការដោយសារមីនកិច្ចសហប្រតិបតិ្តការអន្តរជាតិ
ជាពិសេសការផ្តល់ការហ្វឹកហ្វឹកមិត្តភក្តិអន្តរជាតិទាំងនៅកម្ពុជានិងក្រៅប្រទេសព្រមទាំងការងារសង្គមមួយចំនួនទៀត។

លោក ហេង រតនា បានសរសេរឱ្យដឹងទៀតថា ក្នុងឱកាសចូលឆ្នាំថ្មី ឆ្នាំសកល គ្រឹស្តសករាជ ២០២៣​ លោកបាន ជូនពរជូនថ្នាក់ដឹកនាំ និងមន្ត្រីបុគ្គលិកទាំងអស់នៃអង្គភាពស៊ីម៉ាក់ព្រមទាំងក្រុមគ្រួសារ សូមទទួលបាននូវសុខភាពបរិបូរណ៍ កម្លាំងខ្លាំងក្លា ប្រាជ្ញាឈ្លាសវៃអាយុយឺនយូរដើម្បីបន្ដចូលរួមបំពេញភារកិច្ចជូនជាតិមាតុភូមិ ជាពិសេស​ភារកិច្ច​បោសសម្អាតគ្រាប់មីន និងសំណល់ជាតិផ្ទុះពីសង្គ្រាមដើម្បីផ្តល់ដីសុវត្ថិភាពជូនចំពោះប្រជាជនដែលរងផលប៉ះពាល់ដោយសារគ្រាប់មីន និងដើម្បីរួមកម្លាំងគ្នាផ្ដល់សេចក្ដីសុខសុវត្ថិភាព និងធានាថាគ្មានឃាតករលាក់មុខនៅលើដី ក្នុងទឹក ក្នុងដីនៃមាតុភូមិដ៏ស្រស់បវររនៃយើងជាពិសេសដើម្បីចូលរួមចំណែកនាំមកនូវវឌ្ឍនភាពសង្គម និងការអភិវឌ្ឍសេដ្ឋកិច្ចកម្ពុជាឲ្យកាន់តែរីកចម្រើន ។

គួរបញ្ជាក់ថា ចាប់តាំងពីឆ្នាំ១៩៩២ ដល់ឆ្នាំ២០២២ មានផ្ទៃដីប្រមាណ២,៥៣១គីឡូម៉ែត្រក្រឡាត្រូវបានបោសសម្អាតរួចនិងប្រែក្លាយជាដីសុវត្ថិភាពសម្រាប់ប្រជាជនប្រមាណ៩លាននាក់ ប្រើប្រាស់ និងរាប់បញ្ចូលទាំងការសាងសង់លំនៅដ្ឋាន សាលារៀន មន្ទីរពេទ្យ ស្ពានថ្នល់ និងកសិកម្មជាដើម ជាពិសេសបានប្រែក្លាយ ដីមីន ទៅជាដីមាស។ ក្នុងនោះបានរកឃើញ និងកម្ទេចចោលគ្រាប់មីនប្រឆាំងមនុស្សជាង១លានគ្រាប់ គ្រាប់មីនប្រឆាំងរថក្រោះជាង២ម៉ឺន៦ពាន់គ្រាប់ និងយុទ្ធភណ្ឌមិនទាន់ផ្ទុះដទៃទៀតជាង ៣លានគ្រាប់។

ចាប់តាំងពីឆ្នាំ១៩៧៩ ប្រជាជនចំនួនជាង៦ម៉ឺន៥ ពាន់នាក់ បានរងគ្រោះដោយសារមីន និងសំណល់ជាតិផ្ទុះពីសង្គ្រាម
ក្នុងនោះស្លាប់បាត់បង់ជីវិតជិត២ម៉ឺន(១៩,៨១៨)នាក់។ ជាមួយគ្នានឹងកិច្ចខិតខំប្រឹងប្រែងរួមគ្នាចំនួនជនរងគ្រោះប្រចាំឆ្នាំបានថយចុះពី៤៣២០នាក់ ក្នុងឆ្នាំ១៩៩៦ ជាឆ្នាំដែលមានចំនួនជនរងគ្រោះច្រើនបំផុត មកនៅ៤៤នាក់ ក្នុងឆ្នាំ២០២១
កន្លងមកនេះ។

គួរបញ្ជាក់ថា គិតត្រឹមខែតុលា ឆ្នាំ២០២២ កម្ពុជានៅសល់ផ្ទៃដីសង្ស័យមានមីន និងសំណល់ជាតិផ្ទុះពីសង្គ្រាមចំនួន ២,០០១ គីឡូម៉ែត្រក្រឡាក្នុងនោះផ្ទៃដីមានមីនចំនួន ៧០៣គីឡូម៉ែត្រក្រឡា និងសំណល់ជាតិផ្ទុះពីសង្គ្រាមចំនួន ១,២៩៨គីឡូម៉ែត្រក្រឡារាប់បញ្ចូលទាំងគ្រាប់បែកចង្កោមផងដែរ៕

អត្ថបទ៖ សំអឿន