ទូតអង់គ្លេសប្រចាំកម្ពុជា​ជឿជាក់ថា ការបោះឆ្នោតឆ្នាំនេះនឹងមានគណបក្ស​នយោ​បាយចូលរួមច្រើន

លោក ដូមីនីក វីល្លៀម (Dominic Williams) ឯកអគ្គរដ្ឋទូតអង់គ្លេសប្រចាំកម្ពុជាចង់ឃើញអ្នកមាន​សិទ្ធិបោះឆ្នោតអាចប្រើប្រាស់សិទ្ធិរបស់ខ្លួនក្នុងការបោះឆ្នោត ហើយគ្រប់ភាគីពាក់ព័ន្ធនឹង​ការបោះ​ឆ្នោត​មានសិទ្ធិធ្វើសកម្មភាព ដែលរួមមានគណបក្សនយោបាយ និងអង្គការមិនមែន​រដ្ឋាភិបាល។

​លោក ដូមីនីក វីល្លៀម លើកឡើងក្នុងជំនួបពិភាក្សាការងារជាមួយលោក ប្រាជ្ញ ចន្ទ ប្រធានគណៈ​កម្មាធិការជាតិ រៀបចំការបោះឆ្នោត (គ.ជ.ប) ប្រចាំនៅព្រះរាជាណាចក្រកម្ពុជានៅថ្ងៃទី ១០ ខែកុម្ភៈ​ ឆ្នាំ ២០២៣នេះ។

នៅក្នុងជំនួបនោះ លោក ដូមីនីក វីល្លៀម ជឿជាក់ថា ការបោះឆ្នោតឆ្នាំ២០២៣ នេះ នឹងមាន​គណបក្ស នយោបាយចូលរួមច្រើន ហើយការបោះឆ្នោតនេះនឹងប្រព្រឹត្តទៅដោយសន្តិភាព គ្មានការគំរាមកំហែង ម្យ៉ាងទៀតការបោះឆ្នោតនេះនឹងអនុវត្តដោយតម្លាភាព ខណៈរូបលោកក៏ចង់ដឹងអំពីដំណើរការរៀបចំការបោះឆ្នោតរបស់ គ.ជ.ប ផងដែរ។

ឆ្លើយតបទៅនឹងសំណើខាងលើ លោក ប្រាជ្ញ ចន្ទ ប្រធាន គ.ជ.ប បានជម្រាបជូន ប្រតិភូអង់គ្លេសអំពីប្រវត្តិ​នៃការបោះឆ្នោតនៅប្រទេសកម្ពុជា ដែលមានតាំងពីការបោះឆ្នោតសភា ធម្មនុញ្ញឆ្នាំ១៩៩៣ ដែលរៀបចំឡើងដោយ អ៊ុនតាក់ (UNTAC) គឺអាជ្ញាធរបណ្តោះអាសន្នរបស់អង្គការសហប្រ​ជាជាតិប្រចាំនៅកម្ពុជា និងការរៀបចំការបោះឆ្នោតដោយកម្ពុជាខ្លួនឯងតាំងពី ឆ្នាំ១៩៩៨ តរហូតមក ដែលមានចំនួនសរុប ១៦ លើករួចមកហើយ គឺការបោះឆ្នោតជ្រើសតាំង តំណាងរាស្ត្រ ការបោះឆ្នោតជ្រើសរើសក្រុមប្រឹក្សាឃុំ សង្កាត់ ការបោះឆ្នោតជ្រើសតាំងសមាជិកព្រឹទ្ធសភា និងការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ។

លោក​ ប្រាជ្ញ ចន្ទ ក៏បានជម្រាបជូនអំពីការធ្វើវិសោធនកម្មច្បាប់ និង ការកែទម្រង់ការបោះឆ្នោត ដែលនៅឆ្នាំ២០១៤ រដ្ឋសភាបានធ្វើវិសោធនកម្មរដ្ឋធម្មនុញ្ញដោយបាន ចែងស្ថាប័នរៀប​ចំការបោះឆ្នោតទៅក្នុងរដ្ឋធម្មនុញ្ញ ហើយបានអនុម័តច្បាប់ពីរ គឺច្បាប់ស្ដីពីការរៀបចំ និងការប្រព្រឹត្តទៅរបស់គណៈកម្មាធិការជាតិរៀបចំការបោះឆ្នោត និងច្បាប់ស្តីពីការបោះឆ្នោត ជ្រើសតាំងតំណាងរាស្ត្រ ហើយច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ ក៏ត្រូវបាន រដ្ឋសភាធ្វើវិសោធនកម្មផងដែរ។

ពាក់ព័ន្ធនឹងការងារបច្ចេកវិទ្យាព័ត៌មាន ឯកឧត្តម ប្រាជ្ញ ចន្ទ ក៏បានជម្រាបជូនអំពីបច្ចេក- វិទ្យាព័ត៌មានដែលត្រូវបាន គ.ជ.ប ដាក់ឱ្យប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០២២ នេះ សម្រេចបានជោគជ័យ។ ហើយថា ជោគជ័យនៃការបោះឆ្នោត ឃុំ សង្កាត់នេះ ត្រូវបានសាទរពីគ្រប់មជ្ឈដ្ឋានជាតិ និងអន្តរជាតិ ពីព្រោះបានប្រព្រឹត្តទៅដោយ សេរី យុត្តិធម៌ មានតម្លាភាព មានសុខសន្តិភាព និងគ្មានការគំរាមកំហែង។

លោក ប្រាជ្ញ ចន្ទ បញ្ជាក់ថា ពាក់ព័ន្ធនឹងការប្រឈមទៅនឹងការបោះឆ្នោត ដែលបានលើកឡើង​ដោយភាគីប្រតិភូអង់គ្លេស ឯកឧត្តម ប្រាជ្ញ ចន្ទ ប្រធាន គ.ជ.ប បានបញ្ជាក់ថា អ្នកនយោបាយ​មួយចំនួនបានធ្វើសកម្មភាព របស់ខ្លួនមិនគោរពច្បាប់ ហើយសកម្មភាពទាំងនោះ​មិនពាក់ព័ន្ធ​នឹងសមត្ថកិច្ច គ.ជ.ប ទ។

ដោយឡែក គ.ជ.ប បានអនុវត្តតួនាទី និងសមត្ថកិច្ចរបស់​ខ្លួនដោយ​ផ្អែកលើច្បាប់ ពីព្រោះ ឯករាជ្យភាពរបស់ គ.ជ.ប ភ្ជាប់ទៅនឹងការអនុវត្តច្បាប់។

លោក ប្រាជ្ញ ចន្ទ ប្រធាន គ.ជ.ប ក៏បានសំណូមពរដល់ឯកអគ្គរដ្ឋទូត អង់គ្លេស ជួយជម្រាប​ជូនដល់គណបក្សនយោបាយ និងអង្គការមិនមែនរដ្ឋាភិបាល សូមជួយជំរុញ ឱ្យភាគីទាំង​នោះគោរពច្បាប់ឱ្យបានត្រឹមត្រូវ៕