សម្ដេចតេជោ ហ៊ុន​ សែន ចុះហត្ថលេខារួចហើយ ទៅលើការផ្ដល់ប្រាក់ឧបត្ថម្ភដល់កម្មករ ដែលត្រូវបានព្យួរការងារ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា​ បានសម្រេចរួចហើយ ទៅលើការផ្ដល់ប្រាក់ឧបត្ថម្ភដល់កម្មករ-កម្មការនី ដែលត្រូវបានព្យួរការងារប្រមាណ ៣ម៉ឺន ២ពាន់នាក់។

នៅក្នុងពិធីអបអរសាទរទិវាអន្តរជាតិនារី ៨ មីនា ខួបលើកទី ១១២ នាព្រឹកថ្ងៃទី ៧ ខែមីនានេះ សម្តេចតេជោ ហ៊ុន សែន បានថ្លែងថា កាលពីថ្ងៃម្សិលមិញនេះ សម្ដេច បានចុះហត្ថលេខារួចហើយ ទៅលើការផ្ដល់ប្រាក់ឧបត្ថម្ភដល់កម្មករ-កម្មការនី ដែលត្រូវបានព្យួរការងារដោយសាររោងចក្រមួយចំនួន បានបិទទ្វារ។

សម្ដេចតេជោ ហ៊ុន សែន បានថ្លែងបែបនេះថា «ឯកឧត្ដម ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានបញ្ជូនសំណើទៅដល់ខ្ញុំ បន្ទាប់ពីមានអនុសាសន៍ ដូច្នេះខ្ញុំបានសម្រេចរួចហើយ ដែលកម្មការនីរបស់យើង នឹងទទួលបានប្រាក់ដូចកាលសម័យកូវីដ ដែលរោងចក្រត្រូវព្យួរ»។

ជាមួយគ្នានេះ សម្ដេចតេជោ ហ៊ុន សែន ក៏បានឲ្យដឹងដែរថា ស្របពេលដែលរោងចក្រចំនួន ៧១ បានបិទ ហើយកម្មករ-កម្មការនីចំនួន ៣២,០០០នាក់ ត្រូវបានព្យួរការងារ តែបែរជានៅខេត្តកំពង់ស្ពឺខ្វះកម្មករ-កម្មការនីប្រមា​ណ ៣០,០០០នាក់ទៅវិញ៕