សម្ដេចតេជោ ហ៊ុន​ សែន នាយករដ្ឋមន្ត្រីនៃកម្ពុជា លើកឡើងថា មនុស្សមួយចំនួនបានទប់ស្កាត់ការផលិតអគ្គិសនីប្រើដោយវារីអគ្គិសនី តែពួកគេទាមទារឲ្យរាជរដ្ឋាភិបាលដោះស្រាយបញ្ហាអគ្គិសនីឲ្យពួកគេ។

ការលើកឡើងនេះ គ្រាដែលសម្ដេចតេជោ ហ៊ុន សែន បាន​អញ្ជើញជួបសំណេះសំណាលជាមួយប្រជាពលរដ្ឋ ដែលបានផ្លាស់ប្តូរទីលំនៅទៅទីតាំងថ្មី និងត្រួតពិនិត្យការដ្ឋានសាងសង់ វារីអគ្គិសនីស្ទឹងពោធិ៍សាត់ ១ ស្ថិតនៅឃុំប្រម៉ោយ ស្រុកវាលវែង ខេត្តពោធិ៍​សាត់ នៅព្រឹកថ្ងៃទី ១៤ ខែមីនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «មនុស្សមួយចំនួន បាននិយាយទប់ស្កាត់នូវការផលិតអគ្គិសនី ប្រើដោយវារីអគ្គិសនី ប៉ុន្តែពួកគេក៏ទាមទារឲ្យយើងដោះស្រាយអគ្គិសនីឲ្យពួកគេ តើដោះស្រាយរបៀបម៉េចទៅ ប្រេងវាថ្លៃពេក ធ្យុង ថ្មថា បំពុលបរិស្ថាន ដល់វារីអគ្គិសនីថា បំផ្លាញព្រៃ ធ្វើឲ្យលិចលង់នូវផ្ទៃដីមួយចំនួន»។

សម្ដេចតេជោ ហ៊ុន សែន បានដាក់ជាសំណួរថា «អញ្ចឹងតើយើង ត្រូវវិលត្រឡប់ចន្លុះឬយ៉ាងម៉េច? ដុតចង្គៀងប្រេង កាតឬយ៉ាងម៉េច? យើងដុតទៀន ឬយ៉ាងម៉េច»?