Connect with us

ព័ត៌មានជាតិ

​ដាវ​ដែក​កំពង់ស្វាយ មាន​ប្រវត្តិ​ពាក់ព័ន្ធ​​ជនជាតិ​កួយ​ស្ល​ដែក​រាប់​សតវត្សរ៍​មុន

បានផុស

នៅ

ដាវ​ដែក​កំពង់ស្វាយ​កកើត​នៅ​ក្នុង​ទឹកដី​ខេត្ត​កំពង់ធំ ហើយ​ក៏​មាន​ប្រវត្តិ​ពាក់ព័ន្ធ​ជនជាតិ​កួយ​ស្ល​ដែក​កាល​ពី​ច្រើន​សតវត្ស​មុន។

លោក ហ៊ិន សោភ័ណ ប្រធាន​មន្ទីរ​វប្បធម៌​ និង​វិចិត្រ​សិល្បៈ​ខេត្ត​កំពង់ធំ​ បាន​បង្ហាញ​ពី​ប្រវត្តិ​នៃ​ដាវ​ដែក​កំពង់ស្វាយ​មាន​​ពាក់ព័ន្ធ​ជនជាតិ​កួយ។

លោក ហ៊ិន សោភ័ណ បាន​ឲ្យ​កម្ពុជា​ថ្មី​ដឹង​ថា នៅ​ក្នុង​ទឹកដី​នៃ​ស្រុក​កំពង់ស្វាយ​កាល​ពី​អតីតកាល ដែល​បច្ចុប្បន្ន​ខេត្ត​កំពង់ធំ មាន​ទាំង​ជនជាតិ​ខ្មែរ​រស់នៅ​ផង និង​ជនជាតិ​កួយ​រស់នៅ​ក៏​ច្រើន​ដែរ។ ជនជាតិ​កួយ​គឺ​ជា​ពូជពង្ស​អ្នក​ស្លដែក​ដ៏​ពូកែ ដែល​គេ​ដឹង​ថា​ផលិត​ដែក​ទាំង​អម្បាល​ម៉ាន​សម្រាប់​ប្រើ​ប្រាស់​នៅ​សម័យ​បុរាណ ​គឺ​សុទ្ធ​សឹង​ស្ល​ឬ​ផលិត​ជា​ឧបករណ៍​ប្រើប្រាស់​គ្រប់មុខ​ដោយ​ជនជាតិ​កួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុន​នឹង​ស្ល​ជា​ដែក​បាន គឺ​គេ​ត្រូវ​កាត់​ថ្ម​ភ្នំ​ដែល​មាន​រ៉ែ​ដែក​យក​មក​ស្ល​ក្នុង​គុក​ចង្ក្រាន​ដែល​ហៅថា “សន្លុង” ក្នុង​សីតុណ្ហភាព​យ៉ាងតិច ៣០០០ អង្សាសេ ទើប​រលាយ​ក្លាយ​ជា​ដែក។ ភ្នំ​ដែល​គេ​ស្គាល់​ថា​ថ្ម​មាន​ជាតិ​រ៉ែដែក​ច្រើន​នោះ​គឺ​ភ្នំ​ដែក ស្ថិត​នៅ​ក្នុង​ស្រុក​រវៀង ខេត្ត​ព្រះវិហារ​សព្វថ្ងៃ ដែល​ពី​មុន​ជា​អតីត​ដែនដី​នៃ​ខេត្ត​កំពង់ស្វាយ។ ក្នុង​នោះ​អ្វី​ពិសេស​បំផុត​នៃ​ផលិតផល​ដែក​នោះ​គឺ​ដាវ ដែល​ជា​អាវុធ​មួយ​ប្រភេទ​យ៉ាង​មាន​សារសំខាន់​សម្រាប់​ប្រើប្រាស់​ក្នុង​សឹក​សង្គ្រាម​នា​សម័យ​បុរាណ។

លោក​អះអាង​ថា ដាវ​ដែក​ដែល​ផលិត​ដោយ​ជនជាតិ​កួយ​នៅ​ស្រុក​កំពង់ស្វាយ មាន​ភាព​ល្បី​រន្ទឺ​ខ្លាំង​ណាស់ ដ្បិត​ដែក​ដែល​យក​មក​ធ្វើ​ជា​ដាវ​មាន​គុណភាព​ល្អ​ប្រសើរ​។ ហេតុ​ដូច្នេះ​ហើយ​បាន​ជា​យើង​ឮ​តាម​បទ​ចម្រៀង​មង្គលការ​ថា “ដាវ​អើយ​ដាវ​ដែក​ ដាវ​ល្អ​ចម្លែក ដាវ​ដែក​កំពង់ស្វាយ ផ្លែ​កេរ្តិ៍​ពី​ឪពុក ស្រោម​កេរ្តិ៍​ពី​ម្ដាយ ដាវ​ដែក​កំពង់ស្វាយ កំចាយ​អស់​មារ​សត្រូវ”។ ពោលគឺ​មាន​ន័យ​ថា ដោយសារ​តែដាវ​ដែល​ផលិត​នៅ​ខេត្ត​កំពង់ស្វាយ​មាន​គុណភាព​ល្អ ទើប​បាន​ជា​អ្នកនិពន្ធ​ចាប់​អារម្មណ៍​តាក់តែង​ជា​បទចម្រៀង​ឡើង។

លោក ហ៊ិន សោភ័ណ ​បន្ត​ទៀត​ថា សព្វថ្ងៃនេះយើង​បាន​ឃើញ​សន្លុង​ស្លដែក​ជាច្រើន​នៅក្នុង​ខេត្តព្រះវិហារ និង​ខេត្ត​កំពង់ធំ ដែល​សុទ្ធសឹង​ជាអតីត​ដែនដី​របស់​ខេត្ត​កំពង់ស្វាយព្រោះ​ឈ្មោះ “ខេត្តកំពង់ធំ” ទើប​នឹង​មាន​ប្រើប្រាស់​នៅ​សម័យ​បារាំង​តែ​ប៉ុណ្ណោះ។ ជាង​នេះ​ទៅទៀត សព្វថ្ងៃ​គេ​ឃើញ​មាន​ពិធី​សែន​ដែក​ជា​រៀងរាល់​ឆ្នាំ​របស់​បងប្អូន​ជនជាតិ​កួយ​នៅភូមិ​វាលវែង ស្រុក ប្រាសាទ​សំបូរ ហើយ​សម្ភារៈ​សម្រាប់​សែន​រួមមាន៖ ដាវ កាំបិត ដឹង កណ្ដៀវ ចបជីក​ជាដើម។

ដោយ​ឡែក​ពាក់ព័ន្ធ​ការស្រាវជ្រាវអំពីឧស្សាហកម្ម​ដែក​បុរាណ លោក ហ៊ិន សោភ័ណ បាន​បញ្ជាក់​ថា នៅ​រវាង​ចុង​សតវត្សរ៍​ទី១៩ អ្នកស្រាវជ្រាវ​មក​ពី​បណ្តា​ប្រទេស​នៅតំបន់​លោក​ខាង​លិច​ពោល​គឺតំបន់អឺរ៉ុប បាន​ចាប់ផ្ដើម​សិក្សា​ស្រាវជ្រាវ​អំពីឧស្សាកម្ម​ដែក​បុរាណ​នៅ​កម្ពុជា​ដំបូង​បង្អស់ ហើយ​បាន​បោះពុម្ពជា​សៀវភៅ​និង​របាយការណ៍ផ្សេងៗ។ ក្រោយមកនៅឆ្នាំ១៩៤៨ លោក មាស ហាំ ដែល​ជាអតីត​បាឡាត់ស្រុកកំពង់ស្វាយ ក៏បានសរសេរ​អត្ថបទ​មួយ​នៅក្នុង​ក្រុម​ជំនុំ​ទំនៀមទម្លាប់​ដែលមានចំណងជើងថា “ពិធី​ស្លដែក នៃជាតិកួយ នៅស្រុករវៀង​ខេត្ត​កំពង់ធំ”។ លុះ​ចូល​មកដល់រវាងឆ្នាំ១៩៩៣ លោក ឆេង ផុន និង​កូនប្រុសលោក​ក៏បាន​សិក្សាអំពីរឿងរ៉ាវនេះ​ខ្លះៗដែរ។

លោក​ ហ៊ិន សោភ័ណ បាន​បន្ត​ថា នៅរវាងឆ្នាំ ២០០៨ គម្រោង​មួយ​របស់​រាជបណ្ឌិត​សភា​កម្ពុជា​បាន​បង្កើត​ឡើង ដែល​ផ្ដល់​ឱកាស​ឲ្យ​បញ្ញាវន្តខ្មែរ​ជាច្រើនបាន​ចុះ​ធ្វើការ​ស្រាវជ្រាវពី​ឧស្សាហកម្ម​ដែក​បុរាណរបស់ខ្មែរ​។ បន្ទាប់​មក​គម្រោង​នេះក៏មាន​ការគាំទ្រ​ពី​ប្រមុខ​រដ្ឋាភិបាលកម្ពុជា​សម្តេច​តេជោ ហ៊ុន សែន​ ដោយចេញសេចក្តីសម្រេចលេខ ៥១. សសរ. ចុះថ្ងៃទី០៦ ខែកញ្ញា ឆ្នាំ២០១១។ នៅឆ្នាំ២០១២ ក្រសួងវប្បធម៌ និង​វិចិត្រ​សិល្បៈទទួល​បានការឧបត្ថម្ភគាំទ្រពីអង្គការជាច្រើន ក៏បានចាប់ផ្តើមធ្វើការងារនេះបន្តទៀត ដោយនៅពេលនោះមន្ទីរវប្បធម៌និងវិចិត្រសិល្បៈខេត្តកំពង់ធំ ក៏បានចូលរួមចំណែកលើការស្រាវជ្រាវនេះដែរ។

លោក​បន្ត​ថា ក្នុងឆ្នាំដដែលនេះ មន្ទីរវប្បធម៌និងវិចិត្រសិល្បៈខេត្តកំពង់ធំ បានបន្តស្រាវជ្រាវហើយ​តម្លើង​ជារបាំមួយមានឈ្មោះថា “របាំកួយស្លដែក”។ របាំនេះបានទទួលចំណាត់ថ្នាក់លេខ១ ទូទាំងប្រទេស ក្នុងមហោស្រពយុវជនទូទាំងប្រទេសលើកទី ៣ ក្នុងឆ្នាំ២០១៦។

បើតាម​លោក​ប្រធាន​មន្ទីរ​ នៅក្នុងឆ្នាំ២០១៩ ជំនាន់​លោក សុខ លូ ជា​អភិបាលនៃ​គណៈអភិបាល​ខេត្តកំពង់ធំ និង​សហការី​ បាន​ចុះសិក្សាស្រាវជ្រាវអំពីឧស្សាហកម្មដែកបុរាណ ក្នុង​គោលបំណង​យល់ដឹង​ឲ្យបានច្រើនអំពីប្រវត្តិផ្សេងៗ ដើម្បីធ្វើរូបសំណាក “ដាវដែកកំពង់ស្វាយ”។

រូបសំណាក “ដាវដែកកំពង់ស្វាយ” ត្រូវ​បាន​អាជ្ញាធរ​ខេត្ត​កំពង់ធំសាងសង់ត្រង់​ផ្លូវ​ច្រមុះជ្រូក​កំពង់ធំ​-​សៀមរាប និង​កំពង់ធំ ព្រះ​វិហារ ស្ថិត​នៅភូមិថ្នល់បែក ឃុំត្រពាំងថឫស្សី ក្នុង​ស្រុក​កំពង់ស្វាយ។ រូបសំណាក ​«​ដាវ​ដែក​កំពង់ស្វាយ​»​ មាន​ប្រវែង​ ៦,៤​ ម៉ែត្រ ទទឹង​ដាវ ​០,៤៥​ម៉ែត្រ កម្រាស់​ខ្នង​គល់​ដាវ​ ០,៧០ ​ម៉ែត្រ ផ្នែក​គល់​ដាវ ​០,៣០ ម៉ែត្រ ផ្នែក​ចុង​ដាវ​ ០,២០​ម៉ែត្រ និង​ផ្នែក​មុខដាវ​ ០,១០ ​ម៉ែត្រ ។

លោក​​សុខ លូ អតីត​អភិបាលខេត្ត​កំពង់ធំបញ្ជាក់​ថា ក្រុមការងារនិង​អ្នកជំនាញ​បាន​ប្រជុំ​ពិភាក្សា​គ្នា​​សម្រេច​សាងសង់​រូបសំណាក​ដាវ​ដែក​ដោយ​មិន​មាន​ស្រោម។ ការ​ផលិត​ដាវ​មិន​មាន​ស្រោម​បែប​នេះ ចង់​បង្ហាញ​ពី​រូបរាង​ដាវ​ដែក​កំពង់​ស្វាយ​​ដ៏​មាន​មហិទ្ធិឫទ្ធិ។

ទឹកដីខេត្តកំពង់ធំនៅពេលបច្ចុប្បន្ននេះ កាលពីនៅសតវត្សទី ១០ មានឈ្មោះថា សន្ទុក។ ឈ្មោះនេះបានបន្តប្រើប្រាស់ដល់សម័យកណ្តាលនៅរវាងសតវត្សរ៍ទី ១៧ នៃគ្រឹស្តសករាជដែល​គេ​ហៅថា “ខេត្តអាសន្ទុក ឬស្រុកសន្ទុក” (ពាក្យថា​”ស្រុក” នៅសម័យកណ្តាលមានន័យស្មើខេត្តសព្វថ្ងៃ)។ ពេលនោះទីប្រជុំជនខេត្ត​ដំបូងស្ថិតនៅ​ភូមិព្រះឥន្រ្ទកុមារ ហើយក្រោយមកលើកទៅភូមិកំពង់ស្វាយវិញ (តាមដងស្ទឹងសែន) ហើយសម្ដេចចៅពញាចន្ទរាជា ទ្រង់អនុញ្ញាតឲ្យ ឧកញ៉ាចៅពញា ឧទ័យរាជា ជាចៅហ្វាយស្រុកអាសន្ទុក និងជាមេទ័ពទៀតផង។​ បន្ទាប់មកទៀត នៅក្នុងរាជ្យរបស់ព្រះបាទស្រីសុរិយោពណ៌ (គ.ស.១៦០៧ – ១៦១៨) ទ្រង់បានចាត់ឱ្យឧកញ៉ាតេជាបុរាជមាស ឬតេជោមាស​ឬហៅថា ឧកញ៉ាក្រហមក​ធ្វើជាចៅហ្វាយស្រុកអាសន្ទុក។ ពេលនោះឧកញ៉ាតេជោមាស បានស្នើប្ដូរឈ្មោះ​ស្រុក​អាសន្ទុកមកជាស្រុកកំពង់ស្វាយវិញ។ ស្រុកឬខេត្តកំពង់ស្វាយនៅពេលនោះ មានទំហំផ្ទៃដ៏ធំធេងមាន​ព្រំប្រទល់ផែនដីជាប់ដែនដីស្រុកលាវ។

គួរ​បញ្ជាក់ថា ក្រៅពី​ «ដាវដែកកំពង់ស្វាយ» ដែល​អាជ្ញាធរ​ខេត្ត​សាងសង់​ជា​រូប​សំណាក​ជា​អត្តសញ្ញាណ​ខេត្ត ក៏​បាន​សង់​រូប​សំណាក​ «លោកឧកញ៉ាតេជោក្រហម ក» និង​រូបសំណាក «អាចារ្យលាក់» ក៏​មាន​ប្រវត្តិ​ពាក់ព័ន្ធ​ទឹកដី​ខេត្ត​កំពង់ធំ៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ៤៩ នាទី មុន

កម្មករ​នៃ​រោងចក្រ Y & W ជិត​២០០០​នាក់ បាន​បើកប្រាក់​ឈ្នួល និង​ប្រាក់​បំណាច់ ដោយ​ពេញចិត្ត និង​មាន​ជំនឿ​លើ​រាជរដ្ឋាភិបាល

ព័ត៌មានជាតិ៥៩ នាទី មុន

ឯកអគ្គរដ្ឋទូត​សាធារណរដ្ឋ​សហភាព​មី​យ៉ាន់​ម៉ា បេ្ត​ជ្ញា​ចិត្ត​ក្នុង​ការជំរុញ​ទំនាក់ទំនង និង​កិច្ចសហប្រតិបត្តិការ​រ​វាង​មី​យ៉ាន់​ម៉ា​-​កម្ពុជា​ឱ្យ​កាន់តែ​រឹងមាំ

ព័ត៌មានអន្ដរជាតិ៤ ម៉ោង មុន

ការសិក្សា ៖ ស្រ្តីដែលមានផ្ទៃពោះខំប្រឹងធ្វើការក្រោមកម្ដៅខ្លាំង ប្រឈមហានិភ័យកូនស្លាប់ក្នុងពោះ

ព័ត៌មានជាតិ៤ ម៉ោង មុន

ស្ថានីយប្រព្រឹត្តកម្មទឹកកខ្វក់ទី ៣ នៅ​ខេត្តព្រះសីហនុដាក់សម្ពោធ​ឲ្យដំណើការជា​ផ្លូវការ

ព័ត៌មានអន្ដរជាតិ៤ ម៉ោង មុន

ជនចំណាកស្រុកជាង ៥០០ នាក់ចូលចតនៅ អង់គ្លេស តាមទូកតូចៗ

ព័ត៌មានជាតិ៦ ថ្ងៃ មុន

ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅ​តែរឹងទទឹងមិនព្រមវាយកម្ទេចរបងចេញ

ព័ត៌មានអន្ដរជាតិ២ ថ្ងៃ មុន

Breaking News! បណ្ដាញសង្គម Facebook មានបញ្ហានៅទូទាំងពិភព​លោកជាថ្មី

ព័ត៌មានអន្ដរជាតិ៦ ថ្ងៃ មុន

អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ

ព័ត៌មានជាតិ៥ ថ្ងៃ មុន

សម្តេច​​​ ហ៊ុន សែន ​៖​ ហេតុ​អ្វី​បាន​ជា​មក​ដល់​ពេល​នេះ​ហើយ​មាន​មន្ត្រី​យើង​ប្រព្រឹត្ត​បែប​នេះ​ ដោយ​ពាក់​ស្បែក​ជើង​ចូល​ក្នុង​ព្រះ​វិហារ?

កីឡា៣ ថ្ងៃ មុន

ជើងឯកម៉ុងហ្គោលី Erdene​ អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត

Sokha Hotels

ព័ត៌មានពេញនិយម