អាជ្ញាធរខេត្តកំពង់ធំ រៀបចំកែលម្អផ្លូវជាង​២គីឡូ​ម៉ែត្រ​ឡើងវិញ ដើម្បីត្រៀមរៀបចំសង្ក្រាន្តកំពង់ធំ

អាជ្ញាធរខេត្តកំពង់ធំ រៀបចំកែលម្អផ្លូវកៅស៊ូប្រវែង២៣០០ម៉ែត្រ ចាប់ពីរង្វង់មូលលោកតាក្រហម “ក” ដល់ស្ពានត្បូងចាម ដើម្បីត្រៀមរៀបចំសង្ក្រាន្តកំពង់ធំ នៅខែមេសាខាងមុខនេះ។

នៅថ្ងៃទី១១ ខែកុម្ភៈ ឆ្នាំ២០២៥ លោក នួន ផារ័ត្ន អភិបាលខេត្តកំពង់ធំ ដឹកនាំសហការីចុះពិនិត្យការរៀបចំអ៊ុតផ្លូវកៅស៊ូ (AC) ប្រវែងជាង២ពាន់ម៉ែត្រ នៅក្នុងក្រុងស្ទឹងសែន។ ក្នុងឱកាសនោះលោកលើកឡើងថា ការរៀបចំអ៊ុតកំណត់ផ្លូវចាប់ពីរង្វង់មូលលោកតាក្រហម “ក” ដល់ស្ពានត្បូងចាម គឺជាការអ៊ុតបន្ថែមលើផ្លូវកៅស៊ូចាស់ដែលមានស្រាប់ ប៉ុន្តែមានការខូចខាតដោយដុំ។ ផ្លូវដែលអ៊ុតថ្មី មានប្រវែងសរុបប្រមាណ២៣០០ម៉ែត្រ ទទឹង៩មែត្រ ជាផ្លូវបួនគន្លងដែលនៅចំកណ្តាលទ្រូងផ្លូវមានសួនផ្កាក្រដាសចម្រុះពណ៌ ហើយផ្លូវនេះនឹងធ្វើឲ្យបានរួចរាល់មុនថ្ងៃចូលឆ្នាំថ្មីខាងមុខ។

លោកបន្តថា ការអ៊ុតបន្ថែមលើផ្លូវនេះមិនត្រឹមតែជួយលើកសោភណ្ឌភាពក្រុងស្ទឹងសែននោះទេ ប៉ុន្តែដើម្បីធានាឱ្យបាននៅភាពធន់ ប្រើប្រាស់បាន យូរអង្វែង ព្រោះជាផ្លូវដែលមមារញឹកក្នុងការធ្វើដំណើរឆ្លងកាត់របស់ប្រជាពលរដ្ឋ និងភ្ញៀវទេសចរជាតិ-អន្តរជាតិ។ កំណាត់ផ្លូវនេះក៏ត្រូវរៀបចំកែលម្អរសម្រាប់ផ្លូវចូលសង្ក្រាន្តកំពង់ធំ ដែលនឹងប្រព្រឹត្តទៅនៅ ក្នុងខែមេសាឆ្នាំ២០២៥ខាងមុខ។

បញ្ជាក់ថា កម្មវិធីសង្ក្រានកំពង់ធំ ឆ្នាំ២០២៥ នឹងធ្វើឡើងនៅ បរិវេណសួនស្ទឹងសែនធំជាងឆ្នាំមុនៗ។ កម្មវិធីសង្ក្រាន្ត នឹងរៀបចំឲ្យមាន ការលេងល្បែងប្រជាប្រិយ បោះអង្គុញ ចោលឈូង ទាញព្រាត់ លាក់កន្លែង ការប្រគំតន្រ្តីបុរាណ សម័យ ការរាំងលេងកំសាន្ត តំបន់ត្រជាក់ ជាដើម។ គ្រប់ទីតាំងទាំងអស់ក្នុងក្រុងស្ទឹងសែន ក៏រៀបចំបណ្តាញ ភ្លើងលម្អ ការដាំផ្កាបន្ថែមលើសួនលោកតាក្រហម “ក” សួនអាចារ្យលាក់ នៅផ្នែកខាងក្រោមសួនស្ទឹងសែន ។ ជាមួយគ្នានេះក៏មានរៀបចំជាផ្សាររាត្រីលើឆ្នេរខ្សាច់ ការបាញ់កាំជ្រូច ដើម្បីអបអរបុណ្យចូលឆ្នាំប្រពៃណីជាតិ ដែលដូនតាខ្មែរយើងបានបន្សល់ទុកផងដែរ។ លោកអំពាវនាវ ដល់ប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិ សូមអញ្ជើញមកលេងកំសាន្ត នៅខេត្តកំពង់ធំ ក្នុងឱកាសបុណ្យចូលឆ្នាំថ្មីខាងនេះ ប្រកបដោយភាពសប្បាយរីករាយទាំងអស់គ្នា៕

អត្ថបទ៖ ឈាង មករា