ព័ត៌មានជាតិ

កាកបាទក្រហមកម្ពុជាខេត្តកំពង់ធំ ចុះសួរសុខទុក្ខស្ត្រីឆ្លងទន្លេ ក្នុងទិវាជាតិសុខភាពមាតា ទារក និង កុមារ

បានផុស

៥ ខែ មុន

នៅ

ថ្ងៃសៅរ៍ ២២ កុម្ភៈ ២០២៥

ដោយ

សាខាកាកបាទក្រហមកម្ពុជាខេត្តកំពង់ធំ ចុះសួរសុខទុក្ខស្ត្រីកំពុងសម្រាកឆ្លងទន្លេ និងស្ត្រីមាន ផ្ទៃពោះ នៅក្នុងឱកាសទិវាជាតិ សុខភាពមាតា ទារក និងកុមារ ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ២១ ខែកុម្ភៈ ឆ្នាំ ២០២៥ លោកស្រី លំ គន្ធារី អនុប្រធានអចិន្ត្រៃយ៍សាខាកាកបាទក្រហមកម្ពុជាខេត្តកំពង់ធំ ដឹកនាំសហការីចុះសួរសុខទុក្ខស្ត្រីឆ្លងទន្លេ និងស្ត្រីមានផ្ទៃពោះ នៅមណ្ឌលសុខភាពមានជ័យ ស្រុកសណ្តាន់ និងមណ្ឌលសុខភាពសំបូរ ស្រុកប្រាសាទសំបូរ ខេត្តកំពង់ធំ។

ក្នុងឱកាសនោះ លោកស្រី ពាំនាំនូវប្រសាសន៍សួរសុខទុក្ខ និងក្តីនឹករលឹកពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរដល់សុខទុក្ខប្រជាពលរដ្ឋគ្រប់ទីកន្លែង ជាពិសេសស្ត្រីគ្រប់រូបដែលជាម្តាយ គ្រប់គ្រង ថែទាំ និងអប់រំកូនៗ ដោយផ្ទាល់។

លោកស្រី លើកឡើងដែរថា ទិវាជាតិសុខភាព មាតា ទារក និងកុមារ ២០២៥ គឺដើម្បីពង្រឹងភាពជាដៃគូរវាងសេវាសុខាភិបាលសាធារណៈ និងសេវាឯកជន ឈានទៅរកការលើកកម្ពស់គុណភាព នៃការថែទាំសុខភាពមាតា ទារក កុមារ និងយុវវ័យ គ្រប់ទីកន្លែង ដែលទាំងអស់នេះ ចាំបាច់បំផុតត្រូវមានការចូលរួមយ៉ាងសំខាន់នៅគ្រប់ផ្នែកពាក់ព័ន្ធ រាប់បញ្ជូលទាំងសង្គមគ្រួសារ សហគមន៍ និងអាជ្ញាធរគ្រប់លំដាប់ថ្នាក់ផងដែរ។

ជាមួយគ្នានេះ លោកស្រី បាននាំយកអំណោយមនុស្សធម៌សាខាកាកបាទក្រហមកម្ពុជាខេត្តកំពង់ធំ ផ្ដល់ជូនគ្រួសារដែលមានផ្ទៃពោះ កូនតូច និងជនពិការ ជូនដល់គ្រួសារចំនួន ៤២ នាក់ ក្នុង ០១ នាក់ទទួលបាន ៖ អង្ករចំនួន ២៥ គីឡូក្រាម មី ០១ កេស ទឹកត្រី ០១ យួរ ទឹកស៊ីអ៊ីវ ០១ យួរ ឆុតមួក ស្រោមដៃ ស្រោមជើង មុងទារក កន្សែង ម្សៅទារក និងថវិកាចំនួន ៥ ម៉ឺនរៀល។ ចំពោះជនពិការដែលគ្រោះថ្នាក់ដោយគ្រាប់មីន ទទួលបាននូវអង្ករចំនួន ២៥ គីឡូក្រាម មី ០១ កេស ទឹកត្រី ០១ យួរ ទឹកស៊ីអ៊ីវ ០១ យួរ និងថវិកាមួយចំនួនផងដែរ៕

អត្ថបទ ៖ ឈាង មករា