ប្រតិភូ គ.ជ.ប កម្ពុជា នឹងចូលរួមសង្កេតការណ៍ សម្រាប់ការបោះឆ្នោតតំណាងរាស្រ្ដ នៅប្រទេសថៃ

គណៈប្រតិភូគណៈកម្មាធិការជាតិរៀបចំការបោះឆ្នោត (គ.ជ.ប) កម្ពុជា នឹងអញ្ជើញចូលរួមក្នុងកម្មវិធី សង្កេត​ការណ៍បោះឆ្នោតអន្តរជាតិ សម្រាប់ការបោះឆ្នោតជ្រើសតាំងតំណាងរាស្ត្រ ឆ្នាំ ២០២៣ ក្នុងប្រទេសថៃ។

សេចក្ដីជូនដំណឹងរបស់ គ.ជ.ប នៅថ្ងៃទី ១១ ខែឧសភា ឆ្នាំ ២០២៣នេះ បានឲ្យដឹងថា តបតាមការអញ្ជើញរបស់ការិយាល័យគណៈកម្មការរៀបចំការបោះឆ្នោត នៃព្រះរាជាណាចក្រថៃ គណៈប្រតិភូគណៈកម្មាធិការជាតិរៀបចំការបោះឆ្នោត (គ.ជ.ប) នៃព្រះរាជាណាចក្រកម្ពុជា ដឹកនាំដោយលោក ហង្ស ពុទ្ធា សមាជិក និងជាអ្នកនាំពាក្យ គ.ជ.ប នឹងអញ្ជើញចូលរួមកម្មវិធីសង្កេតការណ៍បោះឆ្នោតអន្តរជាតិ (EOP) សម្រាប់ការបោះឆ្នោតជ្រើសតាំងតំណាងរាស្ត្រ ឆ្នាំ ២០២៣ ក្នុងប្រទេសថៃ រយៈពេល ៥ថ្ងៃ ចាប់ពីថ្ងៃទី ១១ ដល់ថ្ងៃទី ១៥ ខែឧសភា ឆ្នាំ ២០២៣។

គណៈប្រតិភូ គ.ជ.ប កម្ពុជា នឹងវិលត្រឡប់មកដល់មាតុប្រទេសវិញ នៅថ្ងៃទី ១៥ ខែឧសភា ឆ្នាំ ២០២៣ ហើយក្នុងឱកាសនោះលោក ហង្ស ពុទ្ធា នឹងធ្វើសន្និសីទសារព័ត៌មាន ដើម្បីជម្រាបជូនអំពីលទ្ធផលនៃការចូលរួមសង្កេតការណ៍បោះឆ្នោតខាងលើនេះ នាវេលាម៉ោង ៧ និង០០នាទីល្ងាច នៅអាកាសយានដ្ឋានអន្តរជាតិភ្នំពេញ (ច្រក VIP)៕