សម្ដេចតេជោ ហ៊ុន សែន ៖ បើទោះបីថា មិនធ្វើនាយករដ្ឋមន្ត្រី ក៏នៅតែគ្រប់គ្រងនយោបាយកម្ពុជាដែរ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា​ បើទោះបីជាសម្ដេច ឈប់ធ្វើជានាយករដ្ឋមន្ត្រីនាពេលខាងមុខ ក៏សម្ដេចនៅគ្រប់គ្រងនយោបាយកម្ពុជាដដែល ក្នុងឋានៈជាមេដឹកនាំគណបក្សប្រជាជនកម្ពុជា។

ការថ្លែងរបស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធអគារសិក្សាថ្មីនៃពុទ្ធិកសាកលវិទ្យាល័យព្រះសីហមុនីរាជា ស្ថិតក្នុងបរិវេណ វត្តស្វាយពពែ នាព្រឹកថ្ងៃទី ៣០ ខែឧសភា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «ទាន់ករុណាខ្ញុំ នៅធ្វើជានាយករដ្ឋមន្ត្រី ដល់ករុណាឈប់ធ្វើនាយករដ្ឋមន្ត្រីទៅ គឺថា ព្រះតេគុណ ត្រូវទៅបិណ្ឌបាតនែនាយករដ្ឋមន្ត្រីក្រោយហើយ…ប៉ុន្តែករុណាអត់ទាន់ទៅណាទេ បើទោះបីថា មិនធ្វើនាយករដ្ឋមន្ត្រី ក៏នៅតែគ្រប់គ្រងនយោបាយកម្ពុជាដែរ ក្នុងឋានៈជាមេដឹកនាំគណបក្សប្រជាជន»។

យោងតាមសេចក្តីសម្រេចចិត្ត នៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា កាលពីថ្ងៃទី ២៩ ខែមករា ឆ្នាំ ២០២៣កន្លងទៅនេះ បានបញ្ជាក់ថា គាំទ្រពេញទំហឹង សម្ដេចតេជោ ហ៊ុន សែន ជាបេក្ខភាពនាយករដ្ឋមន្ត្រី សម្រាប់នីតិកាលទី ៧ នៃរដ្ឋសភា និងគាំទ្រឯកឧត្ដមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រី សម្រាប់ពេលអនាគត៕