សម្ដេចតេជោ ហ៊ុន សែន គូសបញ្ជាក់ថា គោលនយោបាយរបស់រាជរដ្ឋាភិបាល មិនមានការដំឡើងថ្លៃភ្លើងនោះទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ថា គោលនយោបាយរបស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា មិនមានការដំឡើងថ្លៃភ្លើងនោះទេ។

ការគូសបញ្ជាក់របស់សម្ដេចតេជោ ហ៊ុន សែន ធ្វើឡើងក្នុងពីធីជួបសំណេះសំណាលជាមួយកម្មករ-កម្មការិនី ក្នុងស្រុកកំពង់ត្រឡាច និងស្រុកសាមគ្គីមានជ័យ ខេត្តកំពង់ឆ្នាំង (លើកទី២) នៅព្រឹកថ្ងៃទី ៩ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងបញ្ជាក់ដល់កម្មករ-កម្មការនី និងប្រជាជននៅទូទាំងប្រទេសថា នយោបាយអគ្គិសនីរបស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា មិនដំឡើងថ្លៃភ្លើងនោះទេ ហើយខិតខំរកវិធីសាស្រ្ដយ៉ាងណាដើម្បីបញ្ចុះតម្លៃ ថែមទៀត។

សម្ដេចតេជោ ហ៊ុន សែន ថ្លែងបែបនេះថា «សូមបញ្ជាក់ជូនកម្មករនៅទីនេះ ក៏ដូចជាប្រជាជននៅទូទាំងប្រទេស នយោ បាយលើវិស័យអគ្គិសនី គឺយើងអត់ដំឡើងថ្លៃភ្លើងទេៗ យើងរកវិធីចុះប៉ុន្តែបើចុះមិនបានទេ ក៏សុំរក្សាកុំឲ្យឡើងៗ»។

សម្ដេចតេជោ ហ៊ុន សែន ក៏បានលើកឡើងដែរថា ភូមិទាំងអស់នៅទូទាំងប្រទេសកម្ពុជា ស្ទើរមានអគ្គិសនីប្រើប្រាស់គ្រប់ភូមិអស់ហើយ នៅសល់តែភូមិមួយចំនួនតូចដែលទើបនឹងបង្កើតឡើងតែប៉ុណ្ណោះ៕