ចំណូលពលរដ្ឋកើនឡើងពីតិចទៅមធ្យម ​នឹងជួយជំរុញទីផ្សារ​អចលនទ្រព្យនៅកម្ពុជា

បើទោះជាបច្ចុប្បន្ននេះ ទីផ្សារអចលនទ្រព្យ មិនទាន់មានសន្ទុះយ៉ាងណាក្តី តែវិស័យនេះមានឱកាសងើប​ឡើងដោយ​សន្សឹមៗ តាមរយៈពលរដ្ឋដែលមានជីវភាពស្ថិតក្នុងវណ្ណៈកណ្តាលនៅកម្ពុជា។

លោក ស៊ន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងនៅក្នុងកិច្ចពិភាក្សា​តុមូលអំពីស្ថានភាពទីផ្សារអចលនទ្រព្យនៅកម្ពុជានាពេលថ្មីៗនេះថា ​ ពលរដ្ឋមានជីវភាពវណ្ណៈកណ្តាល សំដៅទៅ​លើអ្នក​ដែលមានលុយតិច ទៅចំណូលមធ្យមមានការកើនឡើងច្រើន ដែលនេះជាឱកាសក្នុងអភិវឌ្ឍទីផ្សារអចលនទ្រព្យ តាមរយៈតម្រូវការផ្សេងៗ។

លោកមើលឃើញថា កម្ពុជា នៅសល់ទំហំនៃការរីកចម្រើនវែងឆ្ងាយតទៅទៀត ដែលអ្នកវិនិយោគិនបរទេសមាន​ឱកាសច្រើន ក្នុងការចូលមកអភវិឌ្ឍ ខណៈដែលប្រទេសជិតខាងកម្ពុជា គេបានរីកចម្រើនច្រើនមកហើយ។ លោកបញ្ជាក់ថា អ្នកវិនិយោគដែលចូលមកកម្ពុជា នឹងមានឱកាសសម្រាប់អ្នកដែលមានគម្រោងជាក់លាក់ មានភាពច្នៃប្រឌិត​ប្រកបដោយគុណភាព។ ​លោកថា «នៅក្នុងអំឡុងពេលពិបាកនេះ ខ្ញុំសង្កេតឃើញថា គម្រោងមួយ​ចំនួនគាត់លក់ដាច់ រហូតគាត់ប្រកាសលក់គម្រោងថ្មីបន្តទៀត»។

លោក ស៊ន សៀប សង្កត់ធ្ងន់ថា រាល់គម្រោងអភិវឌ្ឍលំនៅឋានមិនចាំបាច់ធំពេកទេ ប៉ុន្តែត្រូវតែមានលក្ខណៈពិសេស សម្រាប់អតិថិជន។ ការសិក្សាលម្អិតអំពីគម្រោង មុននឹងធ្វើការអភិវឌ្ឍគឺជារឿងសំខាន់ ពិសេសទៅលើគុណភាព បរិយាកាស ចាប់តាំងពីចំណុចតូចៗរហូតដល់ចំណុចធំ។ អ្នកជំនាញអចលនទ្រព្យរូបនេះ លើកឡើងទៀតថា គំនិត​ច្នៃប្រឌិត​ទាំងអស់នេះហើយ ដែលមានភាព​ប្រកួតប្រជែងកាន់តែមានប្រសិទ្ធភាពទៅថ្ងៃខាងមុខ។​

លោក តាន់ មុនីវណ្ណ អគ្គនាយករងក្រុមហ៊ុនម៉ុងឬទ្ធី និងជាទីប្រឹក្សាសមាគមអភិវឌ្ឍន៍លំនៅឋានកម្ពុជា បានលើក​ឡើងថា តម្រូវការទីផ្សារអចលនទ្រព្យកម្ពុជា នៅតែមាន ប៉ុន្តែស្តង់ដារនៃការផលិតលើស និងផលិតមិនត្រូវតម្រូវការ ជាពិសេសនោះគឺធ្វើការបត់បែនបានទាន់សភាពការ។ ជាក់ស្តែងអគារខ្ពស់ៗមួយចំនួនសាងសង់ខុសតម្រូវការទីផ្សារ ទៅលើបញ្ហាតម្លៃ និងចំណត ជាដើម។​​ លើសពីនេះទៀត លោថា ប្រសិនបើការពង្រីកអភិវឌ្ឍដីធ្លីកុំលឿនពេក ក៏មិនមានបញ្ហាធ្លាក់ចុះទីផ្សារអចលនទ្រព្យខ្លាំងនោះដែរ។

​

លោកឧកញ៉ាបណ្ឌិត គីម ហ៊ាង អគ្គនាយកក្រុមហ៊ុនខ្មែររៀលអ៊ីស្ទេត បានណែនាំឱ្យពលរដ្ឋវិនិយោគទិញ​ផ្ទះឬដីនាពេលនេះ ព្រោះជាឱកាសអាចទុកចំណេញនាពេលខាងមុខ។

លោកបានលើកឡើងថា ប្រសិនបើមានលុយ​ទិញនាពេលនេះ គឺល្អបំផុត ព្រោះពេលនេះ ជាពេលដែលតម្លៃដីធ្លី ផ្ទះសម្បែងធូរថ្លៃ ជ្រើសរើសបានរបស់ល្អៗជាច្រើន។ លោកឧកញ៉ា បានបន្តដូច្នេះថា«យោបល់ខ្ញុំ មានលុយគួរទិញ​ពេលណឹង អត់មានចាំពេលណាទៀតទេ ព្រោះជាទូ​ទៅតម្លៃឡើងចុះជារឿងធម្មតា ប៉ុន្តែឥឡូវនេះវាចុះយើងរើស​បានច្រើន ដល់ពេលឡើងយើងលក់បានថ្លៃ»។

បើទោះជាអ្នកជំនាញមើលឃើញថា ទីផ្សារអចលនទ្រព្យមានការធ្លាក់ចុះយ៉ាងណាក្តី តែកំណើននៃការសាងសង់​នៅតែមានការកើនឡើង។ ជាក់ស្តែង ក្រសួងរៀបចំដែនដី នគរូបនីយកម្ម និងសំណង់ បានផ្តល់លិខិត​អនុញ្ញាត​សាងសង់សំណង់បានចំនួន ១៤៦៣គម្រោង មានផ្ទៃក្រឡាជាង ៥លានម៉ែត្រការ៉េ លើទុនវិនិយោគជាង ២២៧០​លានដុល្លារអាមេរិក រយៈពេល ៥ខែ ឆ្នាំ ២០២៣ ពោលគឺបានកើនឡើង ១៣៨ភាគរយ បើធៀបនឹង​រយៈពេលដូចគ្នា កាលពីឆ្នាំ ២០២២។ នេះបើតាមការបញ្ជាក់​របស់លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅក្នុងកិច្ចពិភាក្សាស្តីពី ស្ថានភាពទីផ្សារអចលនទ្រព្យនៅកម្ពុជា នាថ្ងៃទី ២៣ មិថុនា ឆ្នាំ ២០២៣៕