សម្ដេច ស ខេង អំពាវនាវឱ្យពលរដ្ឋបោះឆ្នោតឱ្យគណបក្សប្រជាជន ដើម្បីបន្តនាំកម្ពុជាឆ្ពោះរកភាពរីកចម្រើន

សម្ដេចក្រឡាហោម ស ខេង ស្នើប្រជាពលរដ្ឋបន្តបោះឆ្នោតគាំទ្រគណបក្សប្រជាជន ដើម្បីផ្ដល់លទ្ធភាពដល់គណបក្សមួយនេះបានដឹកនាំមាតុភូមិកម្ពុជាឆ្ពោះទៅរកភាពរីកចម្រើនរុងរឿង និងឈរស្មើមុខប្រទេសនានានៅលើឆាកអន្តរជាតិ។ សម្ដេចក្រឡាហោម ស្នើបែបនេះក្នុងឱកាសដឹកនាំយុទ្ធនាការឃោសនារកសំឡេងឆ្នោត នៅស្រុកបវេល ខេត្តបាត់ដំបង នៅថ្ងៃទី៣ ខែកក្កដានេះ។

នាឱកាសនោះ សម្ដេចក្រឡាហោមក៏បានអំពាវនាវដល់សមាជិក-សមាជិកា អ្នកគាំទ្រគណបក្សប្រជាជនកម្ពុជា និងជារួមប្រជាពលរដ្ឋខ្មែរដែលមានឈ្មោះក្នុងបញ្ជីឈ្មោះបោះឆ្នោត សូមត្រៀមលក្ខណៈអញ្ជើញទៅបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ដើម្បីគាំទ្រការអនុវត្តលទ្ធិប្រជាធិបតេយ្យដែលបានចាក់គ្រឹះយ៉ាងរឹងមាំនៅកម្ពុជា ចាប់តាំងពីឆ្នាំ១៩៩៣។

ជាមួយគ្នានេះ ក្នុងនាមគណបក្សប្រជាជនកម្ពុជា សម្ដេច ស ខេង បានថ្លែងអំណរគុណ និងកោតសរសើរថ្នាក់ដឹកនាំ និងសមាជិក សមាជិកាក្រុមការងារចុះមូលដ្ឋានស្រុក និងអ្នកគាំទ្រគណបក្សគ្រប់ភូមិ និងឃុំទូទាំងស្រុកបរវេល ដែលមានភក្ដីភាពជឿជាក់គាំទ្រឥតងាករេមកលើគណបក្សប្រជាជនកម្ពុជា និងអញ្ជើញចូលរួមក្នុងយុទ្ធនាការឃោសនាបោះឆ្នោត នៅពេលនេះ។

សម្ដេចអនុប្រធានគណបក្សប្រជាជន និងជាបេក្ខជនតំណាងរាស្ត្រមណ្ឌលខេត្តបាត់ដំបង ក៏បានថ្លែងអំណរគុណប្រជាពលរដ្ឋទូទាំងខេត្តបាត់ដំបង បានចូលរួមគាំទ្រការដឹកនាំប្រទេសរបស់រាជរដ្ឋាភិបាល នីតិកាលទី៦ នៅពេលកន្លងមក ដែលធ្វើឱ្យប្រទេសជាតិបន្តរក្សាបានសុខសន្តិភាព បូរណភាពទឹកដី អធិបតេយ្យភាពជាតិ ស្ថិរភាពនយោបាយ ការពារ របបរាជានិយម និងធានាបានលំនឹងសេដ្ឋកិច្ច។

សម្ដេច បានបន្តថា ពេលថ្មីៗនេះ រាជរដ្ឋាភិបាលបានគ្រប់គ្រង បង្ការទប់ស្កាត់បានប្រកបដោយប្រសិទ្ធិភាពជំងឺកូវីដ-១៩ និងជាពិសេស ការចូលរួមគាំទ្រការបោះឆ្នោតឃុំ-សង្កាត់ ឆ្នាំ២០២២ ហើយនឹងបន្តគាំទ្រដល់ការបោះឆ្នោតជ្រើសតាំងតំណាងរាស្ត្រ ឆ្នាំ២០២៣ នេះថែមទៀត។

គួរជម្រាបថា យុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ មានរយៈពេល ២១ថ្ងៃ ចាប់ពីថ្ងៃទី១ ដល់ថ្ងៃទី២១ ខែកក្កដា ឆ្នាំ២០២៣៕

ដោយ៖ ធឿន វ៉ាន់សុង