នាយករដ្ឋមន្រ្តីបច្ចុប្បន្ន និងអនាគតនាយករដ្ឋមន្រ្តីកម្ពុជា ងាកមកប្រើTikTok មានអ្នកគាំទ្រយ៉ាងច្រើន

តិកតុក ជាបណ្ដាញទំនាក់ទំនងសង្គមមួយដ៏មានប្រជាប្រិយភាពទាំងនៅក្នុងប្រទេសកម្ពុជា និងនៅលើសាកលលោក ដែលអនុញ្ញាតឱ្យអ្នកប្រើប្រាស់អាចបង្កើតមាតិកា ខ្លឹមសារវីដេអូ កម្សាន្ត ចំណេះដឹង ព័ត៌​មាន ផ្សព្វផ្សាយទៅកាន់អ្នកប្រើប្រាស់ឯទៀតបានយ៉ាងងាយស្រួល។ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងឯកឧត្តមបណ្ឌិត ហ៊ុន ម៉ាណែត បេក្ខជននាយករដ្ឋមន្រ្តីនាពេលអនាគតរបស់គណបក្សប្រជាជនកម្ពុជា ក៏កំពុងប្រើប្រាស់នូវបណ្តាញទំនាក់ទំនងសង្គមមួយនេះដែរ ដោយមានអ្នកតាមដាន(Followers) យ៉ាងច្រើនថែមទៀតផង។

គណនីតិកតុកផ្លូវការណ៍របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា មានឈ្មោះថា  Samdech Hun Sen ដែលគិតមកទល់ពេលបច្ចុប្បន្នមានអ្នកតាមដានជាង ២៥ម៉ឺននាក់ និងអ្នកចូលចិត្ត(Like) ចំនួនជាង ១.៥ លាននាក់។ ចំណែក គណនីតិកតុកផ្លូវការណ៍របស់ឯកឧត្ដមនាយឧត្តមសេនីយ៍ ហ៊ុន ម៉ាណែត  មេបញ្ជាការនៃបញ្ជាការដ្ឋានកងទ័ពជើងគោក មានឈ្មោះថា  Hun Manet ដែលគិតមកទល់ពេលបច្ចុប្បន្ន មានអ្នកតាមដានជាង ១៥ម៉ឺននាក់ និងអ្នកចូលចិត្ត(Like) ចំនួនជាង ១លាន ៦សែននាក់ហើយ។

ក្រៅពីសម្តេចតេជោ ហ៊ុន សែន និងឯកឧត្តមបណ្ឌិត ហ៊ុន ម៉ាណែត ក៏មានដែរនូវឥស្សរជនកម្ពុជាផ្សេងទៀតដែលកំពុងប្រើប្រាស់បណ្តាញទំនាក់ទំនងសង្គមតិកតុក។ ក្នុងនោះ មានរួម ឯកឧត្ដម ហ៊ុន ម៉ានី  តំណាងរាស្ត្រមណ្ឌលកំពង់ស្ពឺ និងជាជាប្រធានគណៈកម្មការទី៧នៃរដ្ឋសភាដែលទទួលបន្ទុក អប់រំ យុវជន កីឡា ទេសចរណ៍ ធម្មការ កិច្ចការសាសនា និង វប្បធម៌ មានឈ្មោះផ្លូវការណ៍ថា  Hun Many។ ឯកឧត្ដមឧត្តមសេនីយ៍ឯក ហ៊ុន ម៉ានិត  មេបញ្ជាការរងនៃបញ្ជាការដ្ឋានកងទ័ពជើងគោក មានគណនីតិកតុកឈ្មោះផ្លូវការណ៍ថា  Hun_Manith។

រីឯ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ  មានឈ្មោះគណនីតិកតុកផ្លូវការណ៍ថា  Yim ChhayLy  ខណៈគណនីតិកតុកផ្លូវការណ៍របស់លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនមានឈ្មោះផ្លូវការណ៍ថា  dpmkekimyan។ គណនីតិកតុករបស់លោក សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសវិញ មានឈ្មោះជាផ្លូវការណ៍ថា Sao Sokha07 ហើយគណនីតិកតុករបស់ លោក សាយ សំអាល់ រដ្ឋមន្ត្រីក្រសួងបរិស្ថាន មានឈ្មោះជាផ្លូវការណ៍ថា សាយ សំអាល់ Say Samal និងគណនីតិកតុកផ្លូវការណ៍របស់លោក ស សុខា រដ្ឋលេខាធិការក្រសួងអប់រំ យុវជននិងកីឡា មានឈ្មោះផ្លូវការណ៍ថា  sar sokha ស សុខា។ ក្រៅពីនេះ ក៏មានមន្រ្តីរដ្ឋាភិបាលជាច្រើនទៀត ដែលបាន និងកំពុងប្រើប្រាស់បណ្តាញទំនាក់ទំនងសង្គមតិកតុកនេះផងដែរ៕

ដោយ៖ ង៉ិល ណារ៉ាត់