ទឹកស្ទឹងពោធិ៍សាត់ ចាប់ផ្ដើមហក់ឡើងដោយជំនន់ទឹកភ្លៀង

នៅថ្ងៃទី១ ខែសីហា ឆ្នាំ២០២៣នេះ កម្ពស់ទឹកស្ទឹងពោធិ៍សាត់ ក្នុងខេត្តពោធិ៍សាត់ចាប់ផ្ដើមហក់ឡើង និងបានជនលិចផ្ទះប្រជាពលរដ្ឋមួយចំនួនដែលនៅជិតមាត់ស្ទឹង តែនៅមិនទាន់ដល់កម្រិតប្រកាសអាសន្ននោះទេ ពោលគឺស្ទឹងពោធិ៍សាត់មានកម្ពស់ ២.៧៨ម៉ែត្រ ខណៈកម្ពស់ប្រកាសអាសន្ន ៥ម៉ែត្រ។

លោក កែវ វ័យ ប្រធានមន្ទីរធនធានទឹក និងឧតុនិយមខេត្តពោធិ៍សាត់ បានឱ្យដឹងនាព្រឹកថ្ងៃទី១ ខែសីហា ឆ្នាំ២០២៣​នេះថា កម្ពស់ទឹកភ្លៀង២៤ម៉ោង លើ៦/៧ក្រុងស្រុក មាននៅក្រុងពោធិ៍សាត់ ៩.៧មីលីម៉ែត្រ ស្រុកវាលវែង ១.៥មីលី​ម៉ែត្រ ស្រុកបាកាន ១.៥មីលីម៉ែត្រ ស្រុកក្រគរ ២.២មីលីម៉ែត្រ ស្រុកកណ្តៀង ២០.៨មីលីម៉ែត្រ និងស្រុកតាលោ​សែន​ជ័យ ១.២មីលីម៉ែត្រ។

លោកប្រធានមន្ទីរបានបន្ថែមថា ចំពោះស្ថានភាពកម្ពស់ទឹកស្ទឹង និងទន្លេ ក្នុងនោះស្ទឹងពោធិ៍សាត់ មានកម្ពស់ ២.៧៨​ម៉ែត្រ (កម្ពស់ប្រកាសអាសន្ន ៥ម៉ែត្រ), ស្ទឹងក្រវ៉ាញ មានកម្ពស់ ២.៥១ម៉ែត្រ (កម្ពស់ប្រកាសអាសន្ន ៦ម៉ែត្រ), ស្ទឹងវាលវែង មានកម្ពស់ ២.៣ម៉ែត្រ (កម្ពស់ប្រកាសអាសន្ន ១០ម៉ែត្រ) និងទឹកទន្លេកំពង់លួង មានកម្ពស់ ២.០២ម៉ែត្រ៕