ក្រុមការងារ១០០រាត្រី អំពាវនាវអាមេរិកឱ្យបន្តផ្តល់ប្រព័ន្ធអនុគ្រោះពន្ធ GSP ដល់កម្ពុជា

ក្រុមការងារ១០០រាត្រី បានអំពាវនាវដល់អាមេរិក ឱ្យបន្តផ្តល់ប្រព័ន្ធអនុគ្រោះពន្ធ GSP ដល់កម្ពុជា ដើម្បីផ្សារភ្ជាប់ទំនាក់ទំនងរវាងប្រទេសទាំង២។ ក្រុមការងារ១០០រាត្រី ក៏បានអរគុណដល់រដ្ឋាភិបាលកម្ពុជា ដែលបានខិតខំគ្រប់បែបយ៉ាងដើម្បីរក្សាកំណើនសេដ្ឋកិច្ចកម្ពុជា។

GSP គឺជាកម្មវិធីអនុគ្រោះពាណិជ្ជកម្មដ៏សំខាន់មួយ ដែលបានដើរតួនាទីយ៉ាងសំខាន់ក្នុងការគាំទ្រដល់កំណើនសេដ្ឋកិច្ចរបស់កម្ពុជា សម្រួលដល់ការទទួលបានទីផ្សារសម្រាប់ទំនិញរបស់កម្ពុជា និងជំរុញឱកាសសេដ្ឋកិច្ចសម្រាប់ប្រជាពលរដ្ឋកម្ពុជា។ ជាច្រើនឆ្នាំមកនេះ កម្មវិធីនេះបានអនុញ្ញាតឱ្យឧស្សាហកម្មជាច្រើននៅកម្ពុជា ពិសេស នៅក្នុងវិស័យផលិតកម្ម និងកសិកម្ម មានឱកាសនាំផលិតផលទាំងនេះចូលទៅកាន់ទីផ្សារសហរដ្ឋអាមេរិកដោយមិនជាប់កាតព្វកិច្ច។

ប៉ុន្តែយ៉ាងណា ក្រុមការងារ១០០រាត្រី បានមើលឃើញថា អត្ថប្រយោជន៍របស់កម្មវិធី GSP គឺមិនមែនតែផ្ដល់ផលដល់កម្ពុជានោះទេ តែក៏បានរួមចំណែកដល់ភាពរុងរឿងរបស់សហរដ្ឋអាមេរិកផងដែរ។ តាមរយៈការអនុគ្រោះពាណិជ្ជកម្មដល់កម្ពុជានេះ សហរដ្ឋអាមេរិក ក៏បានក្លាយជាដៃគូដ៏សំខាន់ក្នុងការលើកកម្ពស់កំណើនសេដ្ឋកិច្ច ការបង្កើតការងារ និងកាត់បន្ថយភាពក្រីក្រនៅកម្ពុជា។

តាមរយៈសេចក្ដីថ្លែងការណ៍របស់ខ្លួន នៅថ្ងៃទី៤ ខែសីហា ក្រុមការងារ១០០រាត្រី បានលើកឡើងថា GSP បានពង្រឹងទំនាក់ទំនងសេដ្ឋកិច្ចទ្វេភាគីរវាងកម្ពុជា-សហរដ្ឋអាមេរិក និងជួយសម្របសម្រួលការផ្លាស់ប្តូរទំនិញ ក៏ដូចជាសេវាកម្មរវាងប្រទេសទាំង២ ផងដែរ។ ហេតុដូច្នេះ ក្រុមការងារ១០០រាត្រី បានស្នើសុំដោយការគោរពដល់រដ្ឋាភិបាលអាមេរិកឱ្យពិចារណាឡើងវិញក្នុងការបន្តប្រព័ន្ធ GSP សម្រាប់ប្រទេសកម្ពុជា។

ក្រុមការងារ១០០រាត្រី ជឿជាក់យ៉ាងមុតមាំថា ការបន្តប្រព័ន្ធអនុគ្រោះពន្ធ GSP នេះ នឹងផ្ដល់អត្ថប្រយោជន៍ដល់ប្រទេសទាំង២ កម្ពុជា-អាមេរិក ដោយជំរុញឱ្យមានទិដ្ឋភាពសេដ្ឋកិច្ចពិភពលោកកាន់តែរួមបញ្ចូល និងរីកចម្រើន។ ក្នុងនាមជាសង្គមស៊ីវិលតំណាងឱ្យភាគីពាក់ព័ន្ធ និងសហគមន៍នានា ក្រុមការងារ១០០រាត្រី ឈរលើការតស៊ូមតិសម្រាប់ការស្នើបន្ត GSP ដើម្បីលើកកម្ពស់កំណើនរួមគ្នានៃពាណិជ្ជកម្ម និងផលប្រយោជន៍ទៅវិញទៅមក៕