ទឹកស្ទឹងសង្កែខាងលើ ឡើងខ្លាំងគួរឱ្យបារម្ភ ពិសេសប្រជាពលរដ្ឋនៅប៉ែកខាងក្រោម

រយៈពេល ២ថ្ងៃកន្លងមកនេះ ទឹកស្ទឹងសង្កែនៅប៉ែកខាងលើ កំពុងស្ទុះឡើងខ្លាំង ដែលតម្រូវឱ្យពលរដ្ឋដែលរស់នៅជាប់មាត់ស្ទឹង ត្រូវបង្កើននូវការប្រុងប្រយ័ត្ន ពិសេសប្រជាពលរដ្ឋរស់នៅប៉ែកខាងក្រោម ព្រោះទឹកអាចហក់ឡើងខ្លាំងនៅពេលដ៏ខ្លីខាងមុខនេះ។

ជុំវិញបញ្ហាទឹកជំនន់នេះ លោក សើ សាម៉េត អភិបាលស្រុកសំឡូត បានឱ្យ “កម្ពុជាថ្មី” ដឹងនៅព្រឹកថ្ងៃទី៣ ខែកញ្ញា ឆ្នាំ២០២៣ នេះថា កាលពីយប់មិញនេះភ្លៀងបានធ្លាប់យ៉ាងខ្លាំងបន្ថែមទៀត ដែលធ្វើឱ្យស្ទឹងតាតោក និងតំបន់ស្ទឹងគ្រញូង មានភាពជោរជន់ខ្លាំងឡើង។

លោកសូមជូនដំណឹងដល់ប្រជាពលរដ្ឋដែលរស់នៅតាមបណ្តោយដងស្ទឹងក្នុងស្រុកសំឡូតទាំងអស់ ត្រូវមានការប្រយងប្រយ័ត្ន និងត្រូវរាយការណ៍ដល់អាជ្ញាធរជាបន្ទាន់ នៅពេលមានបញ្ហាណាមួយកើតឡើង ដើម្បីបញ្ជូនក្រុមសង្គ្រោះចុះទៅកាន់ទីនោះ។

បើតាមប្រភពមួយចំនួន បានបញ្ជាក់ប្រាប់ “កម្ពុជាថ្មី” ថា នៅព្រឹកថ្ងៃទី២ ខែកញ្ញា ម្សិលមិញនេះ ទឹកស្ទឹងនៅប៉ែកខាងក្បាលស្ទឹង គឺនៅតំបន់ក្បាលឡាន នៅដងស្ទឹងគ្រញូង កំពុងហក់ឡើងយ៉ាងខ្លាំង បណ្តាលឱ្យលិចលំនៅឋាន និងផលដំណាំរបស់ប្រជាពលរដ្ឋក្នុងឃុំចំនួន២ គឺឃុំតាតោក និងឃុំតាសាញ​ ស្រុកសំឡូត ខេត្តបាត់ដំបង។

ជំនន់ទឹកភ្លៀងនេះ បានធ្វើឱ្យផ្លូវលំមួយចំនួនក៏ត្រូវទឹកហូរកាត់ ក្រៅពីលិចផលដំណាំតាមបណ្តោយដងស្ទឹង៕

អត្ថបទ៖ សោ និយមរ័ត្ន