មកដឹងផលចំណេញដែលអ្នកប្រកបរបរសេដ្ឋកិច្ចក្រៅប្រព័ន្ធគួរចុះបញ្ជី

សម្តេច ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងនៅក្នុងពិធីប្រកាសដាក់ឱ្យដំណើរការជាផ្លូវការ នៃយុទ្ធសាស្ត្រជាតិ​ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៩ ថា ម្ចាស់សហគ្រាសមីក្រូធុនតូច និងមធ្យម ស្ថិតនៅក្នុង​សេដ្ឋកិច្ចក្រៅប្រព័ន្ធ ដែលបានចុះឈ្មោះដោយស្ម័គ្រចិត្តនៅក្នុងអន្តរកាលនេះ នឹងទទួលបានអត្ថបទយោជន៍​នៃការ​លើកលែងពិន័យនានា ក៏ដូចជាបំណុលពន្ធ ជាពិសេសរាជរដ្ឋាភិបាល នឹងផ្តល់ការលើកទឹកចិត្តលើពន្ធដារផងដែរ។

សម្តេច ហ៊ុន ម៉ាណែត បានលើកទឹកចិត្តដល់អ្នកប្រកបរបរក្នុងសេដ្ឋកិច្ចក្រៅប្រព័ន្ធឱ្យចុះបញ្ជី ដើម្បីទទួលផលចំណេញ​តាមរយៈគោលការណ៍ ៩ចំណុច ដូចខាងក្រោម៖

ទី១ ផ្តល់ការលើកលែងផាកពិន័យ និងបំណុលពន្ធទាំងអស់ ក្នុងឆ្នាំ ២០២៣-២០២៨ ចំពោះការមិនបានបំពេញ​អនុលោមភាពកន្លងមក ដើម្បីបើកច្រកឱ្យចូលក្នុងប្រព័ន្ធ ដោយមិនមានការព្រួយបារម្ភ។ ទី២ ផ្តល់ការលើកទឹក​ចិត្តផ្នែកពន្ធដារ សម្រាប់សហគ្រាសមីក្រូ ចំពោះការចុះបញ្ជីដោយស្ម័គ្រចិត្តនៅឆ្នាំ ២០២៣-២០២៨ ដោយលើក​លែងកម្រៃចុះបញ្ជីសេវាពន្ធដារ និងសេវាធ្វើបច្ចុប្បន្នភាព ជាដើម។ ទី៣ ផ្តល់ការលើកទឹកចិត្តផ្នែកពន្ធដារ ចំពោះ​សហគ្រាសមីក្រូធុនតូច ​តាមរយៈការលើកលែងទោសទណ្ឌ និងពិន័យបំណុលពន្ធ ចំពោះការមិន​បំពេញអនុលោម​ភាពកន្លងមកមុនការចុះបញ្ជី និងលើកលែងពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល និងពន្ធអប្បរមា​សម្រាប់ពីរឆ្នាំក្រោយពីចុះបញ្ជី។ ទី៤ ផ្តល់ការលើកទឹកចិត្តផ្នែកពន្ធដារ ចំពោះការចុះបញ្ជីដោយស្ម័គ្រចិត្តក្នុងឆ្នាំ ២០២៤-២០២៥ ដោយលើកលែងការពិន័យទោស និងបំណុលពន្ធ ចំពោះការមិនបំពេញ​អនុលោមភាពកន្លងមក​មុនពេលចុះបញ្ជី។ ទី៥ ​លើកលែងការបង់ពន្ធប៉ាតង់ រយៈពេល ២ឆ្នាំ បន្ទាប់ពីការចុះបញ្ជី។ ទី៦ កាត់បន្ថយថ្លៃសេវា​សម្រាប់ការផ្តល់សេចក្តីជូនដំណឹងបើកសហគ្រាស និងការចុះបញ្ឆិកាសៀវភៅបញ្ជីប្រចំាគ្រឹះស្ថាន ​និងសៀវភៅ​បើកប្រាក់ខែ សម្រាប់សហគ្រាសដែលមាននិយោជិតតិចជាង ៨នាក់។ ទី៧ ពង្រឹងយន្តការស្វ័យត្រួតពិនិត្យ និងពង្រឹង​អនុវត្តយន្តការក្រុមអធិការកិច្ចអន្តរក្រសួង នៅថ្នាក់ជាតិ ដើម្បីធានាការចុះអធិការកិច្ចរួមគ្នាក្នុងពេលតែមួយ និងមួយ​លើកក្នុងមួយឆ្នាំ។ ទី៨ ​រៀបចំការត្រួតពិនិត្យ និងអធិការកិច្ចរួមគ្នា ក្នុងពេលតែមួយ និងតែមួយលើកក្នុង​មួយឆ្នាំនៅថ្នាក់​ក្រោមជាតិ សម្រាប់គ្រប់សហគ្រាស ដែលបាន ឬមិនទាន់បានចុះបញ្ជី ឬស្នើសុំអាជ្ញាបណ្ណ ឬលិខិតអនុញ្ញាតផ្សេងៗ។ ទី៩ រៀបចំបង្កើតបទដ្ឋានគតិយុត្តក្រមខណ្ឌ និងយន្តការដែលផ្តល់ស្ថានភាពស្របច្បាប់ ជាសហគ្រាសធុនមីក្រូ និងតូច ដោយភ្ជាប់ជាមួយអត្ថប្រយោជន៍ផ្សេងៗ ដូចជាការលើកលែងការបង់ថ្លៃសេវារដ្ឋបាលនានា សម្រាប់រយៈពេល ៥ឆ្នាំ ជាដើម។

សម្តេច ហ៊ុន ម៉ាណែត បានគូសបញ្ជាក់ដូច្នេះថា« បងប្អូនមិនត្រូវបានបង្ខិតបង្ខំទេ បងប្អូនត្រូវបានលើកទឹកចិត្តខ្ពស់​ឱ្យចូលរួម នៅពេលដែលបងប្អូនចូលរួមដោយស្ម័គ្រចិត្ត បងប្អូននឹងទទួលបាននូវការលើកលែងពន្ធ លើកលែងការ​អនុគ្រោះនូវពិន័យផ្សេងៗពាក់ព័ន្ធនឹងការធ្វើអនុលោមភាព ក៏ដូចជាពន្ធលើកទឹកចិត្តផ្សេងៗ។ លើសពីនេះទៀត នឹងទទួលបានការបណ្តុះបណ្តាលនានា ទាក់ទិននឹងការអភិវឌ្ឍការគ្រប់គ្រងសហគ្រាស ជាដើម។

សម្តេចនាយករដ្ឋមន្រ្តី បានសង្កត់ធ្ងន់ថា ការចុះបញ្ជីនេះ នឹងផ្តល់លទ្ធភាពដល់ម្ចាស់សហគ្រាសទទួលបាន​នូវហិរញ្ញប្បទាន​​​ពីធនាគារ​ដែលមានអត្រាការប្រាក់សមរម្យផងដែរ៕