ក្រុមព្រះសុរិយា នឹងរៀបចំកម្មវិធី១ម៉ឺនអាល័យលើកទី៧ នៅដើមខែក្រោយ ដើម្បីរំលឹកខួបទទួលឯករាជ្យ៧០ឆ្នាំ

ក្រុមព្រះសុរិយា នឹងរៀបចំកម្មវិធី ១ម៉ឺនអាល័យលើកទី៧ រយៈពេល៤ថ្ងៃ ដើម្បីអបអរសាទរដល់ខួបលើកទី៧០ នៃទិវាឯករាជ្យជាតិ និងអបអរខួប៧០ព្រះវស្សា នៃទិវារំលឹកថ្ងៃព្រះរាជសម្ភព ព្រះករុណា ព្រះបាទសម្តេច ព្រះនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

កម្មវិធី១ម៉ឺនអាល័យលើកទី៧នេះ ធ្វើឡើងចាប់ពីថ្ងៃទី១ ដល់ថ្ងៃទី៤ ខែវិច្ឆិកា ឆ្នាំ២០២៣ នៅសាលមជ្ឈមណ្ឌលសហប្រតិបត្តិការកម្ពុជាកូរ៉េ ក្នុងបរិវេណសាកលវិទ្យាល័យភូមិន្ទភ្នំពេញ ដោយមិនគិតថ្លៃ និងមានការបញ្ចាំងភាពយន្ត ការប្រគំតន្រ្តី តាំងពិព័រណ៍ព្រះរាជសកម្មភាព  និងផ្សារសិប្បកម្មផលិតផលខ្មែរផងដែរ។ កម្មវិធីនេះនឹងចាប់ផ្តើមពីម៉ោង៨៖៣០នាទីព្រឹក ដល់ម៉ោង ១៦៖៣០នាទីរសៀលទាំង៤ថ្ងៃ។

ក្រៅពីគោលបំណងទាំង២ខាងលើ កម្មវិធីនេះ ក៏ចង់បណ្តុះស្មារតីរបស់យុវជនសម័យថ្មី ឱ្យចេះស្រឡាញ់ គោរព ដឹងគុណចំពោះបុព្វបុរសខ្មែរ និងព្រះមហាក្សត្រខ្មែរគ្រប់ព្រះអង្គ  ជាពិសេស ព្រះករុណា ព្រះមហាវីរក្សត្រ ព្រះបរមរតនកោដ្ឋ ជាគោរពសក្ការៈដ៏ខ្ពង់ខ្ពស់បំផុត។ មិនតែប៉ុណ្ណោះ ថែមទាំងចង់ផ្សព្វផ្សាយភាពយន្តខ្មែរ ដែលសល់ពីរបបខ្មែរក្រហម ឱ្យមហាជន និងយុវជនបានទស្សនា សិក្សាស្វែងយល់ពីបទពិសោធជីវភាព ការរស់នៅ សេដ្ឋកិច្ច វប្បធម៌ សិល្បៈ សីលធម៌ របស់ប្រជារាស្ត្រតាមរយៈភាពយន្ត។

សម្រាប់កម្មវិធីមួយនេះ នឹងមានបង្ហាញពីការបញ្ចាំងភាពយន្តខ្មែរដែលសល់ពីសង្រ្គាម ចម្រៀងច្រៀងសរសើ និងថ្វាយព្រះរាជល័យ ពីសង្គមរាស្ត្រនិយម  និងចម្រៀងតែងនិពន្ធថ្មី ចម្រៀងថ្វាយព្រះពរ ព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា និងការបញ្ចាំងភាពយន្តឯកសារក្នុងការទាមទារឯករាជ្យ។ ក៏មានដែរ ការតាំងពិព័រណ៍ស្តីពីព្រះរាជបេសកម្មក្នុងការទាមទារ ឯករាជ្យជាតិ ការតាំងពិព័រណ៍ស្តីពី ព្រះរាជបេសកកម្ម ព្រះករុណា ជាអម្ចាស់ជីវិតលើត្បូង ព្រះមហាក្សត្រនៃព្រះរាជាណចក្រកម្ពុជា ផ្សារសិប្បកម្មផលិតផលខ្មែរ មកពីខេត្តសៀមរាប និងរាជធានីភ្នំពេញ ព្រមទាំងមានមហោស្រពចាប៉ីដងវែង និងមហោស្រពអាហារបួសផងដែរ។

សូមជម្រាបថា កម្មវិធី១ម៉ឺនអាល័យ ត្រូវបានរៀបចំ ៦លើកមកហើយ នៅឆ្នាំ២០២៣នេះ គឺជាលើកទី៧ របស់កម្មវិធី១ម៉ឺនអាល័យ។ កម្មវិធី១ម៉ឺនអាល័យលើកទី១ ត្រូវបានចាប់ផ្តើមរៀបចំតាំងពីឆ្នាំ២០១៦មកម្ល៉េះ៕