អភិបាល​រង​រាជធានី​៖ ​ការ​ថែ​រក្សា​សន្តិភាព ស្មើ​នឹង​ថែ​រក្សា​ជីវិត​ខ្លួន​ឯង ​សូម​ប្រជាពលរដ្ឋ​ថែ​ រក្សា​ ​​សន្តិភាព​ឱ្យ​បាន​គង់​វង់

លោក កើត ឆែ​អភិបាល​រង​រាជធានី​ភ្នំពេញ​បាន​ស្នើ​សុំ​ឱ្យ​បង​ប្អូន​ប្រជាពលរដ្ឋ​ថែរក្សា​សន្តិភាព ​ ដោយ​ការ​ថែរក្សា​សន្តិភាព ស្មើ​នឹង​ថែ​រក្សា​ជីវិត​ខ្លួន​ឯង។ប្រជា​ទេស​ជាតិ​មាន​សន្តិភាព​ គឺ​មាន​អ្វី​ៗ​គ្រប់យ៉ាង សុំ​បន្ត​ចូល​រួម​ថែ​រក្សា​សន្តិភាព​នេះ​ឱ្យ​នៅ​គង់​វ​ង់​ ដើម្បី​បន្ត​អភិវឌ្ឍន៍​ប្រទេស​ជាតិ​​​ឱ្យ​កាន់​តែ​រីក​ចំរើន​បន្ថែម​ទៀត​។

លោក កើត ឆែ បានលើកឡើងនៅព្រឹកថ្ងៃទី ៣០ ខែ វិច្ឆិកា ឆ្នាំ២០២៣នេះ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី៣ ឆ្នាំ២០២៣ នៅវិមានពិភពថ្មីសែនសុខ ខណ្ឌសែនសុខ រាជធានីភ្នំពេញ។

វេទិកាផ្សព្វផ្សាយនេះ ប្រជាពលរដ្ឋបានលើកឡើងនូវសំណើ សំណូមពរយ៉ាងផុលផុសដោយសុំឱ្យអាជ្ញាធររាជធានីភ្នំពេញជួយដោះស្រាយនូវទុក្ខកង្វល់របស់ពួគគាត់ដូចជា ការស្នើសុំស្ថាបនាផ្លូវ លូ, សុំដាក់បង្គោលភ្លើង និងកាត់ខ្សែភ្លើងរញ៉េរញ៉ៃ, ស្នើសុំពន្លឿនធ្វើប្លង់កម្មសិទ្ធិដីធ្លីចំនួន ៨២ គ្រួសារ, សុំដោះស្រាយបញ្ហាសំរាមដែលប្រជាពលរដ្ឋយកមកបោះ​ចោលលើផ្លូវ បង្កឱ្យស្អុយប៉ះពាល់សុខភាព, សុំជួយស្តារប្រឡាយ, សុំកាត់មែកឈើនៅក្នុងវិទ្យាល័យភ្នំពេញថ្មីជាដើម។ រាល់សំណើសំណូមពរខាងលើត្រូវបានលោក កើត ឆែ ដោះស្រាយជូនប្រជាពលរដ្ឋភ្លាមៗតែម្តង។

លោក កើត ឆែ បានមានប្រសាន៍ថា៖ វេទិកាផ្សព្វផ្សាយនេះ ប្រជាពលរដ្ឋបានលើកឡើងជាសំណើ សំណូមពរផ្ទាល់មាត់ចំនួន១២នាក់ និងសំណើរជាលាយល័ក្ខអក្សរដាក់ចូលក្នុងប្រអប់សំបុត្រចំនួន ៥៤ សំបុត្រ។

លោកបន្តថា ចំពោះសំណើរទាំងអស់របស់ប្រជាពលរដ្ឋ អ្វីដែលដោះស្រាយបានរដ្ឋបាលរាជធានី ដោះស្រាយភ្លាមៗ ដូចជានការស្តារប្រឡាយ លូ ធ្វើផ្លូវ យើងបានដាក់ក្នុងគម្រោងអាទិភាព នឹងប្រជុំដោះស្រាយភ្លាម។

បញ្ហាសំរាម លោកសុំឱ្យសង្កាត់ ខណ្ឌសហការជួយក្រុមហ៊ុនប្រមូលសំរាម ដើម្បីសម្អាត និងត្រូវដាក់កម្លាំងប្រចាំការដើម្បីឃាត់ពលរដ្ឋមកពីក្រៅភូមិ យកសំរាមមកចាក់ចោលនៅទីតាំងនេះ។ សូមបងប្អូនចូលរួមទុកដាក់សំរាមឱ្យបានល្អ។ លោកថា បើគ្មានការចូលរួមពីប្រជាពលរដ្ឋទេ សំរាមនៅតែជាបញ្ហារហូតមិនស្អាតនោះទេ។ ដូចជាពេលនេះអញ្ចឹង បងប្អូនយើងបានចូលរួមក្នុងការរក្សា សន្តិភាព មានសន្តិភាពគឺមានអ្វីៗគ្រប់យ៉ាងទាំងអស់។ លោកសុំឱ្យន្តចូលរួមរក្សាសន្តិភាពនេះអោយបានគង់វង់ ដើម្បីបន្តអភិវឌ្ឍន៍ប្រទេសជាតិឱ្យកាន់តែរីកចំរើនបន្ថែមទៀត។

លោក ជួប ខុន បានលោកឡើងថា៖ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ ផ្តោតសំខាន់ពាក់ព័ន្ធនិងកង្វល់ផ្ទាល់របស់ប្រជាពលរដ្ឋ ដែលមាន បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៍នៅមូលដ្ឋាន ដើម្បីឱ្យអាជ្ញាធរមានដឹងលឺ និងរកយន្តការដោះស្រាយជូន។

សម្រាប់ការចូលរួមមតិយោបល់ និងលើកឡើងនូវសំណើ សំណួរ សំណូមពររបស់ប្រជាពលរដ្ឋ ពិតជាបាននាំមកនូវសក្តានុពលយ៉ាងធំធេង និងបានធ្វើឲ្យរដ្ឋបាលរាជធានីភ្នំពេញ ឆ្លុះបញ្ចាំងនូវចំណុចអសកម្មនារបស់ខ្លួនពេលកន្លងមក ដើម្បីធ្វើការកែលម្អឡើងវិញ និងអភិវឌ្ឍន៍ក្នុងមូលដ្ឋានឲ្យបានល្អប្រសើរ និងស្វែងរកនូវដំណោះស្រាយ ជូនប្រជាពលរដ្ឋឲ្យមានតម្លាភាព និងមានប្រសិទ្ធភាព ក្នុងនាមជាតំណាងឲ្យរដ្ឋបាលសាធារណៈ៕

អត្ថបទ៖ ស្រីរ័ត្ន