លោក នេត សាវឿន ជំរុញមន្ត្រីគ្រប់រូបក្នុងខេត្តកំពង់ចាម បន្តបម្រេីពលរដ្ឋគិតលើគុណធម៌ និងគុណភាព

លោក នេត សាវឿន ឧបនាយករដ្ឋមន្ត្រី និងក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម ក្រើនរំលឹកដល់មន្ត្រីគ្រប់ជាន់ថ្នាក់នៃខេត្តកំពង់ចាម ត្រូវធ្វើយ៉ាងណាបំពេញតួនាទី និងភារកិច្ចរបស់ខ្លួនឲ្យបានល្អប្រកបដោយតម្លាភាព និងសមត្ថភាពជូនដល់ប្រជាពលរដ្ឋ។

លោក នេត សាវឿន ឧបនាយករដ្ឋមន្ត្រី នៃព្រះរាជាណាចក្រកម្ពុជា ថ្លែងបែបនេះក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តកំពង់ចាម នារសៀល ថ្ងៃទី២៦ ខែធ្នូ ឆ្នាំ២០២៣ នៅសាលាខេត្តកំពង់ចាម។ នៅក្នុងឱកាសនេះ លោក នេត សាវឿន ក៏បានស្នើឲ្យមន្ត្រីទាំងអស់ត្រូវពង្រឹងសន្តិសុខសង្គមឲ្យល្អប្រសើរដោយប្រជាពលរដ្ឋរស់នៅដោយសុខដុមរមនាក្រោមដំបូលសុខសន្តិភាព និងការអភិវឌ្ឍ ដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។

ទន្ទឹមនេះ លោក នេត សាវឿន ក៏ជំរុញឲ្យក្រុមការងាររាជរដ្ឋាភិបាលទាំងអស់ ត្រូវចេះសហការជាមួយមន្ត្រីនៅមូលដ្ឋានយ៉ាងស្អិតរមួត ពោល គឺក្នុងបុព្វហេតុបម្រើសេវាសាធារណៈដល់ពលរដ្ឋឱ្យបានល្អ និងបន្តការអនុវត្តគោលនយោបាយរបស់រាជរដ្ឋាភិបាលឲ្យតាម ភូមិ ឃុំ មានសុវត្ថិភាព និងការពារសុវត្ថិភាព សណ្តាប់ធ្នាប់ និងបន្តរៀបចំខ្លួនឲ្យមានសមត្ថភាពខ្ពស់ក្នុងការបម្រើពលរដ្ឋ៕

អត្ថបទ៖ ឡេក ចាន់ពេជ្រ