អភិបាល​ខេត្តក្រចេះ ក្រើន​រំលឹក​ឲ្យ​មន្រ្តីរាជការ ត្រូវធ្វើខ្លួនឲ្យល្អជាគម្រូដល់សាធារណ:ជន

ថ្លែងក្នុងអង្គសន្និបាតបូកសរុបលទ្ធផលការងារប្រចាំឆ្នាំ ២០២៣ និងលើកទិសដៅអនុវត្តបន្តឆ្នាំ ២០២៤ កាលពី​ព្រឹកថ្ងៃទី២៦ ខែធ្នូ ឆ្នាំ២០២៣ លោក វ៉ា ថន អភិបាលខេត្តក្រចេះបានក្រើនរំលឹកដល់មន្រ្តីរាជការក្រោមឱវាទទាំងអស់ ត្រូវធ្វើខ្លួនឲ្យល្អជាគម្រូដល់សាធារណ:ជន និងប្រជាពលរដ្ឋ ក្នុងការគោរពច្បាប់បទដ្ឋាននានា ច្បាប់ចរាចរណ៍ និងបញ្ហាគ្រឿងញៀន ជាពិសេសមន្រ្តីបម្រើសេវាច្រកចេញចូលតែ១ ត្រូវប្រកាន់ខ្ជាប់នូវក្រមសីលធម៌ វិជ្ជាជីវៈ តម្លាភាព និងរហ័សទាន់ពេល ស្របទៅនឹងបរិបទសង្គមបច្ចុប្បន្នទំនើបលើប្រពន្ធឌីជីថល និងនវានុវត្តន៍ ហាមដាច់ខាតការប្រើប្រាស់នូវសាធាតុ​ញៀន ករណីឃើញថាមានជាប់ពាក់ព័ន្ធ រដ្ឋបាលខេត្តនឹងចាត់វិធានការផ្លូវច្បាប់និងលុបឈ្មោះចេញពីក្របខណ្ឌមន្រ្តីរាជការ។

ថ្លែងនៅក្នុងអង្គសន្និបាត​ដែលមាន​ការ​ចូលរួម​ពីប្រធាន​ក្រុមប្រឹក្សាខេត្ត​ផង​នោះ លោកអភិបាល​ខេត្តបាន​ជំរុញ​ឲ្យ​មន្រ្តី​ត្រូវខិតខំរួមគ្នាបំពេញការងារ និងដោះស្រាយនូវបញ្ហាកើតមានពិសេសបញ្ហាគ្រឿង​ញៀន ក្មេងទំនើង ល្បែងស៊ីសង អំពើហឹង្សាដោយជាក្រុមយុវជនសិស្សសាលា និងការគ្រប់គ្រងធនធានធម្មជាតិ ដែលបាននឹងកំពុងកើតមានក្នុងមូលដ្ឋាន។

លោកបន្ត​ថា អាជ្ញាធរឃុំត្រូវម្ចាស់ការខ្ពស់ក្នុងការសហការជាមួយសមត្ថកិច្ច ក្នុងការចាប់បង្រាប់ទប់ស្កាត់កុំឲ្យកើតមានបន្តទៀត ដើម្បីរក្សាឲ្យបាននូវសុខសុវត្ថិភាព ស្ថិរភាពជូនប្រជាពលរដ្ឋមូលដ្ឋាន ស្របទៅនឹងគោលនយោបាយភូមិឃុំមានសុវត្ថិភាព និងជាឆ្លើយតបទៅនឹងចក្ខុវិស័យរបស់រាជរដ្ឋាភិបាល។ ជាពិសេស ត្រូវបន្តតាមដានការវិវត្តប្រែប្រួលនៃសភាពការណ៍តំបន់ និងអន្តរជាតិ ព្រមជាមួយនឹងការពង្រឹងសភាពការណ៍ផ្ទៃក្នុង សំដៅដាក់ចេញនូវយុទ្ធសាស្ត្រ និងវិធានការនានាប្រកប​ដោយ​ប្រសិទ្ធភាពខ្ពស់ ក្នុងការរក្សាសន្តិសុខ សណ្តាប់សាធារណៈ សុវត្ថិភាពសង្គមឱ្យបានល្អប្រសើរ ដើម្បីបង្កបរិយាកាស​អំណោយផលដល់ការអភិវឌ្ឍសេដ្ឋកិច្ចសង្គមជាបន្តទៀត។

លោកអភិបាលខេត្តលើកឡើង​ថា ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នីតិកាលទី ៧ នៃរដ្ឋសភា ដែលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព និងកំណត់យកនូវអាទិភាពគន្លឹះចំនួន ៥៖ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល។ ប្រកាន់យកទស្សនវិស័យវែងឆ្ងាយដោយកំណត់ទិសដៅអាទិភាព និងអនុវត្តជា ៥ ដំណាក់កាលឈានឆ្ពោះទៅសម្រេចចក្ខុវិស័យវែងឆ្ងាយ ឈរលើបេសកកម្មជាប្រវត្តិសាស្រ្តចម្បងពីរ៖ (ទី១) ថែរក្សានិងថែបំប៉នសុខសន្តិភាពដែលសម្រេចបានមកដោយលំបាកនិង (ទី២) កសាងនិងពង្រឹងមូលដ្ឋានគ្រឹះសម្រាប់ជំរុញសន្ទុះនៃការអភិវឌ្ឍប្រទេសជាតិ ដោយត្រូវខិតខំប្រែក្លាយខ្លួនជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងឆ្ពោះទៅសម្រេចបានចក្ខុវិស័យកម្ពុជាមានចំណូលខ្ពស់ នៅឆ្នាំ២០៥០៕

អត្ថបទ៖ ប្រុញ វិធិន