ផ្លូវ​ទៅ​អន្លង់ផ្សោតកាំពី និង​វត្ត​សសរ ១០០ ក្រាល​កៅស៊ូ​បញ្ចប់​ ១០០% ធ្វើ​ដំណើរ​​​​ទៅ​មក​កាន់តែ​ងាយ​ស្រួល

សមិទ្ធផលថ្មីស្ពានក្រគរ និងផ្លូវខេត្តលេខ ៣៧៧ ចាប់ពីរង្វង់មូលព្រាបសរ ក្នុងក្រុងក្រចេះ តភ្ជាប់ដល់ស្រុកសំបូរ ដោយ​ឆ្លង​កាត់​ទៅ​រមណីយដ្ឋាន​អន្លង់ផ្សោត​កាំពីនិង​វត្ត​សសរ ១០០ ត្រូវបានស្ថាបនាសាងសង់រួចរាល់​បើក​ឲ្យ​ប្រើប្រាស់ជាបណ្តោះអាសន្ន ចាប់ពីព្រឹកថ្ងៃទី ២៦ ខែមីនា ឆ្នាំ២០២៥ តទៅ។ នេះបើ​តាមការឲ្យដឹងពីអាជ្ញាធរខេត្តក្រចេះនៅព្រឹកនេះ។

ជាមួយសមិទ្ធផលថ្មីនេះដែរ បានលើកកម្ពស់សោភ័ណភាពទីរួមខេត្តក្រចេះ និង​ចូលរួមកាត់បន្ថយបញ្ហាចរាចរណ៍ ធ្វើឲ្យការ​ធ្វើដំណើរពីតំបន់មួយទៅតំបន់មួយកាន់តែងាយស្រួលប្រសើរឡើង និង​បានជួយជំរុញដល់វិស័យទេសចរណ៍ កសិកម្ម និងសេដ្ឋកិច្ចនៅមូលដ្ឋាន និងតំបន់ជិតខាងឲ្យកាន់តែរីកចម្រើនថែមទៀត។

ផ្លូវខេត្តលេខ ៣៧៧ ដើរតួយ៉ាងសំខាន់ក្នុងវិស័យទេសចរណ៍ ដោយបានតភ្ជាប់ទៅតំបន់អេកូទេសចរណ៍ធម្មជាតិ និងប្រវត្តិសាស្រ្តសំខាន់ៗមួយចំនួនរបស់ខេត្តនៅភាគឦសាន្តដូចជា៖ វត្តភ្នំសំបុក អន្លង់ផ្សោតកាំពី ទឹកជួរកាំពី ព្រះវិហារធំ​សរសរ ១០០ និងតំបន់ទេសចរណ៍សំខាន់​ៗជាច្រើនទៀត។

លោក អ៊ុង ផល្លេ អភិបាលរងក្រុងក្រចេះបានឲ្យកម្ពុជាថ្មីដឹងនៅព្រឹកនេះថា ក្នុងនាមអាជ្ញាធរក្រុងនិងប្រជាពលរដ្ឋ ពិតជាមានសេចក្តីត្រេកអរចំពោះសមិទ្ធផលថ្មីនេះ មានស្ពាន និងផ្លូវលេខ ៣៧៧ ដែលរាជរដ្ឋាភិបាលបានខិតខំយកចិត្តទុកដាក់​ពីសុខទុក្ខ និង​ការលំបាកក្នុងការធ្វើដំណើរកន្លងមក៕

អត្ថបទ៖ ប្រុញ វិធិន