ជំរឿនសេដ្ឋកិច្ច រកឃើញសហគ្រាស ៨១ភាគរយ ទទួលរងផលប៉ះពាល់​ពីវិបត្តិកូវីដ-១៩

វិបត្តិជំងឺរាតត្បាតកូវីដ-១៩ មានផលប៉ះពាល់អវិជ្ជមានគួរឱ្យកត់សម្គាល់ទៅលើសកម្មភាពអាជីវកម្មតាមទម្រង់ជាច្រើន ដូចជា ចំណូលមានការធ្លាក់ចុះ ការចំណាយកើនឡើង តម្រូវការទីផ្សារថយចុះ និងកង្វះដើមទុនបង្វិល​សម្រាប់​ដំណើរការ​អាជីវកម្មជាដើម។

របាយការណ៍វិភាគលទ្ធផលជំរឿនសេដ្ឋកិច្ចឆ្នាំ ២០២២ បានបង្ហាញថា មានសហគ្រាសប្រមាណ ៨១%  បានទទួលរង​ផលប៉ះពាល់ពីជំងឺកូវីដ-១៩ និងបានជះឥទ្ធិពលលើវិស័យសំខាន់ៗភាគច្រើន រួមទាំងសកម្មភាពក្នុងផ្នែកផលិត​កម្មកម្មន្តសាល ពាណិជ្ជកម្មលក់ដុំ និងលក់រាយ សកម្មភាពផ្នែកស្នាក់នៅ និងសេវាចំណីអាហារផងដែរ។

លទ្ធនៃការជំរឿនសេដ្ឋកិច្ច បានឱ្យដឹងទៀតថា ក្នុងចំណោមអាជីវកម្មដែលទទួលរងផលប៉ះពាល់ពីជំងឺរាតត្បាតកូវីដ-១៩ មានប្រមាណជាង ៥៨ម៉ឺនករណី ស្មើនឹង ៣៤,៨% ដែលបានរាយការណ៍ថា ចំណូលធ្លាក់ចុះនៅក្នុងឆ្នាំ២០២២។ ដោយឡែកសហគ្រាសប្រមាណជាង ៤៣ម៉ឺនករណី ស្មើនឹង ២៦,៦% បានរាយការណ៍ថា ការចំណាយមាន​ការកើនឡើង។ ចំណែកសហគ្រាសប្រមាណជាង ២១ម៉ឺនករណី ស្មើនឹង ១២,៦% បានរាយការណ៍ថា ​តម្រូវការ​ទីផ្សារបាន​ថយចុះ។ សហគ្រាសចំនួនជាង ១៥ម៉ឺន ករណី ស្មើនឹង ៩,១% កង្វះដើមទុន​បង្វិលសម្រាប់​ដំណើរការ​អាជីវកម្ម។

យោងតាមលទ្ធផលជំរឿនសេដ្ឋកិច្ច បានបង្ហាញឱ្យដឹងថា អាជីវកម្ម​ដែល​កំពុង​បើក​ដំណើរការ​នៅ​ប្រទេស​កម្ពុជា​ គិតត្រឹមថ្ងៃទី០១ ខែ​មីនា ឆ្នាំ​២០២២ មាន​ជាង ៧៥ ម៉ឺន​សហគ្រាស។ ក្នុង​ចំណោម​អង្គភាព​សេដ្ឋកិច្ច​ជាង ៧៥ ម៉ឺន​សហគ្រាស គ្រប​ដណ្តប់​​ដោយ​អង្គភាព​សេដ្ឋកិច្ច​ធ្វើ​សកម្មភាព​អាជីវកម្ម​តាម​ចិញ្ចើម​ផ្លូវ​​មាន​ជាង ១០%។

លទ្ធផលបង្ហាញទៀតថា មានអាជីវកម្មភាគច្រើនបំផុត គឺនៅរាជធានីភ្នំពេញ មានប្រមាណជិត ១៥ម៉ឺនសហគ្រាស ស្មើនឹង ២០% នៃអាជីវកម្មសរុប ដោយក្នុងនោះនៅខេត្តកណ្តាល មានប្រមាណជាង ៥ម៉ឺន៧ពាន់សហគ្រាស ស្មើនឹង ៧,៦%។ នៅខេត្តសៀមរាប មានប្រមាណជាង ៥ម៉ឺនសហគ្រាស ស្មើនឹង ៦,៧%។ នៅខេត្តបាត់ដំបង មានប្រមាណជិត ៥ម៉ឺន សហគ្រាស ស្មើនឹង ៦,៦% និងខេត្តតាកែវមានចំនួនជាង ៤ម៉ឺនសហគ្រាស ស្មើនឹង ៦,០%។

ប្រភពដដែលបញ្ជាក់ថា រាជធានីភ្នំពេញ ស្ថិតនៅលំដាប់ទីមួយនៅឆ្នាំ២០២២ ដែលអាជីវកម្មបានផ្តល់ការងារ​ប្រមាណ​ជាង ៩៣ម៉ឺននាក់ ស្មើនឹង ៣១,២%។ ខេត្តកណ្តាលមានអ្នកចូលរួមការងារប្រមាណជិត ៣០ម៉ឺននាក់ ស្មើនឹង ៩,៦%។ នៅខេត្តកំពង់ស្ពឺ ប្រមាណជាង ២០ម៉ឺននាក់ ស្មើនឹង ៦,៩% ខេត្តតាកែវ មានប្រមាណ ១៦ម៉ឺននាក់ ស្មើនឹង ៥,៦%។ និងនៅខេត្តស្វាយរៀងមានជាង ១៥ម៉ឺននាក់នាក់ ស្មើនឹង ៥%៕