ភ្ញៀវទេសចរជាង៣០មុឺននាក់ ទៅឆ្លងឆ្នាំនៅសៀមរាប

រយៈពេល៣ថ្ងៃ ចាប់ពីថ្ងៃទី៣០ធ្នូ ២០២៣ ដល់ថ្ងៃទី០១ ខែមករា ឆ្នាំ២០២៤ មានភ្ញៀវទេសចរជាង៣០ម៉ឺននាក់បានទៅលេងឆ្លងឆ្នាំនៅខេត្តសៀមរាប។ នេះបើតាមរបាយការណ៍របស់មន្ទីរទេសចរណ៍ខេត្តសៀមរាប។

លោក ង៉ូវ សេងកាក់ បានឱ្យដឹងថា ភ្ញៀវទេសចំនួន៣០ ៤0៦៤នាក់ មកពីបណ្តារាជធានី ខេត្ត ដែលភាគច្រើនជាភ្ញៀវទេសចរណ៍ជាតិ បានចូលមកដើរកម្សាន្ត នៅតាមរមណីយដ្ឋាននានាក្នុងខេត្តសៀមរាប។ បើតាមការប៉ាន់ស្មាន ភ្ញៀវទេសចរទាំងនោះ   គឺមកពីបណ្តារាជធានី ខេត្ត និងក្នុងខេត្ត ក្នុងដំណើរកម្សាន្តជាលក្ខណៈគ្រួសារ មានប្រមាណ ២៩៥០០០នាក់ និង ភ្ញៀវទេសចរណ៍បរទេស ៩០៦៤នាក់ ។

 បើតាមរបាយការណ៍ដដែលគោលដៅសំខាន់ៗនៃដំណើរកម្សាន្ត មានដូចជារមណីយដ្ឋានអង្គរ , រមណីយដ្ឋានឧទ្យានជាតិភ្នំគូលែន,តំបន់ទន្លេសាប,សហគមន៍ទេសចរណ៍-អេកូទេសចរណ៍និងតំបន់ផ្សេងៗក្នុងខេត្ត ។ តាមការកត់សម្គាល់ បណ្តាភ្ញៀវទេសចរទាំងនោះ បានជួបជុំគ្នាកម្សាន្តពេលរាត្រីឆ្លងឆ្នាំនៅក្រុងសៀមរាប ដូចជានៅផាប់ស្រ្ទីត និងនៅសួនច្បារព្រះរាជដំណាក់ផងដែរ៕      

អត្ថបទដោយ៖ គឿន វេត