ក្រសួងមហាផ្ទៃ គ្រោងពិនិត្យរកសារធាតុញៀនលើមន្ត្រីរាជការស៊ីវិល

បច្ចុប្បន្ននៅតាមបណ្ដាស្នងការរាជធានីខេត្តមួយចំនួនបាននិងកំពុងធ្វើការពិនិត្យស្វែងរកសារធាតុញៀនលើមន្ត្រីកងកម្លាំងនគរបាលជាតិ បន្ទាប់ពីមានការណែនាំពីឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃកាលពីពេលកន្លងទៅ។ ហើយក៏បានរកឃើញមន្ត្រីនគរបាលមួយចំនួនមានការជាប់ពាក់ព័ន្ធជាមួយសារធាតុញៀន និងបានអនុវត្តវិន័យកងកម្លាំងនគរបាលជាតិជាបន្តបន្ទាប់រួចហើយដែរ។

អ្នកនាំពាក្យរងក្រសួងមហាផ្ទៃ ក៏បានបញ្ចាក់ដែរថា ក្រសួងមហាផ្ទៃ នឹងបន្តអនុវត្តកិច្ចការងារនេះលើមន្ត្រីរាជការស៊ីវិលបន្តទៀតក្រោយពេលបញ្ចប់ការពិនិត្យរកសារធាតុញៀនលើមន្ត្រីកងកម្លាំងនគរបាលជាតិ។

លោក ទូច សុខៈ អ្នកនាំពាក្យរងក្រសួងមហាផ្ទៃ បានប្រាប់ កម្ពុជាថ្មី នៅព្រឹកថ្ងៃទី៩ ខែមករា ឆ្នាំ២០២៤នេះថា «ជាការពិត ការពិនិត្យស្វែងរកសារធាតុញៀននឹងបន្តអនុវត្តលើមន្ត្រីរាជការស៊ីវិលបន្ថែមទៀត តែបច្ចុប្បន្នផ្នែកកងកម្លាំងមិនទាន់បញ្ចប់នៅឡើយទេ»។

បើតាមលោក ទូច សុខៈ មកដល់បច្ចុប្បន្ន ការពិនិត្យស្វែងរកសារធាតុញៀនលើមន្ត្រីកងកម្លាំងនគរបាលជាតិជាបណ្ដោះ​អាសន្ន អាចនិយាយបឋមថា មានមន្ត្រីកងកម្លាំងនគរបាលជាតិចន្លោះពី៤០ទៅ៥០នាក់ ដែលកម្លាំងជំនាញបានរកឃើញមានការជាប់ពាក់ព័ន្ធជាមួយសារធាតុញៀន តែតួលេខច្បាស់ការយ៉ាងណានោះ លោកមិនទាន់អាចបញ្ជាក់បាននៅឡើយទេ ខណៈកម្លាំងជំនាញកំពុងបូកសរុប។

គួររំលឹកថា កាលពីថ្ងៃទី១៨ ខែធ្នូ ឆ្នាំ២០២៣កន្លងទៅ ក្នុងឱកាសអញ្ជើញសម្ពោធដាក់ឲ្យប្រើប្រាស់ជាផ្លូវការ ទីតាំងមណ្ឌលសំចតប៉ោយប៉ែត នៅក្រុងប៉ោយប៉ែត ខេត្តបន្ទាយមានជ័យ លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានបញ្ជាឲ្យបណ្ដេញចេញពីក្របខ័ណ្ឌតែម្ដង ចំពោះមន្ដ្រីនគរបាលរូបណាដែលតេស្ដរកឃើញមានសារធាតុញៀន។

លោក ស សុខា បានថ្លែងយ៉ាងដូច្នេះថា «សូមប្រកាសតែម្ដង គឺគ្រប់មន្ដ្រីក្រោមឱវាទ ពិសេសកងកម្លាំងប្រដាប់អាវុធចំណុះក្រសួងមហាផ្ទៃ ឲ្យតែធ្វើតេស្ដឃើញសារធាតុញៀន មិនអាចអនុញ្ញាតឲ្យនៅក្នុងក្របខ័ណ្ឌនគរបាលជាតិនោះទេ។ បើមិនយកពេលវេលានេះដើម្បីសម្អាតផ្ទះយើងទេ យើងអត់មានពេលសម្អាតទៀតទេ។ ចំពោះមន្ត្រីក្របខណ្ឌស៊ីវិល មិនទាន់មានការណែនាំជារួមទេ»។

ជាមួយគ្នានេះ លោក ស សុខា បានព្រមានជាថ្មីម្ដងទៀត ចំពោះជនទាំងឡាយណាដែលពាក់ព័ន្ធជាមួយបទល្មើសគ្រឿងញៀន សូមដកខ្លួនចេញឲ្យឆ្ងាយ ខណៈអ្នកដែលដឹងថា ខ្លួនមានសារធាតុញៀន ក៏ត្រូវស្វែងរកវិធីសាស្ដ្រដើម្បីផ្ដាច់ចោល៕

អត្ថបទ៖ សុខុម