រដ្ឋមន្ត្រីមហាផ្ទៃ ព្រមានដកពីក្របខ័ណ្ឌចំពោះមន្ត្រីណាដែលប្រើប្រាស់អាវុធដោយគ្មានការអនុញ្ញាត

នៅក្នុងសន្និបាតបូកសរុបលទ្ធផលការងាររបស់ក្រសួងមហាផ្ទៃ នៅព្រឹកថ្ងៃទី២៩ ខែកុម្ភៈ ឆ្នាំ២០២៤នេះ រដ្ឋមន្ត្រីក្រសួងមហាផ្ទៃ លោក ស សុខា ព្រមានដកចេញពីក្របខ័ណ្ឌចំពោះមន្ត្រីរូបណា ដែលបានប្រើប្រាស់អាវុធខុសច្បាប់ដោយមិនមានការអនុញ្ញាត ឬឱ្យអ្នកដទៃខ្ចីអាវុធរបស់ខ្លួន។

ពាក់ព័ន្ធនឹងការគ្រប់គ្រងអាវុធជាតិផ្ទុះ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងការកោតសរសើរ និងវាយតម្លៃខ្ពស់ចំពោះអគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានី-ខេត្តទាំងអស់ ដែលបានយកចិត្តទុកដាក់ចំពោះការគ្រប់គ្រង និងការប្រើប្រាស់អាវុធជាតិផ្ទុះ ដែលកម្លាំងនគរបាលជាតិរបស់ខ្លួនបានកាន់កាប់។

លោកឧបនាយករដ្ឋមន្ត្រី ស សុខា ជឿជាក់ថា កងកម្លាំងនគរបាលជាតិ ពិតជាបានគោរព និងអនុវត្តយ៉ាងល្អខ្ជាប់ខ្ជួនក្នុងការគ្រប់គ្រងអាវុធ ជាពិសេស នឹងមិនមានកម្លាំងនគរបាលណា ដែលប្រើប្រាស់អាវុធខុសច្បាប់នោះឡើយ។ ប៉ុន្តែយ៉ាងណាក្ដី លោករដ្ឋមន្ត្រីក្រសួងមហាផ្ទៃ បញ្ជាក់ថា ប្រសិនបើកម្លាំងនគរបាលបានប្រើប្រាស់អាវុធដោយខុសច្បាប់ មិនមានការអនុញ្ញាត ឬមួយបានយកអាវុធរបស់ខ្លួនទៅឱ្យអ្នកដទៃខ្ចីនោះ លោកយល់ថា មិនចាំបាច់ទុកក្នុងក្របខ័ណ្ឌទៀតនោះទេ គឺត្រូវបណ្ដេញចេញពីក្របខ័ណ្ឌតែម្ដងទៅ។

លោក ស សុខា បានលើកឡើងថា ការប្រើប្រាស់អាវុធដោយខុសច្បាប់ មិនមានការគ្រប់គ្រងត្រឹមត្រូវបែបនេះ នឹងអាចបង្កជាគ្រោះថ្នាក់ទៅលើប្រជាពលរដ្ឋទូទៅ ជាពិសេសការប្រើប្រាស់អាវុធ ដោយគ្មានច្បាប់អនុញ្ញាតនេះ នឹងឈានរហូតដល់ការប៉ះពាល់ដល់អាយុជីវិតអ្នកដទៃថែមទៀតផង។ ដូច្នេះ ក្នុងនាមជាប្រមុខក្រសួងមហាផ្ទៃ លោក ស សុខា បានណែនាំដល់អគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានី-ខេត្តទាំងអស់ បន្តត្រួតពិនិត្យលើការងារនេះបន្ថែមទៀត ខណៈកន្លងទៅ ក្រសួង ក៏បានប្រមូលអាវុធពីអ្នកដែលយាមតាមក្រុមហ៊ុនធំៗមួយចំនួនរួចហើយ ដែលអាចនៅសេសសល់តិចតួចប៉ុណ្ណោះ៕