ព័ត៌មានជាតិ
រដ្ឋបាលខេត្តកណ្ដាល ឯកភាពគម្រោងស្ថាបនាស្ពានបេតុងប្រវែង ៣៥០ ម៉ែត្រ ឆ្លងទៅកោះចំរើន
អាជ្ញាធរស្រុកលើកដែក បង្ហាញថា ក្តីរំពឹងរង់ចាំរបស់ប្រជាពលរដ្ឋអ្នកភូមិកោះចំរើន បានមកដល់ហើយ តាមរយៈគម្រោងអភិវឌ្ឍន៍ស្ពានបេតុងប្រវែង ៣៥០ ម៉ែត្រ និងទទឹង ៨ ម៉ែត្រ ខណៈ រដ្ឋបាលខេត្តកណ្ដាល បានឯកភាពគាំទ្រគម្រោងមួយនេះ។
លោក ចាប ច័ន្ទវិទ្យា អភិបាលស្រុកលើកដែក បានឱ្យដឹងនៅរសៀលថ្ងៃទី ១៨ ខែមីនា ឆ្នាំ ២០២៤ នេះថា រដ្ឋបាលខេត្តកណ្តាល បានឯកភាពគាំទ្រគម្រោងស្ថាបនាស្ពានបេតុងប្រវែង ៣៥០ ម៉ែត្រ ទទឹង ៨ ម៉ែត្រ កម្រាស់ ០,២០ ម៉ែត្រ ឆ្លងកាត់ឆ្ពោះទៅភូមិកោះចំរើន ស្ថិតនៅឃុំកំពង់ភ្នំ រួចអស់ហើយ នៅឡើយការត្រៀមរៀបចំពិធីបើកការដ្ឋានជាផ្លូវការនាពេលឆាប់ៗ ខាងមុខ។
បើតាមលោកអភិបាលស្រុកលើកដែក បន្តថា គម្រោងស្ថាបនាហេដ្ឋារចនាសម្ព័ន្ធដ៏មានសារៈសំខាន់មួយនេះ នឹងបង្កលក្ខណៈកាន់តែងាយស្រួលធ្វើដំណើរទៅមករបស់ប្រជាពលរដ្ឋ ដោយត្រូវប្រើប្រាស់ពេលវេលាសាងសង់ ២៤ ខែ។
លោក ផានិត និងលោក ប៊ុត សុវតិ្ថ ជាអ្នកភូមិកោះចំរើន ក៏បានបង្ហាញការពេញចិត្តពេញថ្លើមចំពោះគម្រោងធ្វើស្ពាននេះ ដោយពួកគាត់ជឿជាក់ថា រាល់ការធ្វើដំណើរទៅមក គឺមិនពិបាកដូចពេលមុនៗ ព្រោះខែវស្សាត្រូវជិះទូកដ ឯខែប្រាំងចំណាយថវិកា គ្រាបើកបរកង់ ម៉ូតូ និងរថយន្តឆ្លងកាត់ដីឯកជន។
តំណាងប្រជាពលរដ្ឋភូមិកោះចំរើន សូមថ្លែងអំណរអរគុណយ៉ាងខ្លាំងជូនចំពោះរាជរដ្ឋាភិបាលកម្ពុជា លោក គង់ សោភ័ណ្ឌ អភិបាលខេត្តកណ្តាល និងលោក ចាប ច័ន្ទវិទ្យា អភិបាលស្រុកលើកដែក ដែលគិតគូរអំពីទុក្ខលំបាក ក៏ដូចជាសេចក្តីត្រូវការចង់បានប្រចាំថ្ងៃរបស់ពលរដ្ឋក្នុងឃុំកំពង់ភ្នំ។
គួរជម្រាបថា កាលពីថ្ងៃទី ១៣ ខែតុលា ឆ្នាំ ២០២២ កន្លងទៅ មានឧបទ្ទវហេតុលិចទូកនៅក្នុងភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល បានបណ្តាលឱ្យសិស្សសាលាប្រុស-ស្រីចំនួន ១១ នាក់ បាត់បង់ជីវិត ក្នុងចំណោមជនរងគ្រោះក្នុងហេតុការណ៍លិចទូកសរុបចំនួន ១៥ នាក់ ដោយមានតែ ៤ នាក់ប៉ុណ្ណោះ រួចផុតពីអាយុជីវិត។ ក្រោយមក លោកអភិបាលខេត្តកណ្តាល ទទួលបានការឯកភាពពី សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា សម្រេចឱ្យសាងសង់ស្ពាននៅក្នុងភូមិកោះចំរើន ស្រុកលើកដែក ដើម្បីសម្រួលឱ្យពលរដ្ឋ និងសិស្សានុសិស្សឆ្លងកាត់ ដើម្បីបញ្ចៀសកុំឱ្យកើតមានឧបទ្ទវហេតុលិចទូកបណ្តាលឱ្យស្លាប់មនុស្សតទៅទៀត៕
អត្ថបទ ៖ សិរីវឌ្ឍនៈ
-
ព័ត៌មានអន្ដរជាតិ១ ថ្ងៃ agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេចក្ដីជូនដំណឹង៣ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
សេដ្ឋកិច្ច៣ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
កីឡា៤ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ១ សប្តាហ៍ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេដ្ឋកិច្ច៦ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ
-
ព័ត៌មានអន្ដរជាតិ៦ ថ្ងៃ agoលោក ត្រាំ ទ្រាំលែងបាន ជះសម្តីធ្ងន់ៗ ដាក់លោក ណេតាន់យ៉ាហ៊ូ ដែលបំផ្លាញផ្លូវទៅរកសន្តិភាព