រយៈពេល៣ថ្ងៃសង្ក្រាន្តបាត់ដំបងទទួលបានភ្ញៀវទេសចរជាង១លាននាក់

គ្រាន់តែរយៈពេល៣ថ្ងៃនៅក្នុងពិធីសង្ក្រាន្តបាត់ដំបង មានភ្ញៀវទេសចរជាតិ និងអន្តរជាតិមកចូលរួមកម្សាន្តសប្បាយរីករាយទទួលអំណរឆ្នាំថ្មីដែលមានចំនួនលើសពីការរំពឹងទុករហូតដល់ជាង១លាននាក់។

យោងតាមរបាយការណ៍របស់មន្ទីរទេសចរណ៍ខេត្តដែលរៀបចំដោយលោក អ៊ុច អ៊ំភីនីហ្សារ៉ា ប្រធានមន្ទីរទេសចរណ៍ខេត្តបាត់ដំបងបានបញ្ជាក់ថា នៅក្នុងរយៈពេលបីថ្ងៃ គិតចាប់ពីថ្ងៃទី១៣ ដល់ថ្ងៃទី១៥ ខែមេសា ឆ្នាំ២០២៤ នេះ នៅគ្រប់តំបន់រមណីយដ្ឋាន និងទីកម្សាន្ដនៅកណ្ដាលក្រុងបាត់ដំបង បានទទួលភ្ញៀវជាតិ និងអន្តរជាតិប្រមាណជាង១លាននាក់ ដែលនេះសបញ្ជាក់ឲ្យឃើញថា ខេត្តបាត់ដំបងមានសក្តានុពលខ្លាំង លើវិស័យទេសចរណ៍ដោយសារសម្បូរដោយតំបន់រមណីយដ្ឋានធម្មជាតិជាច្រើនកន្លែង និងម្យ៉ាងវិញទៀត នៅឆ្នាំនេះរដ្ឋបាលខេត្តបានរៀបចំទីតាំងកម្សាន្តនៅលើវិថីសម្ដេចក្រឡាហោម ស ខេង ដែលហៅថា តំបន់ត្រជាក់ធ្វើឲ្យភ្ញៀវជាតិ និងអន្តរជាតិចូលរួមកម្សាន្តយ៉ាងកុះករផងដែរ។

តាមរបាយការណ៍សរុបរួមរបស់មន្ទីរទេសចរណ៍ខេត្តបានបញ្ជាក់ថា ចាប់តាំងពីថ្ងៃទី១៣ ដល់ថ្ងៃទី១៥ ខែមេសានេះមានភ្ញៀវទេសចរណ៍ជាតិ និងអន្តរជាតិចូលរួមកម្សាន្តសប្បាយយ៉ាងអធិកអធ័មដោយនៅថ្ងៃទី១៣ មានភ្ញៀវសរុបរួមចំនួន ១៥៩.១៦៩ នាក់ ក្នុងនោះភ្ញៀវជាតិមានចំនួន ១៥៨.៧១១ នាក់ និងភ្ញៀវអន្តរជាតិមានចំនួន ៤៥៨ នាក់។ នៅថ្ងៃទី១៤ ភ្ញៀវសរុបមានចំនួន ៣៩៥.១៨៩ នាក់ ក្នុងនោះភ្ញៀវជាតិមានចំនួន ៣៩៤.៤៦៨ នាក់ និងភ្ញៀវអន្តរជាតិមានចំនួន ៧២១នាក់។ សម្រាប់ថ្ងៃទី១៤ ភ្ញៀវសរុបមានចំនួន ៥១៩.២៨៨ នាក់ ក្នុងនោះភ្ញៀវជាតិមានចំនួន ៥១៨.៣៧៦ នាក់ និងភ្ញៀវអន្តរជាតិមានចំនួន ៩១២នាក់។

បើគិតសរុបនៅក្នុងរយៈពេលបីថ្ងៃភ្ញៀវដែលចូលរួមមកកម្សាន្តនៅក្នុងសង្ក្រាន្តបាត់ដំបងមានចំនួនសរុប ១.០៧៣.៦៤៦ នាក់ ក្នុងនោះភ្ញៀវជាតិមានចំនួន ១.០៧១.៥៥៥ នាក់ និងភ្ញៀវអន្តរជាតិមានចំនួន ២.០៩១ នាក់៕

អត្ថបទ៖ សោ និយមរ័ត្ន