មន្ត្រីជាន់ខ្ពស់ក្រសួងកិច្ចការនារី៖ ការរៀបការនៅវ័យក្មេង ជះផលអវិជ្ជមានលើក្មេងស្រីអាយុក្រោម ១៨ឆ្នាំ

លោកស្រី ហ៊ូ សាមិត្ត រដ្ឋលេខាធិការក្រសួងកិច្ចការនារី លើកឡើងថា ការរៀបការនៅវ័យក្មេង មានផលប៉ះពាលជាអវិជ្ជមានលើក្មេងស្រីអាយុក្រោម ១៨ឆ្នាំ។ លោកស្រី បានលើកឡើងបែបនេះ ក្នុងពិធីប្រកាសផ្សព្វផ្សាយជាផ្លូវនូវរបាយការណ៍សិក្សាស្រាវជ្រាវ ស្តីពី “ការរៀបអាពាហ៍ពិពាហ៍នៅវ័យក្មេង ការរៀបអាពាហ៍ពិពាហ៍ដោយបង្ខំ និងការរស់នៅជាមួយគ្នាជាប្តីប្រពន្ធនៅវ័យក្មេង” នៅថ្ងៃទី២៧ ខែមិថុនា ឆ្នាំ២០២៤។

ពិធីប្រកាសផ្សព្វផ្សាយនេះ មានគោលបំណង បង្ហាញនូវលទ្ធផលសំខាន់ៗនៃការសិក្សាស្រាវជ្រាវថ្មី ជាពិសេសស្ថានភាពនៃអត្រាប្រេវ៉ាឡង់ ឬសគល់នៃបញ្ហា ផលប៉ះពាល់ និងបទអន្តរាគមន៍ទប់ស្កាត់ការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់នៅកម្ពុជា ដល់អ្នកពាក់ព័ន្ធនានា រួមមាន ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ អង្គការសង្គមស៊ីវិលជាតិ អន្តរជាតិ និងអាជ្ញាធរពាក់ព័ន្ធគ្រប់កម្រិតរួមទាំងយុវជនវ័យក្មេង។

លោកស្រី ហ៊ូ សាមិត្ត រដ្ឋលេខាធិការក្រសួងកិច្ចការនារី បានឱ្យដឹងថា​ ក្រសួងកិច្ចការនារី បានសហការជាមួយអង្គការភ្លែនអន្តរជាតិ ដើម្បីសិក្សាស្វែងរកមូលហេតុ និន្នាការ ឥទ្ធិពល និងផលប៉ះពាល់នៃការរៀបអាពាហ៍ពិពាហ៍នៅវ័យក្មេង ការរៀបអាពាហ៍ពិពាហ៍ដោយបង្ខំ និងការរស់នៅជាមួយគ្នាជាប្តីប្រពន្ធនៅវ័យក្មេង។ លទ្ធផលនៃការសិក្សាស្រាវជ្រាវនេះ បានបង្ហាញថា ការរៀបអាពាហ៍ពិពាហ៍នៅវ័យក្មេង ការរៀបអាពាហ៍ពិពាហ៍ដោយបង្ខំ និងការរស់នៅជាមួយគ្នាជាប្តីប្រពន្ធវ័យក្មេង ជាការអនុវត្តបង្ករគ្រោះថ្នាក់ និងរំលោភបំពានសិទ្ធិកុមារ​ ក្មេងស្រី និងស្រ្តី ជាពិសេសសិទ្ធិសុខភាពផ្លូវភេទ សិទ្ធិសុខភាពបន្តពូជ និងរារាំងដល់ក្មេងស្រី និងស្រ្តីក្នុងការទទួលបាន ឱកាសអប់រំ ការចូលរួមក្នុងសង្គម សិទ្ធិអំណាចផ្នែកសេដ្ឋកិច្ច។ ទាំងអស់នេះ ជាកត្តានាំឱ្យក្មេងស្រី ជួបប្រទះ អំពើហិង្សា ហើយជះឥទ្ធិពលដល់ដល់ការអភិវឌ្ឍរបស់មនុស្ស និងសង្គមជាតិ។​

លោកស្រីបន្តថា ការរៀបអាពាហ៍ពិពាហ៍នៅវ័យក្មេង ការរៀបអាពាហ៍ពិពាហ៍ដោយបង្ខំ និងការរស់នៅជាមួយគ្នាជាប្តីប្រពន្ធនៅវ័យក្មេង មានផលប៉ះពាលជាអវិជ្ជមានលើក្មេងស្រីអាយុក្រោម ១៨ឆ្នាំ ដូចជា ការមានផ្ទៃពោះនៅវ័យជំទង់ ការរំលូតកូនដោយមិនមានសុវត្ថិភាព សុខភាពបន្តពូជ សុខភាពផ្លូវចិត្ត អំពើហិង្សាក្នុងគ្រួសារ និងបាត់បង់សិទ្ធិសេរីភាពក្នុងការចូលរួមក្នុងសង្គម និងការចូលរួមសកម្មភាពនានាក្នុងនាមជាពលរដ្ឋ។

យោងតាមរបាយការណ៍របស់ អង្គការភ្លែនអន្តរជាតិកម្ពុជា បានឱ្យដឹងថា ការសិក្សានេះ បានធ្វើឡើងនៅក្នុងខេត្តគោលដៅចំនួន៩ រួមមាន ខេត្តសៀមរាប រតនគិរី ស្ទឹងត្រែង ព្រះវិហារ បាត់ដំបង កំពត ព្រះសីហនុ ព្រៃវែង និងតាកែវ។ តាមរយៈការស្ទង់មតិលើស្ត្រីចំនួន ១ ៣៥០នាក់ ដែលមានអាយុ ២០-២៤ឆ្នាំ តំណាងឱ្យភាពចម្រុះនៃស្ថានភាពគ្រួសារដើម្បីស្វែងរកមូលហេតុដែលជាឬសគល់ និងបុព្វហេតុជាក់លាក់ដែលនាំឱ្យមានការរៀបអាពាហ៍ពិពាហ៍នៅវ័យក្មេង និងការរៀបអាពាហ៍ពិពាហ៍ដោយបង្ខំ។

លោកស្រី គ្វីននេត វ៉ង នាយិកាប្រចាំប្រទេសអង្គការភ្លែនអន្តរជាតិកម្ពុជា បានគូសបញ្ជាក់ថា លទ្ធផលនៃការសិក្សានៅក្នុងចំណោមខេត្តទាំង៩ គឺខេត្តរតនគិរី ដែលជាខេត្តគោលដៅអនុវត្តគម្រោងរបស់អង្គការភ្លែនអន្តរជាតិកម្ពុជា មានអត្រាខ្ពស់ជាងគេនូវស្ត្រីដែលបានរៀបការមុនអាយុ ១៨ឆ្នាំ រហូតដល់ចំនួន​៣៧,៣% បើធៀបនឹងខេត្តផ្សេងទៀត ដូចជា ព្រះវិហារ ១៦,៧% ស្ទឹងត្រែង ១៤,៧% កំពត ១៤% សៀមរាប១២% ព្រៃវែង ១០,៧% ព្រះសីហនុ ៩,៣% បាត់ដំបង ៨% និងខេត្តតាកែវមានអត្រាលំដាប់ទាបជាងគេ ៧,៣%៕